Numeri 29 - Mawu a Mulluku

Mikutho dda Ehakallallo ya Muyakha Wanaanweene

¹ “Va nllapo nawaamba na mweeri waneetthanu ni piilli, mweereke mutthukumano woopatuleya nave muhiphareke mitteko. Nllapo nenna mwiipeke mapallapata.

² Nave muvelleelle mukutho wooshellelliha, wa nthuko nawaaddivella Apwiya. Nave okhalleke wa anankhoro a asaanaang'ombe eelli, nankhoro a enkhosa emodda, anankhoro a asaanaankhosa atthanu ni eelli a muyakha mmodda, ddittheddene ddikhalle ddoohirakalla.

³ Mukutho wa othu okhalleke wa othu waphaama woottakanyihera ni makhura wookwakhwana makilogaramu mararu va erive eng'ombe. Muvelleellettho othu waphaama woottakanyihera ni makhura wookwakhwana makilogaramu meelli va arive nankhoro a enkhosa

⁴ ni othu waphaama woottakanyihera ni makhura wookwakhwana ekilogaramu emodda va arive mwaanaankhosa.

⁵ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu.

⁶ Muvelleelle ddittheddenenndda woonjerera va mukutho wooshellelliha ni mukutho wa othu woovelleelliwa nllapo nawaamba na mweeri navettho va mikutho dda nllapo ni nllapo, ddooshellelliha, dda othu ni dda yoowirya moollikana ni mutethwiiwa wi ddikhalle mikutho ddawoosiwa viikho, dda nthuko nawaaddivella Apwiya.

Mikutho dda va nllapo noopepesella machimo

⁷ “Va Nllapo na khumi na mweeri waneetthanu ni piilli yoolla mweereke mutthukumano woopatuleya, muhalleke ocha nave muhiphareke mutteko.

⁸ Nave muvelleelle mukutho wooshellelliha, wa nthuko nawaaddivella Apwiya. Nave okhalleke wa anankhoro a asaanaang'ombe eelli, nankhoro a enkhosa emodda, anankhoro a asaanaankhosa atthanu ni eelli a muyakha mmodda, ddittheddene ddikhalle ddoohirakalla.

⁹ Mukutho wa othu okhalleke wa othu waphaama woottakanyihera ni makhura wookwakhwana makilogaramu mararu va erive eng'ombe. Muvelleellettho othu waphaama woottakanyihera ni makhura wookwakhwana makilogaramu meelli va arive nankhoro a enkhosa,

¹⁰ ni othu waphaama woottakanyihera ni makhura wookwakhwana ekilogaramu emodda va arive mwaanaankhosa.

¹¹ Mumuvelleellettho nankhoro a epuri mmodda wi akhalle mukutho woopepesella machimo woonjerera va mukutho mmodda woopepesella machimoolle navettho va mikutho dda nllapo ni nllapo, ddooshellelliha, dda othu ni dda yoowirya.”

Mikutho dda Ehakallallo ya Misasa

¹² “Va nllapo na 15 na mweeri waneetthanu ni piilli, mweere mutthukumano woopatuleya, muhiphareke mutteko nave mweereke ehakallallo yowaariiha Apwiya mallapo matthanu ni meelli.

¹³ Nave muvelleelle mukutho wooshellelliha, wawoosiwa viikho, wa nthuko nawaaddivella Apwiya. Nave okhalleke wa anankhoro a asaanaang'ombe khumi ni raru, anankhoro a enkhosa eelli, anankhoro a asaanaankhosa khumi ni sese a muyakha mmodda, ddittheddene ddikhalle ddoohirakalla.

¹⁴ Mukutho wa othu okhalleke wa othu waphaama woottakanyihera ni makhura wookwakhwana makilogaramu mararu va erive eng'ombe. Muvelleellettho othu waphaama woottakanyihera ni makhura wookwakhwana makilogaramu meelli va arive nankhoro a enkhosa,

¹⁵ ni othu waphaama woottakanyihera ni makhura wookwakhwana ekilogaramu emodda va arive mwaanaankhosa.

¹⁶ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu. Muvelleelle ddittheddenenndda woonjerera va mikutho dda nllapo ni nllapo, ddooshellelliha, dda othu ni dda yoowirya.

¹⁷ “Va nllapo naneepiilli mwaavelleelle anankhoro a asaanaang'ombe khumi ni eelli, anankhoro a enkhosa piilli, anankhoro a asaanaankhosa khumi ni asese a muyakha mmodda, ddittheddene ddikhalle ddoohirakalla.

¹⁸ Muvelleellettho mukutho wa othu ni wa yoowirya va anankhoro a eng'ombe, va anankhoro a enkhosa ni va asaanankhosaalle moollikana ni echiwerengero ya enamannddo ni malangizwiiwa.

¹⁹ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu. Muvelleelle ddittheddenenndda woonjerera va mikutho dda nllapo ni nllapo, ddooshellelliha, dda othu ni dda yoowirya.

²⁰ “Va nllapo naneeraru mwaavelleelle anankhoro a asaanaang'ombe khumi ni mmodda, anankhoro a enkhosa piilli, anankhoro a asaanaankhosa khumi ni asese a muyakha mmodda, ddittheddene ddikhalle ddoohirakalla,

²¹ Muvelleellettho mukutho wa othu ni wa yoowirya va anankhoro a eng'ombe, va anankhoro a enkhosa ni va asaanankhosaalle moollikana ni echiwerengero ya enamannddo ni malangizwiiwa.

²² Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu. Muvelleelle ddittheddenenndda woonjerera va mikutho dda nllapo ni nllapo, ddooshellelliha, dda othu ni dda yoowirya.

²³ “Va nllapo naneesese mwaavelleelle anankhoro a asaanaang'ombe khumi, anankhoro a enkhosa piilli, anankhoro a asaanaankhosa khumi ni asese a muyakha mmodda, ddittheddene ddikhalle ddoohirakalla,

²⁴ Muvelleellettho mukutho wa othu ni wa yoowirya va anankhoro a eng'ombe, va anankhoro a enkhosa ni va asaanankhosaalle moollikana ni echiwerengero ya enamannddo ni malangizwiiwa.

²⁵ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu. Muvelleelle ddittheddenenndda woonjerera va mikutho dda nllapo ni nllapo, ddooshellelliha, dda othu ni dda yoowirya.

²⁶ “Va nllapo naneetthanu mwaavelleelle anankhoro a asaanaang'ombe atthanu ni asese, anankhoro a enkhosa piilli, anankhoro a asaanaankhosa khumi ni asese a muyakha mmodda, ddittheddene ddikhalle ddoohirakalla,

²⁷ Muvelleellettho mukutho wa othu ni wa yoowirya va anankhoro a eng'ombe, va anankhoro a enkhosa ni va asaanankhosaalle moollikana ni echiwerengero ya enamannddo ni malangizwiiwa.

²⁸ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu. Muvelleelle ddittheddenenndda woonjerera va mikutho dda nllapo ni nllapo, ddooshellelliha, dda othu ni dda yoowirya.

²⁹ “Va nllapo naneetthanu ni nimodda mwaavelleelle anankhoro a asaanaang'ombe atthanu ni araru, anankhoro a enkhosa piilli, anankhoro a asaanaankhosa khumi ni asese a muyakha mmodda, ddittheddene ddikhalle ddoohirakalla,

³⁰ Muvelleellettho mukutho wa othu ni wa yoowirya va anankhoro a eng'ombe, va anankhoro a enkhosa ni va asaanankhosaalle moollikana ni echiwerengero ya enamannddo ni malangizwiiwa.

³¹ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu. Muvelleelle ddittheddenenndda woonjerera va mikutho dda nllapo ni nllapo, ddooshellelliha, dda othu ni dda yoowirya.

³² “Va nllapo naneetthanu ni piilli mwaavelleelle anankhoro a asaanaang'ombe atthanu ni eelli, anankhoro a enkhosa piilli, anankhoro a asaanaankhosa khumi ni asese a muyakha mmodda, ddittheddene ddikhalle ddoohirakalla,

³³ Muvelleellettho mukutho wa othu ni wa yoowirya va anankhoro a eng'ombe, va anankhoro a enkhosa ni va asaanankhosaalle moollikana ni echiwerengero ya enamannddo ni malangizwiiwa.

³⁴ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu. Muvelleelle ddittheddenenndda woonjerera va mikutho dda nllapo ni nllapo, ddooshellelliha, dda othu ni dda yoowirya.

³⁵ “Va nllapo naneetthanu ni raru mukhalleke ni mutthukumano woopatuleya nave muhiphareke mutteko,

³⁶ Nave muvelleelle mukutho wooshellelliha, wawoosiwa viikho, wa nthuko nawaaddivella Apwiya. Nave okhalleke wa anankhoro a asaanaang'ombe eelli, nankhoro a enkhosa emodda, anankhoro a asaanaankhosa atthanu ni eelli a muyakha mmodda, ddittheddene ddikhalle ddoohirakalla.

³⁷ Muvelleellettho mukutho wa othu ni wa yoowirya va anankhoro a eng'ombe, va anankhoro a enkhosa ni va asaanankhosaalle moollikana ni echiwerengero ya enamannddo ni malangizwiiwa.

³⁸ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu. Muvelleelle ddittheddenenndda woonjerera va mikutho dda nllapo ni nllapo, ddooshellelliha, dda othu ni dda yoowirya.

³⁹ “Ddennddo sika munaavelleelleenyu wa Apwiya va mallapo ootthoolliwa a ehakallallo, woonjerera va ddoovelleella ddanyu nnddo mullupenlleenyu apaalle va ddoovelleella dda opaalla wanyu, mikutho ddanyu ddooshellelliha, dda othu, dda yoowirya ni dda eyaattano.”

⁴⁰ Vano Mose ahaalleella Aisraele ddittheddene moollikana ni mmo Apwiya yamulamulelliiwa.