Obadiya 1 - Mawu a Mulluku

Wiitukhulla wa Edomu ni woonongiwa waye

¹ Alla sika masomphenya a Obadiya ayo Apwiya Amasiva Mattheene yallotilliiwa dda Edomu. Nohiiwa othenga woovenyera wa Apwiya nave amithenga oorumihiwa variyari va mitundu dda athu nave anallota wi, “Venyani! Hankoni nawane ekhoto ni Edomu!”

² Apwiya enallota ni Edomu wi, “Ngoona, kineerewuuyeviha variyari va mitundu dda athu, oneeronyaambusiwa wunchichi.

³ Makhallellwaawo awiitukhulla ahuulleka, we onakhalla m'mittharini dda malluku we onakhalla vaddullu, we onallota m'murimani mwawo wi, ‘Ttaani anaakikitthihe vatthi?’

⁴ Koma naarive omakille enyumbaawo vaddullu wonanko emphuru ya echiwombankhanga, wonanko emodda mwa etheneeri kineerewuukitthiha.”

⁵ “Allupa wiiya yaphiyalleke mahiiyu, ddaano ekusallevo ddoopaalleyave. Oohata mpesa yaawiilleke wa nyuwaano, yaweere wuuhiyerani mpesa va enthambi. Koma adanaawo ahuumalliha, oohuuhiyera naari vang'ono.

⁶ Nyu edduullu dda Esau, eyuumaanyu yohaakhiwa,

⁷ awiiwanananaanyu aawiikarani mwiillaponi mwanyu. Athu mwakhalleenyuna mwamurendelle ahuugonjihani, akhwiinyu mwacheenyuna vamodda ahuureyani musampha, enimuunyemullani wi, ‘Ochenjera wiwa ottheene wulle ori wuuwi?’ ”

⁸ “Nllapo nno kinaamullakeemi Edomu, kineerowoononga athwaaye oochenjera, kineeromalliha ezeru ddiwa.

⁹ We Temani, athwaawo amasiva eneerokhumuwa, arive muthu oovenyera o mwaango wa Esau, aneerovenyihiwawo ni wiiphiwa.”

Machimo a Edomu

¹⁰ “Ekaamba ya ekuku wamweerelleewe mwanamunno Yakobo, owulliwa muru eneerewuuhuruwella, oneerewoonongeya wa enthawi yoohimalla.

¹¹ Nllapo nenne, waamoona oweha mvo adani yamwaakhiiwa eyuumaaye, mvo athu eelleto yavollowiiwa m'millakoni dda Yerusalemu mvo yakawaniiwa eyuumaaye vawoombesani, waari wonanko mmodda a alliwa.

¹² Khawaaphwanenlle onyemulla otulli wa mbalaawo. Khawaaphwanenlle othapella woonongiwa wa athu a o Yuda. Khawaaphwanenlle waattheya mvo yaariiwa mu ddookatamiha.

¹³ Khawaaphwanenlle ovollowa m'muzindani mwa athwaaka va nllapo na ddoohoosa ddiwa. Khawaaphwanenlle onyemulla otulliiwa va nllapo na ddookatamiha ddiwa. Khawaaphwanenlle owaakha eyuumiiwa va nllapo na ddookatamiha ddiwa.

¹⁴ Khawaaphwanenlle wiimella vamakhullukano wi mwaaphare athu yapaalla othawa. Khamwaaphwanenlle waavelleella athwiiwa oovulluwa wa adani va nllapo na opaneya wiwa.”

Apwiya eneerollaka mitundu dda athu

¹⁵ “Nllapo nohaatamella mvo mi Apwiya kinaaweeruzeemi mitundu ddittheddene. Edomu, weerilleewe eneereweereya wa weyaano, oneerohokolloselliwa ddoonanara.

¹⁶ Athwaaka aamuwirya kapu a ollaka, va mwaangwaaka waweella. Koma mitundu ddittheddene ddawaapheella, ddineerekomuwirya kapu a ollaka, ddineerekomuwirya muttheene nave ddineerekothiima.”

Opambana wa Israele

¹⁷ “Koma va mwaango wa Ziyoni amodda eneerothawellawo nave onaakhalle nipuro naweella. Athu a Yakobo eneerokhalla ni ellapo wi ekhalle yoohallaniiwa

¹⁸ Athu a Yakobo enaakhalle wonanko munllo, athu a Yosefe enaakhalle wonanko mallumi amunllo. Eneerowoononga athu a Esau wonanko munllo onashellellihiiwa makoto, khekhallavo edduullu ya Esau enaavulluwe. Mi Apwiya koollota.”

¹⁹ “Athu oovenyera omwera wa Yuda eneerokhalla mu mwaango wa Esau. Oovenyera museresere mwa mwaango wa woovollowa nndduwa eneeromuphara Filistiya. Aisraele eneerohallana ezigawo dda Efuremu ni Samariya, Abenjamini eneeromukusa Giliyadi.

²⁰ Akhoto a akaporo oovenyera ompoto wa Israele eneerohokollowa, eneeromugonjiha Kanani ophiyera ompoto wa Zarefati. Akaporo oovenyera o Yerusalemu ayo yaari o Sefaradi eneerewaakha mizinda dda omwera wa Yuda.

²¹ Athu oopambana a mwaango wa Ziyoni eneerogonjiha ni olamulella mwaango wa Esau nave eneeromulamulella, Apwiya aneena eneerokhalla mwene.”