Numeri 36 - Mawu a Mulluku

Ddoohallana dda atthiyana ootthelliwa

¹ Oohoollella a mabanja a edduullu dda Giliyadi mwaana a Makiri, mwaana a Manase a mabanja a edduullu dda Yosefe yaawa ellota ni Mose owaakattho oohoollella ni attekweene a mabanja a Aisraele.

² Alliwa yaallota wi, “Apwiya yahuulamulani nyuwaano apwiyaahu wi mwaavahe Aisraele ellapo mwawoombesa wi ekhalle yoohallaniiwa navettho Apwiya yahuulamulani wi mwaavahe ellapo ya mbalaahu Zelofehadi aniiwa aatthiyana wi ekhalle yoohallaniiwa.

³ Koma yatthelliwa ni allopwana a malloko mamodda a Aisraele, yoohallana ya anamwanaayo eneerovenyihiwa va yoohallana ya makhollwaahu ni woonjereriwa va yoohallana ya amamuniwaayo. Vano yoohallanaahu eneeroyeva.

⁴ Nave yaphiya Ehakallallo ya miyakha 50 yoohallaneeyo eneerewoonjereriwa va yoohallana ya nlloko na amamuniwa. Vano yoohallana ya atthiyanaayo eneerovenyihiwa va yoohallana ya makhollwaahu.”

⁵ Vano Mose ahaalamula Aisraele moollikana ni mawu a Apwiya wi, “Edduullu dda Yosefenndda ddinallota ddawoona.

⁶ Elamulalle Apwiya dda anamwani a Zelofehadi tti ddawi yaakhullelliwe otthelliwa ni mullopwana oyo enamupaalliwa akhalla a nlloko na makhollwiiwa.

⁷ Yoohallana ya Aisraele ehivenyihiwe mu nlloko na nimodda yavahiwa mu nlloko nimodda. Vawi arive Muisraele anaphwanella owannddeellella yoohallana ya makhollwaaye.

⁸ Arive mutthiyana oyo anaakhelle yoohallana mu nirive nlloko na Aisraele atthelliwe ni mmodda a nlloko na makhollwaaye. Arive Muisraele aneerewaakhella yoohallana ya makhollwaaye.

⁹ Sika yoohallana ya Aisraele ehivenyihiwe mu nlloko nimodda yavahiwa mu nlloko nimodda. Vawi arive Muisraele anaphwanella owannddeellella yoohallana ya makhollwaaye.”

¹⁰ Anamwani aatthiyana a Zelofehadi yaheera nnddo Apwiya emulamulalliiwa Mose.

¹¹ Mala, Tiriza, Hogola, Milika ni Nowa, anamwani aatthiyana a Zelofehadi yaatthelliwa ni anamwani a abaliiwa a attiitthiiwa.

¹² Yaatthelliwa ni edduullu dda Manase mwaana a Yosefe nave yoohallaniiwa yaavirellellave okhalla ya nlloko na makhollwiiwa.

¹³ Yaalla tti malamulo ni malangizo ayo Apwiya yaalamulalliiwa Aisraele oweella mwa Mose mu matapo a o Mowabu vakhuviru ni muhinje wa Yordani o Yeriko.