Numeri 31 - Mawu a Mulluku

Aisraele enaagonjiha Amidiyani

¹ Apwiya yaamulleella Mose wi,

² “Waahokolloselle ddoonanara Amidiyani ekaamba ya nnddo yaweerelliiwa Aisraele nave vatulli viwa oneerokhwa.”

³ Mose ahaalleella Aisraele wi, “Allopwana amodda variyari vanyumva ekhozekelle owana ni Amidiyani wi mwaahokolloselle ollaka wa Apwiya.

⁴ Mwaarumihe okhotoni athu 1,000 ovenyera mu nirive nlloko na Aisraele.”

⁵ Sika mwa Aisraele anchichaalle, Mose aarumihalle athu 1,000 ovenyera mu nirive nlloko nave attheene vamodda yaari 12,000.

⁶ Mose ahaarumiha athu 1,000 ovenyera mu nirive nlloko ni Finehasi mwaana a Eleazara atukhullalle ezipangizo dda o nipuro noopatuleya owaaka mapallapata m'mattani mwaye.

⁷ Aisraelaayo yaawana ni Amidiyani moollikana ni mmo Apwiya yamulamulelliiwa Mose nave yaawiipha allopwana attheene.

⁸ Yaawiipha mamwene matthanu a o Midiyani, Evi, Rekemu, Zuri, Huri ni Reba. Yaamwiiphattho ni nsupada Balamu mwaana a Beori.

⁹ Nave yahaaphara atthiyana a o Midiyani ni aniiwa ekhalla akaporo. Yahaakhattho eziweto ddiwa ni eyuumiiwa ettheene.

¹⁰ Yaahella munllo mizinda ddiwa ddittheddene ni misasa ddiwa.

¹¹ Yaakusa ddittheddene nnddo yaakhilliiwa okhotoninko, athu ni eziweto.

¹² Vano yaawaana akaporwaayo ni ddittheddene yaakhilliiwa wa Mose, wa Eleazara ni wa Aisraele attheene, omisasani dda o matapo a o Mowabu vakhuviru ni muhinje wa Yordani o Yeriko.

Ohokollowa wa akhoto

¹³ Mose ni Eleazara ni oohoollella mullokooyo yahaachingamella akhotwaayo otte wa misasa.

¹⁴ Mose aananariwa ni akhoto uullupalli, oohoollella akhoto a athu 1,000 navettho oohoollella a athu 100, ayo yavenyera okhotoni.

¹⁵ Mose ahaakoha wi, “Kaambiiwa tini mwaahiyalleenyu ni okumi atthiyana attheene?

¹⁶ Valle atthiyana yaalla yaathwara malangizo a Balamu vawaahollosani Aisraele wi eheerettho ddoororomelleya vamiitthoni va Apwiya o Peori wulle wawi mullilli waamorella athu attheene a Apwiya.

¹⁷ Sika vano muwiiphe asombwe attheene ni arive mutthiyana oyo akonillekevo ni mullopwana.

¹⁸ Koma anamwalli ayo ehinakonekevo ni mullopwana, mwaasunge wi ekhalle aanyu.

¹⁹ Vano arive muthu mwa nyuwaano oyo amwiiphalle muthu apaalle aattannyille mutembo, akhalle otte wa misasa mallapo matthanu ni meelli. Nave va nllapo naneeraru ni va nllapo naneetthanu ni piilli muddeellihe nyuwaano ni akaporwaanyu.

²⁰ Mweellihe erive yoowara, nirive nttapara nave erive ello yoopangiwa ovenyera o obweya wapuri apaalle ovenyera omuteekhoni.”

²¹ Vano Eleazara ahaalleella athu ayo yakelle okhotonaayo wi, “Lamulo nno Apwiya yamulamulalliiwa Mose tti nawi,

²² golide, siliva ni mikoko ddimodda,

²³ ddittheddene nnddo ddinaakhullella munllo, muddihiye viikho nave ddineereweellihiwa. Komave weellihiwettho ni maaddi aweellihella. Navettho erive ello eyo ehinaakhullella munllo, muyiruweye m'maaddini yaayo.

²⁴ Muchape ddoowara ddanyu va nllapo naneetthanu ni piilli nave muneereweellihiwa nave vatulli viwa muneerewaakhullelliwa ovollowa m'misasani.”

Okawana ddawaakha okhotoni

²⁵ Apwiya yaamulleella Mose wi,

²⁶ “We ni Eleazara ni oohoollella a mabanja a malloko, mweerenge ddawaakha okhotoni nnddo ewiilliiwana, athu ni eziweto.

²⁷ Nave mukawe ddawaakha okhotoninnddo ezigawo piilli, emodda ya athu yakelle okhotonaayo nave emodda ya Aisraele attheene oohalla.

²⁸ Va echigawo ya athu yakelle okhotonaayo, mukusevo echigawo wi ekhalle ya Apwiya, va ddirive ddawaakha okhotoni 500, mukusevo emodda va akaporo, va eng'ombe, va abulu, va enkhosa ni va epuri.

²⁹ Mukuse ddennddo va echigawo ya athu yakelle okhotonaayo nave mumuvahe Eleazara wi ddikhalle ddoovelleella wa Apwiya.

³⁰ Nave va echigawo ya Aisraele attheene oohalla, mukusevo yawaakha okhotoni emodda va ddirive ddawaakha okhotoni 50, mukusevo emodda va akaporo, va eng'ombe, va abulu, va enkhosa ni va epuri, mwaavahe Alevi ayo enapwatha musasa wa Apwiya.”

³¹ Vano Mose ni Eleazara yaheera nnddo Apwiya yamulamulalliiwa Mose.

³² Ddawaakha okhotoni ddoohalla nnddo akhoto yawiilleniiwa ddaari, enkhosa 675,000,

³³ eng'ombe 72,000,

³⁴ abulu 61,000

³⁵ ni anamwalli ayo ehinakonekevo ni mullopwana 32,000.

³⁶ Echigawo ya athu yakelle okhotoni yaari enkhosa ni epuri 337,500,

³⁷ mwa ddennddo 675 ddaari dda Apwiya.

³⁸ Eng'ombe ddaarivo 36,000 nave 72 ddaari dda Apwiya.

³⁹ Abulu yaarivo 30,500 nave 61 yaari a Apwiya.

⁴⁰ Akaporo yaarivo 16,000 nave 32 yaari a Apwiya.

⁴¹ Mose aavelleella wa Eleazara echigawo ya Apwiya moollikana ni mmo Apwiya yamulamulelliiwa Mose.

⁴² Mose aakawa ddawaakha okhotoni aavaha Aisraele echigawo emodda ya ddittheddene ddaakhiwe okhotoni.

⁴³ Vano echigawo ya Aisraele yaari enkhosa ni epuri 337,500,

⁴⁴ eng'ombe ddaarivo 36,000,

⁴⁵ abulu yaarivo 30,500,

⁴⁶ navettho akaporo yaarivo 16,000.

⁴⁷ Nave va echigawo ya Aisraele attheene aakusavo emodda va ddirive ddawaakha okhotoni 50 va akaporo, va eng'ombe, va abulu, va enkhosa ni va epuri, aavaha Alevi ayo enapwatha musasa wa Apwiya moollikana ni mmo Apwiya yamulamulalliiwa Mose.

⁴⁸ Uullupalli a akhoto, oohoollella akhoto a athu 1,000 navettho oohoollella a athu 100, yaawa wa Mose.

⁴⁹ Nave yaamulleella wi, “Hi awuurumeyellani nooweerenga akhoto ayo ninaalamulelleehu nave khaavo naari mmodda aramillevo.

⁵⁰ Sika hiyaano noowa wa Apwiya ni ddoovelleella nnddo arive muthu aakhilleeye monga dda golide, ebangili, ogufu, emphete, endolo ni mikhova wi ddikhalle ddaweerella mutetho woopepesella machimo vamiitthoni va Apwiya.”

⁵¹ Mose ni Eleazara yaamwaakhella golide wa oohoollellaayo ni ddeko ddimodda ddittheddene.

⁵² Golide muttheene oyo yamuvelleelliiwa wa Apwiya aari oollemella makilogaramu 200.

⁵³ Arive akhoto aari akusalle ddaye ddaaye dda ddawaakha okhotoni.

⁵⁴ Vano Mose ni Eleazara yaamwaakhella golidooyo wa oohoollella a akhoto emuhiya mu musasa wamutthukumano vamiitthoni va Apwiya wi ewuupuwelleke Aisraele.