Numeri 27 - Mawu a Mulluku

Anamwani aatthiyana a Zelofehadi

¹ Vano yaawa anamwani aatthiyana a Zelofehadi ovenyera mu nibanja nimodda na nlloko na Manase. Zelofehadi aari mwaana a Hefere, mwaana a Giliyadi, mwaana a Makiri, mwaana a Manase, mwaana a Yosefe. Anaaye aatthiyana yaari Mala, Nowa, Hogola, Milika ni Tiriza.

² Alliwaayo yahiimella va mullako wa musasa wamutthukumano vamiitthoni va Mose, Eleazara, oohoollella nave va athu attheene, ellota wi,

³ “Attiitthiihu yaakhwella muchipululuni. Alliwa kheyaari nimodda ni mulloko olle watthukumanne ni Kora vawaawukilani Apwiya. Alliwa yakhwille ekaamba ya machimo ayiwayiwa. Koma kheyaari ni anamwani aallopwana.

⁴ Ethiyo nnddina na attiitthiihu nikhwe ekaamba yawi kheyaarina mwaana aamullopwana? Munivahe mapuro variyari va abaliiwa a attiitthiihu.”

⁵ Mose aayaana mullatu yoolla vamiitthoni va Apwiya.

⁶ Vano Apwiya yaamulleella Mose wi,

⁷ “Anamwani aatthiyana a Zelofehadaayo enallota ddawoona. Waakawelle nipuro wi nikhalle yoohallaniiwa variyari va abaliiwa a attiitthiiwa. Owinnye nipuro na attiitthiiwa wi nikhalle yoohallaniiwa.

⁸ Nave waalleelle Aisraele wi ‘Muthu akhwa oohikhalla ni mwaana aamullopwana, yoohallanaaye ekhalle ya mwanaye aamutthiyana.

⁹ Akhalla wi khanna mwaana aamutthiyana, yoohallanaaye ekhalle ya asinne.

¹⁰ Akhalla wi khanna asinne, yoohallanaaye ekhalle ya asinniwa a attiitthinnya.

¹¹ Attiitthinnyaayo yaahikhalla ni asinniwa, nipuro nayenno omuvahe mbalaaye mmodda a mu nibanja naye nave ninaakhalle yoohallanaaye. Yaayo ekhalle malamulo ni malangizo wa Aisraele moollikana ni mmo Apwiya yamulamulelliiwa Mose.’ ”

Otthoolliwa wa Yoswa ovollowa munipuroni na Mose

¹² Apwiya yaamulleella Mose wi, “Owelle va mwaango wa Abarimu, woone ellapo eyo kinaavaheemi Aisraele.

¹³ Vano wayoona, vatulli viwa oneerokhwa wonanko mmo eerelle mwanamunno Aroni.

¹⁴ Vawi khamwiiwellelle mawaaka mu echipululu ya Zini va enthawi eyo mulloko wuuwukilalleewani o maaddi a Meriba, mwahoonihalleenyu vamiitthoni viwa wi miyaano tti aweella.” Yaalla tti maaddi a neetuutu a Meriba o Kadeshi mu echipululu ya Zini.

¹⁵ Mose ahaaveka Apwiya wi,

¹⁶ “Nyu Apwiya, aneena okumi wa athu attheene, mumutthoolle muthu wi awehereke mullokoolla.

¹⁷ Muthooyo aahoollelleke vakhotoni nave aalamulelleke wi mullokwaanyu ohikhalle wonanko enkhosa ddoohikhalla ni mbusa.”

¹⁸ Apwiya yaamulleella Mose wi, “Mukuse Yoswa, mwaana a Nuni, muthu oyo ari ni murima waphaama nave omwiiyaatthi matta.

¹⁹ Omwiimese vamiitthoni va Eleazara ni va athu attheene, vano omwinnye odindwaawo alliwa yoonaka.

²⁰ Omukawelle olamulellwaawo wi Aisraele attheene omwiiwellelleke.

²¹ Vano aneerekoya wa Eleazara oyo anaamulleelleke nnddo Apwiya enapaalliiwa mwawoombesa voopharihani mutteko Urimu ni Tumimu.* Mmu sika anaamuhoollellekeeye Yoswa ni Aisraele attheene.”

²² Mose aheera moollikana ni mmo Apwiya yamulamulelliiwa. Aamukusa Yoswa amwiimesa vamiitthoni va Eleazara ni va athu attheene.

²³ Vano aamwiiyaatthi matta, amwinnya odindo moollikana ni mmo yamulangizelle Apwiya.