Numeri 8 - Mawu a Mulluku

Dda enyale

¹ Apwiya yaamulleella Mose wi,

² “Mulleelle Aroni wi aahiyaka enyale dditthanu ni piilli va yoohiyavo enyale, addihiye wi ddimolleelleke muhoollo mwa ddoohiyavo enyalennddo.”

³ Aroni aheera ddiiddo. Aaddihiya wi ddimolleelleke muhoollo mwa yoohiyavo enyalennddo moollikana ni mmo Apwiya yamulamulelliiwa Mose.

⁴ Yoohiyavo enyaleeyo yapangiwe ni golide nave waambeella onthimwani ophiyera omalluwani, otthoka wiwa waari woohana. Yoohiyavo enyaleeyo yapangiwe moollikana ni mmo Apwiya yamoonihalliiwa Mose.

Opatuliwa wa Alevi

⁵ Apwiya yaamulleella Mose wi,

⁶ “Waapatule Alevi variyari va Aisraele nave oweellihe.

⁷ Mmu tti sika onaaweellihellekeewe. Waamidde maaddi aweellihella machimwiiwa. Echeme mwiilli muttheene nave echape ddoowara ddiwa wi eddeellihe.

⁸ Vano alliwaayo emukuse mwaana a eng'ombe aamullopwana ni ddoovelleella dda mukutho wa othu waphaama woottakanyihera ni makhura. Weyaano omukuse nankhoro mwaana a eng'ombe mmodda oovelleellella mukutho woopepesella machimo.

⁹ Owe ni Alevi va mullako musasa wamutthukumano nave waatthukumanihe Aisraele attheene.

¹⁰ Waawaavelleellaka Alevaayo vamiitthoni va Apwiya Aisraele etthinddaanyere mattiiwa va Alevi.

¹¹ Vatulli viwa Aroni aavelleelle Alevaayo vamiitthoni va Apwiya wi ekhalle wonanko yoovelleella yootukhullella muddullu ya Aisraele. Mitteko dda Alevi ddikhalle ddawaarumeyella Apwiya.

¹² Vatulli viwa Alevaayo etthinddaanyere mattiiwa va miru dda anankhoro a eng'ombe nave weyaano ovelleelle eng'ombe emodda wi ekhalle mukutho woopepesella machimo emoddeeyo ekhalle mukutho wooshellelliha wa Apwiya weera mutetho woopepesella machimo a Alevi.

¹³ Waalleelle Alevaayo wi emukavihereke Aroni ni anaaye nave waavelleelle wa Apwiya wonanko yoovelleella yootukhullella muddullu.

¹⁴ “Mmu sika onaapatulelleewe Alevi variyari va Aisraele nave enaakhalle aaka.

¹⁵ Oweellihalle nave waavelleellille wonanko yoovelleella yootukhullella muddullu Alevaayo erumeyelleke mu musasa wamutthukumano.

¹⁶ Alliwaayo aapatulelliwesesa wa miyaano ni murima muttheene variyari va Aisraele munipuroni mwa arive mwaana aamullopwana awaamba oyo anamalliha onamwalli wa mennya. Alevaayo tti aaka,

¹⁷ vawi anamwani attheene aallopwana awaamba tti aaka. Va nllapo nne kawiiphalleemi anamwani aallopwana attheene awaamba, Aiguputo, kahiitthoollella anamwani aallopwana attheene awaamba a Aisraele, anamwani a athu ni a enama ddene.

¹⁸ Vano variyari va Aisraele kohaakusavo Alevi munipuroni mwa anamwani attheene awaamba.

¹⁹ Alevaayo kohaakusa variyari va Aisraele nave kohaavelleella wonanko emphaso wa Aroni ni anaaye wi erumeyelleke munipuroni mwa Aisraele mu musasa wamutthukumano. Yeereke mutetho woopepesella machimo a Aisraele wi mullilli ohaamorelle Aisraele ayo enaawatamelle vakhuviru ni nipuro oopatuleya.”

²⁰ Mmu sika Mose ni Aroni vamodda Aisraele attheene yaweerelliiwa Alevi moollikana ni mmo Apwiya yamulamulelliiwa Mose.

²¹ Alevi yaaddeelliha o machimo nave yaachapa ddoowara ddiwa. Aroni ahaavelleella wi ekhalle wonanko yoovelleella yootukhullella muddullu vamiitthoni va Apwiya nave aaweerella mutetho woopepesella machimwiiwa wi aweellihe.

²² Vatulli viwa Alevaayo yaaphwanella ophara mutteko mu musasa wamutthukumano nave yaanamukavihera Aroni ni anaaye. Sika yaaweerella Alevaayo moollikana ni mmo Apwiya yamulamulelliiwa Mose.

²³ Apwiya yaamulleella Mose wi,

²⁴ “Alevi a miyakha 25 oya muhoollo yaphareke mitteko mu musasa wamutthukumano.

²⁵ Yaphiya miyakha 50 yiithuuwe o mitteko ddoorumeyella nave ehirumeyellettho.

²⁶ Koma ttuuwaakavihera abaliiwa mu musasa wamutthukumano mu muttekwiiwa koma ehirumeyelleke. Mmu sika onaaweerelleewe vookawani mitteko dda Alevi.”