Numeri 35 - Mawu a Mulluku

Mizinda dda Alevi

¹ Apwiya yaamulleella Mose mu matapo a o Mowabu vakhuviru ni muhinje wa Yordani o Yeriko wi,

² “Waalamule Aisraele wi va mapuro ayo enaawaakhelliiwa wi ekhalle wonanko yoohallaniiwa, yaavahewo Alevi mizinda wi ekhallekemo. Nave mwaavahettho mapuro oochihella eziweto moowaapheella mizindannddo.

³ Mizindannddo ddikhalle ddayiwa wi ekhallekemo nave mapurwaayo enaakhalle oochihellamo eziweto ddiwa.

⁴ Mapuro oochihella eziweto a mizinda nnddo munaavaheenyu Alevi ekhalle a mamita 450 waapheella otte wa mpanda wa mizindannddo.

⁵ Mulinge otte wa mizindannddo, wookhuma nndduwa mamita 900, omwera mamita 900, woovollowa nndduwa mamita 900, ompoto mamita 900 nave muzindooyo okhalle variyari. Nipuro nenna ninaakhalle noochihella eziweto dda m'mizindani mwiwa.”

⁶ Mwaavahe Alevi mizinda mitthanu ni mmodda wi ddikhalle ddoothawellamo muthu amwiipha mukhwaaye moohidduwella. Woonjerera va ddennddo mwaavahettho mizinda 42.

⁷ Mizinda nnddo munaavaheenyu Alevi ddikhalle 48 vamodda. Orive muzinda okhalle ni nipuro niwa noochihella eziweto.

⁸ Mwaawaavahaka Aisraele mapuro yaalla wi ekhalle wonanko yoohallaniiwa, mukuse mizinda ddinchichi wa malloko muullupalli nave mizinda ddooyeva wa malloko mang'onong'ono. Nirive nlloko ninaavelleelle wa Alevaayo moollikana ni wunnuwa wa nipuro naakhenlliiwa.

Mizinda ddoothawellamo

⁹ Apwiya yaallota ni Mose wi

¹⁰ aalleelle Aisraele wi, “Mwaallapuwaka muhinje wa Yordani wi mwavollowe mu ellapo ya Kanani,

¹¹ mutthoolle mizinda ddimodda wi ddikhalle mizinda ddanyu ddoothawellamo muthu amwiipha mukhwaaye moohidduwella.

¹² Mizindannddo ddinaakhalle ddoomuthawellamo muthu oyo anapaalla ohokollosella ddoonanara wi muthu oyo amwiiphalle mukhwaaye moohidduwella ahiiphiwe ophiyera iipiwe mullatu.

¹³ Mizinda ddoothawellamo nnddo munaavaheenyu ddikhalle mitthanu ni mmodda.

¹⁴ Mwaavahe mizinda miraru wookhuma nndduwa wa muhinje wa Yordani ni mizinda miraru mu ellapo ya Kanani wi ddikhalle mizinda ddoothawellamo.

¹⁵ Mizinda mitthanu ni mmoddannddo ddinaakhalle ddoothawellamo Aisraele, alleto ni athu ookhalla variyari viwa wi arive muthu oomwiipha mukhwaaye moohidduwella athawellekewo.

¹⁶ “Koma muthu amuukutha mukhwaaye ni mukoko nave akhwa, sika wi olliyooyo tti muthu awiipha, olliyettho iiphiwe.

¹⁷ Muthu amuukutha mukhwaaye ni nlluku nave akhwa, sika wi olliyooyo tti muthu awiipha, olliyettho iiphiwe.

¹⁸ Apaalle muthu amuukutha mukhwaaye ni ekoonda yawi ttuumwiipha muthu nave akhwa, sika wi olliyooyo tti muthu awiipha, olliyettho iiphiwe.

¹⁹ Mbalaaye a awiiphiwooyo sika anaamwiiphe awiiphooyo akumanana.

²⁰ “Muthu amuhoma mukhwaaye ekaamba yawi tti mudanaaye apaalle amuhoma ni echida moomwiipitthella

²¹ apaalle amuukutha ni nnatta naye mwawiitanana nave mukhwaayooyo akhwa, sika wi olliyooyo tti muthu awiipha, olliyettho iiphiwe. Mbalaaye a awiiphiwooyo sika anaamwiiphe awiiphooyo akumanana.

²² “Koma muthu amuhoma mukhwaaye woohikhalla ekaamba yawi tti mudanaaye apaalle amuhoma mukhwaaye ni echida moohidduwella,

²³ apaalle moohimoona amupwesa ni nlluku nawi ttuumwiipha muthu naari ahiri mudanaaye nave ahimukhozekelle omuphoriiha,

²⁴ vaavo athu attheene yeeruze variyari va muthu awiiphooyo ni mbalaaye a awiiphiwooyo moollikana ni malangizo yaalla.

²⁵ Athu attheene emuvulluse oomwiipha mukhwaayooyo m'mattani mwa mbalaaye a awiiphiwooyo. Nave emuhokolloselle omuzindani woothawellawo nko athawenlleeye. Aneerokhalla wenko ophiyera mullupa mukutho muullupalli akhwille.

²⁶ Koma akhumella otte wa malire a muzinda oyo athawenlleeyemo erive enthawi

²⁷ nave mbalaaye a awiiphiwooyo amuphwanya amwiipha, khiipiwa mullatu woomwiipha muthu.

²⁸ Vallethi muthu anaphwanella okhalla mu muzinda oyo athawenlleeyemo ophiyera mullupa mukutho muullupalli akhwille. Mullupa mukuthooyo akhwa, oomwiipha mukhwaayooyo ttuuhokollweella owaniwa.

²⁹ “Yaalla ekhalle malamulo ni malangizo wa nyuwaano va mibado ddanyu ddittheddene orive weko munaakhallekeenyuwo.

³⁰ “Muthu mmodda amwiipha mukhwaaye, olliyooyo iiphiwettho amboni yavelleella omboniiwa. Koma muthooyo ahiiphiwe akhalla wi avelleelle ombonooyo tti muthu mmodda.

³¹ Woonjerera vaavo, muhaakhelle yoomoopollella muthu oyo amwiiphalle mukhwaaye. Koma olliye anaphwanella iiphiwe.

³² Nave muhaakhelle yoomoopollella muthu oyo ari m'muzindani woothawellawo wi ahokollweelle owaniwa mullupa mukutho muullupalli ahinakhwe.

³³ Muhiripihe ellapo eyo munakhalleenyu. Nikhame ninnaripiha ellapo nave tti woohiworeya woopolla ellapweeyo ekaamba ya nikhame nimorihiwe mwemmo ophiyera mumorihalle nikhame na muthu amorihalle nikhamooyo.

³⁴ Muhiripihe ellapo eyo munakhalleenyumo, ellapo eyo miyaanottho kinakhalleemimo. Valle miyaano kinnakhalla variyari va Aisraele.”