Oollalleya 10 - Mawu a Mulluku

¹ Engwillihi ddookhwa ddinnawiiha nthuko noonanara mu makhura awunkhella phaama emoddamoddave yeeyo okarangeya vang'ono onnoononga ezeru ni olemu.

² Murima wa muthu eezeru onnamuhoollella phaama koma murima wa muthu ookarangeya onnamuhollosa.

³ Muthu ookarangeya aaweetaka m'musewuni ddaweera ddaye ddinakhalla ddoohikhallave ni ezeru nave arive muthu annamudduwella wi tti ookarangeya.

⁴ Oolamulella uushella murima ohinavenyavo vanipuroni vawo vawi wiithaalla onnavuhellella ddoolakwa dduullupalli.

⁵ Vookhalla vatthimva yoonanara emodda kiyoonilleemi, yoolakwa yaweeriwa ni oolamulella.

⁶ Athu ookarangeya enninnyiwa mitteko ddavaddullu ddinchichi nave eeyuuma enninnyiwa mitteko ddavatthi.

⁷ Koowoona akaporo yeetaka vaakavaloni nave enduna ddeetaka vatthi wonanko akaporo.

⁸ Oyo anakata nlliti ttuumorellamo yeekha. Oyo anaphovolla esiri ttuullumiwa ni enowa.

⁹ Oyo anapwesa malluku, ttuumuphoriiha yeekha. Oyo anatthalla ekhuni ttuumuphoriiha yeekha.

¹⁰ Kottokwa akhalla ootturya nave aahaandusiwa annapaalla masiva manchichi vootthallani. Koma ezeru ddinnamukavihera muthu wi apambane.

¹¹ Khaviri mphuro va eruso ya amasenga ottheelliha enowa ellumalle khalle.

¹² Mawu a muthu eezeru ennamuvahiha olemu koma a muthu ookarangeya ennamoononga.

¹³ Muthu ookarangeya annaamba ollota ni mawu ookarangeya nave voomallihani annakhalla wonanko mullupaanepa.

¹⁴ Muthu ookarangeya annoonjera mawu. Ethiyo ttuudduwella nnddo ddinaaweereye muhoollo? Ttaani anaawore omulleella muthu nnddo ddinaamweereyelle akhwa?

¹⁵ Muthu ookarangeya annaphara mutteko mwawiitopiha vawi khanadduwella ettilla yooya m'muzindani.

¹⁶ Ootulli tti we ellapo, mwenaawo aarimi ari mwaana nave enduna ddawo ddipeheraka machellello.

¹⁷ Oodala tti we ellapo, mwenaawo aarimi ari mwaana a oyo ahiri kaporo nave enduna ddawo ddaarimi ddichaka mu enthawi yoophwanellella wi ddikhalle ddamasiva oohikhalla wi ddilezele.

¹⁸ Muthu akhalla oolesi enyumbaaye ennatthanyuwa nave muthu akhalla amatta llellee enyumbaaye ennandonya.

¹⁹ Machellello ennamuhakallalliha muthu nave vinyo tti oohakallalliha okumi koma ddittheddenennddo ddinapaalla makobiri.

²⁰ Ohinamuvevullaka mwene m'murimani mwanyu nave ohinamuruwanaka muthu eeyuuma obedini wanyu, ochipindani wawo woova wi mwanapallame oovava apaalle mwaneello oovava ttuuwiiwa nave ttuuwulula ddittheddene wa ayo onaalloteewe.