Numeri 34 - Mawu a Mulluku

Malire a ellapo ya Kanani

¹ Apwiya yaamulleella Mose wi

² aalamule Aisraele nave aalleelle wi, “Muhanlle vang'ono ovollowa mu ellapo ya Kanani. Ellapo yeeyo enaakhalle yoohallanaanyu nave maliriiwa tti,

³ echigawo yoomwera ya ellapwaanyu enaambeelle o echipululu ya Zini othwara malire a ellapo ya Edomu. Maliraanyu oomwera enaambeelle wookhuma nndduwa nko okomelle Enyanja Yookhwa.

⁴ Sika maliraanyu oomwera ewelle mwaango wa Akarabimu nave ellapuwelle o Zini okomella omwera wa Kadeshi Baranea. Vano ekhwaranyelle o Hazara Adara nave ephiye o Azimoni.

⁵ Nave ekhote o Azimoninko oya omuhinjeni wa o Iguputo nave yakomelle o enyanja.

⁶ “Maliraanyu a woovollowa nndduwa ekhalle Enyanja Yuullupalli ni museresere mwiwa. Yaalla sika malire a woovollowa nndduwa.

⁷ “Maliraanyu oompoto tti awi mulembelele malire waambeella o Enyanja Yuullupalli ophiya o mwaango wa Hori.

⁸ Ovenyera o mwaango wa Hori mulembelele malire ophiyera voovollowella mu Hamati nave wookomella maliraayo okhalle o Zedadi.

⁹ Vano maliraayo yaphiye o Zifuroni nave wookomella maliraayo okhalle o Hazarenani. Yaalla sika malire oompoto.

¹⁰ “Mulembelele maliraanyu a wookhuma nndduwa waambeella o Hazarenani ophiya o Shefamu.

¹¹ Ekitthe o Shefamu nave yaphiye o Ribula, wookhuma nndduwa wa Aini. Ekittheve ophiyera museresere mwa Enyanja ya Kinereti, wookhuma nndduwa.

¹² Ekitthevettho ophiya o muhinje wa Yordani nave yakomelle o Enyanja Yookhwa. “Yeeyo sika ellapwaanyu ni malire oowaapheella ellapweeyo.”

¹³ Mose ahaalamula Aisraele wi, “Yeella sika ellapo eyo munaakhelleenyu mwawoombesa wi ekhalle yaanyuyaanyu eyo Apwiya elamulalliiwa wi evahiwa wa malloko matthanu ni masese owaaka hafu.

¹⁴ Nlloko na Rubeni moollikana ni mabanjiiwa ni nlloko na Gadi moollikana ni mabanjiiwa ni hafu a nlloko na Manase yahaakhella khalle wonanko yoohallaniiwa.

¹⁵ Malloko meelli ni hafwaayo yahaakhella mapuro wi ekhalle wonanko yoohallaniiwa wookhuma nndduwa wa muhinje wa Yordani moowehana ni Yeriko.”

Oohoollella ayo enaakawe ellapo

¹⁶ Apwiya yaamulleella Mose wi,

¹⁷ “Mannddina a athu ayo enaawuukawelleni ellapweeyo wi ekhalle yaanyuyaanyu tti Eleazara ni Yoswa mwaana a Nuni.

¹⁸ Mumukuse ohoollella mmodda va nirive nlloko wi akawe ellapweeyo wi ekhalle yaanyuyaanyu.

¹⁹ “Mannddina a athwaayo tti Kalebe mwaana a Yefune a nlloko na Yuda,

²⁰ “Shemuele mwaana a Amihudi a nlloko na Simeoni,

²¹ Elidadi mwaana a Kisiloni a nlloko na Benjamini

²² ni Buki mwaana a Yogili a nlloko na Dani.

²³ “Mwa edduullu dda Yosefe, a nlloko na Manase akhalle Haniyeli mwaana a Efodi

²⁴ nave a nlloko na Efuremu akhalle Kemuwele mwaana a Shifutani.

²⁵ “Athu amodda tti Elizafani mwaana a Paranaki a nlloko na Zebuloni,

²⁶ Palatiele mwaana a Azani a nlloko na Isakara,

²⁷ Ahihudi mwaana wa Shelomi a nlloko na Ashere

²⁸ ni Pedahele mwaana a Amihudi a nlloko na Nafutali.”

²⁹ Yaalla sika Apwiya yalamulalliiwa wi yaakawelle Aisraele ellapo ya Kanani wi ekhalle yayiwayayiwa.