Oollalleya 1 - Mawu a Mulluku

Okumi khonna mutteko

¹ Alla tti mawu a Oollalleya, mwaana a Davide, oyo aari mwene a o Yerusalemu.

² Ddittheddene khaddinna mutteko, anallota tti Oollalleya, ddittheddene khaddinna mutteko! Ddawoona, ddittheddene khaddinna mutteko!

³ Ethiyo muthu ttuuphura tini ni mitteko ddootopiha anaphareeye vatthimva?

⁴ Mbado mmodda onnamalla, mmodda onnawa koma ellapo yavatthi khenamalla.

⁵ Nndduwa ninnakhuma nave ninnavollowa, ninnaakuvella nko nakhumelliiwawo.

⁶ Ephevo ennoopella omwera erukunuwella ompoto. Ennoopa moowaapheella, ennahokollowella nko yavenyeriiwawo.

⁷ Mihinje ddittheddene ddiniithellella mu enyanja koma enyanjeeyo khenaddalla. Nko maaddi evenyeriiwawo tti wenko enahokollowelliiwawo.

⁸ Ddittheddenenndda tti ddootopiha, ollemella wiwa tti woohilloteya. Miittho khenakholliwa ni oweha, maaru khenakholliwa ni wiiwa.

⁹ Nnddo ddaarivo khalle ddineerokhallavottho. Nnddo ddeereyille khalle ddiineereweereyattho. Kheyiivo ello esha vatthimva.

¹⁰ Ethiyo yookhallavo ello mmodda anaalloteeye wi, “Ella tti esha?” Iyaayi, yaakhallavo khalle hiyaano nihinakhallevo.

¹¹ Ddakhalle khaddinuupuwelleya naari ddeko ddineereye vatulli viwa khaddiwa dduupuwelliwa ni ayo enaawe muhoollo mwiwa.

Oonille Oollalleya

¹² Miyaano Oollalleya kaari mwene owaalamulella Aisraele mu Yerusalemu.

¹³ Kaahiyavo murimaaka waashaasha wiiwesesa phaama dda ezeru ddittheddene ddaweereya vatthimva. Yoolla tti mutteko wootopiha oyo Mulluku aavahilleeye athu.

¹⁴ Ddittheddene ddaweereya vatthimva kooddoona. Ddittheddenennddo khaddinna mutteko nave oddaashaasha ddenndda tti wiikatamiha.

¹⁵ Eyo ekhoromanille kheworeya wookowa, eyo ehiivo kheworeya weerengiwa.

¹⁶ M'murimani mwaka kaanallota wi, “Koophwanya ezeru ddinchichi waakhwaranya attheene yalamulelle o Yerusalemu khalle. Koohuddera ddinchichi ddoohulla muru ni ddeezeru.”

¹⁷ Kaheeseesa ohiyaniha variyari va ezeru, anepa ni okarangeya. Koma kaadduwella wi kaamoona wiikatamiha.

¹⁸ Vallethi ezeru ddinchichi ddinnamoriha ethakaraka wunchichi vawi muthu aawoonjereraka odduwella annoonjererattho ovoreya.