Numeri 5 - Mawu a Mulluku

Dda athu ooripihiwa

¹ Apwiya yaamulleella Mose wi,

² “Alamule Aisraele wi emuvenyihemo arive muthu amakate, arive muthu ookhuma ddoonanara m'mwiillini mwaye navettho arive muthu aniiripiha voottannyani mutembo.

³ Emuvenyihewo arive muthu awi ddiidda, mullopwana apaalle mutthiyana. Emukhumihelleke otte wa misasa wi ahiripihe misasa ddiwa vawi miyaano kinakhalla variyari va athwaaka.”

⁴ Sika vano Aisraele yaheera ddenndda nave yahaakhumihella otte athwaayo moollikana ni mmo Apwiya yamulleellelliiwa Mose.

Dda ohokollosella

⁵ Apwiya yaamulleella Mose wi,

⁶ “Alleelle Aisraele wi mullopwana apaalle mutthiyana amweerella erive ello yoonanara muthu mmodda moohiroromelleya wa Apwiya, muthooyo tti oochimwa.

⁷ Awulule nichimo nno eerilleeye. Ahokollose ddittheddene oonongilleeye nave oonjerere emodda mwa ezigawo dditthanu dda mutengwiiwa nave amwinnye oyo amulakwenlleeye.

⁸ Koma akhalla muthu iiphiwe nave khanna mbalaaye wi aakhelle ddeko ddoohokollosiwa munipuroni mwa ddawoonongeyannddo, avelleelle ddoohokollosiwannddo wa Apwiya wi ddikhalle dda mullupa mukutho, waanjerera va nankhoro a enkhosa awoopollella oyo eneerelliiwa mutetho woopepesella machimwiiwa.

⁹ Nave ddoovelleella ddittheddene ddoopatuleya dda Aisraele nnddo enawaaniiwa wa mullupa mukutho ddikhalle ddaye.

¹⁰ Ddoovelleella ddoopatuleya dda arive muthu tti ddaayeddaaye. Koma erive ello muthu anavelleelleeye wa mullupa mukutho tti ya mullupa mukuthooyo.”

Dda mullopwana oomukayikella mwaariye

¹¹ Apwiya yaamulleella Mose wi,

¹² “Alleelle Aisraele malamulwaalla. Mutthiyana amwiitta mamune aya eera ddoohiroromelleya,

¹³ vookonani ni mullopwana mmodda ttuukhuweya nave mamune khadduwella. Mutthiyanooyo ttuukhalla oohidduwanyeya wi ohiiripiha ekaamba yoorama omboni woomuvaanyiha vawi khamphanre vamiitthoni ni vamiitthoni.

¹⁴ Vano mullopwana aamba omukhallella ehache mwaariye iiripihalle apaalle ahiiripihalle,

¹⁵ mullopwanooyo awe ni mwaariye wa mullupa mukutho. Nave avelleelle mukutho wa othu wa barele wookwakhwana nikilogaramu nimodda. Ahihellevo makhura apaalle lubani* vamukuthonimvo vawi tti mukutho wa othu woovelleellella ehache, mukutho wawuupusa ni owulula.

¹⁶ “Mullupa mukutho aweena mutthiyanooyo vakhuviru nave amwiimese vamiitthoni va Apwiya.

¹⁷ Mullupa mukuthooyo akuselle maaddi oopatuleya mwiipallini nave avahulle nthupi na vatthi mu musasa wamutthukumano nave anihelle m'maaddinimmo.

¹⁸ Amwiimesa vamiitthoni va Apwiya amuttaphullihe meehi nave amuhelle othu wa mukutho wawuupusa m'mattani mwaye, mukutho wa othu woovelleellella ehache. Mullupa mukuthooyo akuse maaddi oowaawa m'mattani mwaye, maaddi amatembelelo.

¹⁹ Vano amullupellelle mutthiyanooyo wi, ‘Waarimi ohiraruwalle ni arive mullopwana nave wi khaweerille erive ello yawuuripiha waariiwe m'mattani mwa mamuno, maaddi oowaawa eri mvaalla ohinatembeleleyana.

²⁰ Koma waarimi wiittalle vamiitthoni va mamuno naari waari m'mattani mwaye wiiripiha nave waarimi wararuwalle ni mullopwana mmodda oohikhalla mamuno,’

²¹ (Vano mullupa mukuthooyo amullupellelle mutthiyanooyo ni mawu ootembelela wi), ‘Apwiya enitthattuse nnddina nawo wi nikhalle tembelelo variyari va mutundwaawo. Apwiya enyaallihe mukhoveni mwawo nave erukullwaawo yiipe.

²² Maaddi amatembelelwaalla evollowe m'mirimani mwawo, yiipihe erukullwaawo nave munyaalle mukhoveni mwawo.’ Vano mutthiyanooyo aakhullelle wi ‘Amen.’

²³ “Mullupa mukutho alembe munibukhuni matembelelo yaalla nave aathiimihe vawaaruweyani m'maaddini oowaawaalle.

²⁴ Mutthiyanooyo awirye maaddi oowaawaayo, maaddi amatembelelo, ophiyera evollowille m'mirimani mwaye wi oone ovoreya.

²⁵ Koma vawaamba mullupa mukutho avenyihemo m'mattani mwa mutthiyanooyo mukutho wa othu woovelleellella ehacheelle. Awutukhullelle muddullu vamiitthoni va Apwiya nave aweena vanikuwani.

²⁶ Mullupa mukuthooyo avahulle nnatta nimodda na othu nave awooselle vanikuwani wooniha wi mukutho muttheenooyo woovelleelliwa wa miyaano. Vatulli viwa amuvahe mutthiyanoolle maaddi wi awirye.

²⁷ Mutthiyana awirya maaddi, akhalla wi ahiiripiha apaalle akhalla wi kharoromelleye wa mamune, maaddi amatembelelwaalle eneerovollowa m'mirimani mwaye nave aneerewoona ovoreya. Erukullwaaye eneerewiipa mukhoveni mwaye muneeronyaalla nave nnddina naye nineerokhalla tembelelo variyari va mutundwaaye.

²⁸ Koma mutthiyanooyo akhalla wi khiiripihalle nave khachimwalle, khakhalla ni mullatu nave aneerekowora waayara anamwani.

²⁹ “Lamulonna tti na ehache. Mutthiyana aawiittaka vamiitthoni va mamune, iiripiha naari aari m'mattani mwa mamune,

³⁰ apaalle mullopwana aamba omukhallella mwaariye ehache amwiimese mwaariyooyo vamiitthoni va Apwiya nave mullupa mukutho amweerelle moollikana ni mmo lamulo ninallotelliiwa.

³¹ Mullopwana khakhalla ni mullatu koma mwaariye sika anaaphwanelle ollakiwa.”