Numeri 9 - Mawu a Mulluku

Dda nllapo na Paska

¹ Mweeri wawaamba wa muyakha waneepiilli Aisraele ekhumalle mu Iguputo, Apwiya yaamulleella Mose mu echipululu ya Sinai wi,

² “Aisraele yeereke Ehakallallo ya Paska mu enthawiiwa.

³ Mweereke Ehakallallo ya Paska va nllapo na khumi ni sese na mweeri yoolla misikuwa moollikana ni malamulwiiwa ni malangizwiiwa mattheene.”

⁴ Sika Mose ahaalleella Aisraele wi yeereke Ehakallallo ya Paska.

⁵ Nave Aisraele yaheera Ehakallallo ya Paska va mweeri wawaamba va nllapo na khumi ni sese, misikuwa, mu echipululu ya Sinai moollikana ni mmo Apwiya yamulamulelliiwa Mose.

⁶ Vaakhalla athu amodda ayo yaari yiiripihalle voottannyani mutembo, sika wi kheyaawonre weerana Ehakallallo ya Paska va nllapo nenno. Sika yaawa wa Mose ni Aroni,

⁷ ellota wi, “Hi tti ooripihiwa ekaamba yoottannya. Kaambiiwa tini ninawatteellihiweehu owa ni ddoovelleella wa Apwiya va enthawi yoophwanellella variyari va Aisraele akhwiihu?”

⁸ Mose aawaakhulla wi, “Tiyerani wi kiiwe nnddo Apwiya enaalamuliiwa dda nyuwaano.”

⁹ Apwiya yaamulleella Mose wi

¹⁰ “Alleelle Aisraele wi, arive muthu mwa nyuwaano apaalle mwa edduullu ddanyu iiripiha voottannyani mutembo apaalle akhalla voolendoni koma aapaallaka weerana Ehakallallo ya Paska a Apwiya,

¹¹ eerena ehakallallweella mweeri waneepiilli va nllapo na khumi ni masese misikuwa. Vano ache enama ya va Paska ni buledi oohikhalla ni yisiti ni matthaapa amakukhu oowaawa.

¹² Ahinahiyavo erive ello ya enameeyo ophiyera ohinase apaalle opwesa makhuviiwa. Eereke Ehakallallo ya Paska moollikana ni malamulwiiwa mattheene.

¹³ Koma muthu aahiiripiha apaalle aahikhalla voolendoni koma akhoota ochana Ehakallallo ya Paska yooyo avenyihiwe variyari va Aisraele kaambiiwa khaawiille ni ddoovelleella ddaye wa Apwiya va enthawiiwa. Yooyo aneerollakiwa ekaamba ya nichimo naye.

¹⁴ “Mulleto akhalla variyari vanyu nave anapaalla ochana Ehakallallo ya Paska a Apwiya, olliye eere ehakallallweeyo moollikana ni malamulwiiwa ni malangizwiiwa. Khaya tti mulleto apaalle neetthi, arive muthu akhalle ni lamulo nimodda.”

Ntitimiho na Apwiya

¹⁵ Va nllapo nno natthipelliwe musasa wamutthukumano, murapo waakhuneella. Erive misikuwa ophiyera ohinase murapooyo waanakhuneella ori ni mooneyello amunllo.

¹⁶ Moohihiyerera murapooyo waanakhuneella musasa wamutthukumanooyo otthaana nave mahiiyu waanakhalla ni mooneyello amunllo.

¹⁷ Murapo wawella ovenyera vamusasanimvo, Aisraele yaanatimulla olendwiiwa nave murapooyo wiimella, Aisraele yaanatthipella misasa ddiwa vanipuroni vaavo.

¹⁸ Aisraele yaanatimulla olendwiiwa Apwiya yaalamula nave yaanatthipella misasa ddiwa Apwiya yaalamula. Erive enthawi murapooyo wakhalla vamusasanimvo, alliwa yaanakhallave vanipuroni vaavo.

¹⁹ Naari murapooyo wakhuneella musasooyo enthawi yoorekama vaddullu va musasooyo, Aisraele yaanasungave lamulo na Apwiya nave kheyaatimullavo.

²⁰ Enthawi emodda murapooyo wakhuneella va mallapo ooyeva yaanakhalla vanipuronimvo mallapo ooyeva moollikana ni lamulo na Apwiya. Vano yaanatimulla olendo Apwiya yalamula.

²¹ Enthawi emodda murapooyo waanakhuneella musasooyo waambeella misikuwa ophiyera ohinase. Ohinase murapooyo wawella alliwa yaanatimulla. Enthawi emodda murapooyo waanakhuneella musasooyo otthaana otthewene ni mahiiyweene koma wawella alliwa yaanatimulla olendwiiwa.

²² Naari murapooyo wakhuneella vaddullu va musasa wa wamutthukumano wa mallapo meelli apaalle mweeri apaalle enthawi yoorekama, Aisraele yaanakhallave vanipuronimvo nave kheyaatimulla. Koma murapooyo wawella, alliwa yaanatimulla.

²³ Aisraele yaanatthipella misasa ddiwa Apwiya yaalamula nave yaanatimulla Apwiya yaalamula. Yaanasunga lamulo na Apwiya noolamuliwa oweella mwa Mose.