Numeri 28 - Mawu a Mulluku

Mikutho dda nllapo ni nllapo

¹ Apwiya yaamulleella Mose wi

² aalamule Aisraele wi, “Mooneseseke wi munnavelleella munthawini mwiwa wa miyaano ddoovelleella ddaka, yoochaaka ya mikutho ddawoosiwa viikho dda nthuko nookiddivella.

³ “Nave waalleelle wi mukutho wawoosiwa viikho wawi muvelleelleke wa Apwiya nllapo ni nllapo tti anankhoro a eelli a asaanaankhosa a muyakha mmodda oohirakalla.

⁴ Mwaanaankhosa mmodda mumuvelleelleke ohinase nave mmodda misikuwa.

⁵ Muvelleelleke ekilogaramu emodda ya othu waphaama woottakanyihera ni lita nimodda na makhura.

⁶ Olla sika mukutho wooshellelliha walamuliwe ni Apwiya va mwaango wa Sinai wi okhumihe nthuko nawaaddivella, mukutho wawoosiwa viikho, woovelleelliwa wa Apwiya.

⁷ Vamodda ni erive enkhosa, mukutho wayoowirya ekhalle lita nimodda. Vanipuroni noopatuleya mumwiithellekevo vinyo oowalli omuvelleella wa Apwiya.

⁸ Vano waamuvelleellaka mwaanaankhosa aneepiillooyo misikuwa oweekena ni muyezo woophwanaphwana wa othu, makhura ni vinyo wonanko ohinase. Ddennddo ddikhalle mukutho wa nthuko nookiddivella, wawoosiwa viikho wa mi Apwiya.

Mikutho dda va nllapo na Sabata

⁹ “Va nllapo na Sabata mwaavelleelleke anankhoro a asaanaankhosa eelli oohirakalla. Muvelleellekettho makilogaramu meelli a othu waphaama woottakanyihera ni makhura wi okhalle mukutho wa othu nave muvelleellekettho mukutho wayoowirya.

¹⁰ Olla sika mukutho wooshellelliha wa nirive nllapo na Sabata woonjerere va mikutho ddooshellelliha ni dda ddoowirya ddoovelleelliwa nllapo ni nllaponndde.

Mukutho wa nllapo nawaamba na mweeri

¹¹ “Va nllapo nawaamba na orive mweeri, muvelleelleke wa Apwiya mukutho wooshellelliha. Mukuthooyo okhalleke wa anankhoro a asaanaang'ombe eelli, nankhoro a enkhosa emodda ni anankhoro a asaanaankhosa atthanu ni eelli a muyakha mmodda, ddittheddene ddikhalleke ddoohirakalla.

¹² Mukutho wa othu okhalleke wa othu waphaama woottakanyihera ni makhura wookwakhwana makilogaramu mararu va erive eng'ombe. Muvelleellettho othu waphaama woottakanyihera ni makhura wookwakhwana makilogaramu meelli va arive nankhoro a enkhosa

¹³ ni othu waphaama woottakanyihera ni makhura wookwakhwana ekilogaramu emodda va arive mwaanaankhosa. Olla sika mukutho wooshellelliha, wawoosiwa viikho wa nthuko nawaaddivella Apwiya.

¹⁴ Mukutho wayoowirya ekhalleke vinyo ookwakhwana malita meelli va arive nankhoro a eng'ombe, vinyo ookwakhwana lita nimodda ni hafu va arive nankhoro a enkhosa ni vinyo ookwakhwana lita nimodda va arive mwaanaankhosa. Olla sika mukutho wooshellelliha wa orive wooneya wa mweeri vamuyakhani.

¹⁵ Mumuvelleellekettho nankhoro a epuri wi okhalle mukutho woopepesella machimo, woovelleella wa Apwiya. Mumuvelleelle woonjerera va mikutho dda nllapo ni nllapo, ddooshellelliha ni ddoowirya.

Paska ni Ehakallallo ya Buledi Oohikhalla ni Yisiti

¹⁶ “Va nllapo na 14 misikuwa na mweeri wawaamba, tti nllapo na Paska a Apwiya.

¹⁷ Nave va nllapo na 15 na mweeri yooyo tti nllapo nawaamba Ehakallallo ya Buledi Oohikhalla ni Yisiti. Va mallapo matthanu ni meelli mumucheke buledi oohikhalla ni yisiti.

¹⁸ Va nllapo nawaamba na ehakallallo mweere mutthukumano woopatuleya nave muhiphareke mutteko.

¹⁹ Koma muvelleelleke mukutho wawoosiwa viikho, mukutho wooshellelliha wa Apwiya. Nave okhalleke wa anankhoro a asaanaang'ombe eelli, nankhoro a enkhosa emodda ni asaanaankhosa atthanu ni eelli a muyakha mmodda, ddittheddene ddikhalleke ddoohirakalla.

²⁰ Mukutho wa othu okhalleke wa othu waphaama woottakanyihera ni makhura wookwakhwana makilogaramu mararu va erive eng'ombe. Muvelleellettho othu waphaama woottakanyihera ni makhura wookwakhwana makilogaramu meelli va arive nankhoro a enkhosa

²¹ ni othu waphaama woottakanyihera ni makhura wookwakhwana ekilogaramu emodda va arive mwaanaankhosa.

²² Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu.

²³ Muvelleelleke ddenndda woonjerera va mikutho ddooshellelliha dda nllapo ni nllapo ddoovelleelliwa ohinase.

²⁴ Sika va mallapo matthanu ni meelli muvelleelleke nllapo ni nllapo mukutho wawoosiwa viikho, wa nthuko nawaaddivella Apwiya. Mumuvelleelle woonjerera va mikutho dda nllapo ni nllapo, ddooshellelliha ni ddoowirya.

²⁵ Nllapo naneetthanu ni piilli tti nllapo na mutthukumano woopatuleya, muhiphare mutteko.

Mikutho dda va Ehakallallo ya Ddoohata Ddawaamba

²⁶ “Va nllapo nawaamba na Ehakallallo ya Ddoohata Ddawaamba, Ehakallallo ya Milungu, muvelleelleke wa Apwiya mukutho wa tirigu musha, mweereke mutthukumano woopatuleya nave muhiphareke mutteko.

²⁷ Nave muvelleelleke mukutho wooshellelliha, wa nthuko nawaaddivella Apwiya. Nave okhalleke wa anankhoro a asaanaang'ombe eelli, nankhoro a enkhosa emodda ni asaanaankhosa atthanu ni eelli a muyakha mmodda, ddittheddene ddikhalleke ddoohirakalla.

²⁸ Mukutho wa othu okhalleke wa othu waphaama woottakanyihera ni makhura wookwakhwana makilogaramu mararu va erive eng'ombe. Muvelleellettho othu waphaama woottakanyihera ni makhura wookwakhwana makilogaramu meelli va arive nankhoro a enkhosa

²⁹ ni othu waphaama woottakanyihera ni makhura wookwakhwana ekilogaramu emodda va arive mwaanaankhosa.

³⁰ Mumuvelleellettho nankhoro a epuri mmodda wi akhalle mukutho waweerella mutetho woopepesella machimwaanyu.

³¹ Muvelleelleke ddenndda ni ddoovelleella dda yoowirya woonjerera va mikutho dda nllapo ni nllapo, ddooshellelliha ni dda othu. Moonesese wi enamannddo ddihikhalle ddoorakalla.