Oollalleya 11 - Mawu a Mulluku

Nnddo ddineera muthu eezeru

¹ Vokha ddoocha ddawo vamaaddini oneeroddiphwanya vamalla mallapo manchichi.

² Kawa eyuuma ezigawo dditthanu ni piilli apaalle dditthanu ni raru vawi khonadduwella otulli oyo onaamore vatthimva.

³ Mirapo ddakhalla ni maaddi murimu annarupa. Muteekho wiikuhella omwera apaalle ompoto onaakonaatthelle wenko.

⁴ Oyo anatiyera wi ephevo yoope phaama apaalle mirapo ddiwe phaama, khaalla apaalle khahata ello.

⁵ Monga ohinadduwellelleewe mmo munepa onavollowelliiwa mwa mwaana m'mirimani mwa mutthiyana eerukullu tti mmo ohinadduwellelleewe Mulluku anapangalleeye ddeko ddittheddene.

⁶ Ohinase omidde m'middwaawo, misikuwattho ohiniithuuwiiha mattaawo vawi khonadduwella nnddo ddinaawunnuwe khaya tti nndda apaalle nndde apaalle piilliddene.

⁷ Owala onnaddiva nave tti woonang'aneya miitthwaawo yoona nndduwa.

⁸ Muthu akhalla a miyakha ddinchichi ahakallallelleke miyakha ddittheddenennddo. Koma uupuwelleke wi mallapo oowa vatulli va okhwa waye tti manchichi. Ddittheddene ddinawanndda tti ddoohikhalla ni mutteko.

Malangizo wa asombwe

⁹ We Musombwe, hakallalla ni esombwe. Murimaawo ohakallalle mallapo a esombwaawo moollikana ni mmo opaalla wa murimaawo ni mmo miitthwaawo enoonelliiwa koma dduwella wi Mulluku aneerowiipa mullatu wa ddittheddenndda.

¹⁰ Sika vano venyiha ddookhupanyiha m'murimani mwawo, rapa ddawuuhoosa m'mwiillini mwawo. Vallethi esombwe ni enamwani tti ya mallapo ooyeva.