Numeri 6 - Mawu a Mulluku

Dda muthu Munaziri

¹ Apwiya yaamulleella Mose wi,

² “Waalleelle Aisraele wi mullopwana apaalle mutthiyana allupella wi aneerekewiihiiha wi iivelleelle wa Apwiya wi akhalle Munaziri,*

³ iihiihe omuwirya vinyo apaalle ottheka. Nave ahimuwirye vinyo oonyuunya apaalle owirya ddoowirya ddimodda ddoonyuunya nave ahiwirye maaddi mpesa apaalle ocha ezipaso ddampesa ddikitthi apaalle ddawumma.

⁴ Mallapo mattheene muthooyo anaawiipatulelleeye wa Apwiya ahiche erive yoocha yoovenyera o ezipaso ddampesa naari enuku ddiwa apaalle nttapara niwa.

⁵ “Mallapo mattheene ayo allupenlleeye wi aneerewiivelleella wa Apwiya ahicheme omuruni waye. Enthawi ettheene aniivelleelleeye wa Apwiya akhalle oopatuleya nave ahiye meehaaye wi yunnuweke.

⁶ “Mallapo mattheene ayo allupenlleeye wi aneerewiivelleella wa Apwiya ahaatamelle mutembo.

⁷ Ahiiripihe vawaatamellani mutembo wa attiitthinnya, wa amennya, wa mwanamunne apaalle wa murokoriye kaambiiwa ollupella wawiivelleella wa Apwiya ori vamuru vaye.

⁸ Muthooyo tti awaapatuleyella Apwiya mallapo mattheene a wiivelleella waye.

⁹ “Muthu mmodda akhwa moorurumusa vakhuviru ni olliye, sika wi meehi a awiivelleellooyo aaripihiwa, acheme omuruni waye nllapo waneetthanu ni meelli, nllapo naweellihiwa waye.

¹⁰ Va nllapo naneetthanu ni raru awe ni manddiya meelli apaalle mawunda meelli wa mullupa mukutho va mullako wa musasa wamutthukumano.

¹¹ Mullupa mukuthooyo avelleelle emodda wi ekhalle mukutho woopepesella machimo, emoddeeyo ekhalle ya mukutho wooshellelliha. Sika amweerelle mutetho woomupepesella machimwaaye kaambiiwa aalakwa vawaatamellani mutembooyo. Nllapo nenno iivelleelle wiilli wa Apwiya voohiyani meehaaye wi yunnuweke.

¹² Ivellelleelle wa Apwiya wi akhalle Munaziri wa enthawi yoophwanaphwana ni elle allupenlleeye vawaamba. Vano aweena nankhoro a mwaanaankhosa a muyakha mmodda wi avelleelle mukutho woolliva. Nave mallapo a wiivelleella waye wawaamba wulle ahineerengella kaambiiwa aaripiha wiivelleellanko.

¹³ “Lamulo na Munaziri va nllapo na omalla wa wiivelleella waye eweena va mullako wa musasa wamutthukumano

¹⁴ nave olliye avelleelle mikutho wa Apwiya. Amuvelleelle nankhoro a mwaanaankhosa a muyakha mmodda oohirakalla wi akhalle mukutho wooshellelliha, enkhosa yaamutthiyana yoohirakalla wi ekhalle mukutho woopepesella machimo nave nankhoro a enkhosa yoohirakalla wi ekhalle mukutho wa eyaattano.

¹⁵ Avelleellettho mutaanga wa buledi oohikhalla ni yisiti a othu waphaama oottakanyihera ni makhura ni buledi ooshashaalla oomara makhura ni mukutho wa othu ni wa yoowirya.

¹⁶ Vano mullupa mukutho aweena ddittheddenennddo vamiitthoni va Apwiya. Avelleelle mukuthwaaye woopepesella machimo ni mukutho wooshellelliha.

¹⁷ Eera ddiiddo amuvelleelle nankhoro a enkhosa wa Apwiya wi ekhalle mukutho wa eyaattano ni mutaanga wa buledi. Eeddiiddo avelleellettho mukutho wa othu ni wa yoowirya.

¹⁸ Munazirooyo acheme omuruni waye va mullako wa musasa wamutthukumano. Nave akuse meehi a omuruni waye awoose vamunlloni oyo ori vatthi va mukutho wa eyaattano.

¹⁹ Vano mullupa mukutho akuse mweto wamuhoollo wa enkhosa wawaapeya nave amukusettho m'mutaangani buledi mmodda oohikhalla ni yisiti oottakanyihera ni makhura ni buledi oohikhalla ni yisiti oomara makhura nave amuhiye m'mattani mwa Munaziri achemille meehi a ollupella waye.

²⁰ Vano mullupa mukuthooyo avelleelle mootukhullella muddullu wi ddikhalle yoovelleella yootukhullella muddullu wa Apwiya. Ddenndda tti ddoopatuleya dda mullupa mukutho ni ekhakadda owaaka mweto wamutulli ddoovelleelliwa mootukhullella muddullu. Sika vano munazirooyo ttuumuwirya vinyo wiilli.

²¹ “Nenno tti lamulo na Munaziri wooheerengellavo ddimodda nnddo anaaworeeye woonjereravo. Koma eere nnddo allupenlleeye vawiivelleellani wi akhalle Munaziri.”

Dda waadalisa athu

²² Apwiya yaamulleella Mose wi,

²³ “Waalleelle Aroni ni anaaye wi yaadaliseke Aisraele voollotani wi,

²⁴ “Apwiya yuudaliseni nave yuusungeni.

²⁵ “Apwiya ewalihe ekhoviiwa va nyuwaano nave eweerelleni echisomo.

²⁶ “Apwiya ewooneni nave yuuvaheni murendelle.”

²⁷ Nave Apwiya yaallota wi, “Yaaromollaka nnddina naka vawaadalisani Aisraele, miyaano kineerewaadalisa.”