Numeri 25 - Mawu a Mulluku

Aisraele o Peori

¹ Aisraele eri o Shitimu, allopwana yahaamba oraruwa ni atthiyana a o Mowabu.

² Atthiyanaayo yaanawiithana omikuthoni dda milluku ddiwa. Vano yaanachana ni ollapella milluku ddiwannddo.

³ Sika Aisraele yaamullapellana Baala Peori nave Apwiya yahaashella murima.

⁴ Vano Apwiya yaamulleella Mose wi, “Waakuse oohoollella a Aisraele nave owiiphe vamiitthoni vaka nndduwa noopaka wi kihiye waashella murima.”

⁵ Vano Mose ahaalleella aweeruza a Aisraele wi, “Arive muthu a nyuwaano awiiphe athwaaye ayo yamullapenllena Baala Peori.”

⁶ Vano Muisraele mmodda aawaana onibanjani waye mutthiyana a o Midiyani, Mose ni Aisraele attheene yoonaka va enthawi eyo yunlliiwa va mullako wa musasa wamutthukumano.

⁷ Finehasi mwaana a Eleazara, edduullu ya Aroni, oonille ddennddo aavenya ahiya mullokooyo nave akusa nivaka.

⁸ Vano aamuthwara Muisraeloolle ophiyera aavollowa mu echipinda ya muwari, aahoma vamodda eelliinaayo vamirimani. Sika mullilli wawoononga Aisraele waamalla.

⁹ Koma athu 24,000 yaari ekhwille khalle ni mullillooyo.

¹⁰ Apwiya yaamulleella Mose wi,

¹¹ “Finehasi mwaana a Eleazara, edduullu ya Aroni, ookihiiha wi kihiwoononge Aisraele ekaamba yawi khaakhullenlle wi arive muthu amullapelleke mulluku mmodda koma miyaano. Sika ekaambiiwa kahiwoonongilleemi kishille murima.

¹² Vano omulleelle wi kinnapanganana echipangano yamurendelle.

¹³ Kinapangana ni olliyoolla ni edduullu ddaye ddittheddene, echipangano yookhalla allupa mukutho wa enthawi yoohimalla ekaamba yawi khaakhullenlle wi muthu amullapelleke mulluku mmodda koma miyaano, Mulluku nave aaphara mutteko woopepesella machimo a Aisraele.”

¹⁴ Muisraele olle iiphiwe vamodda ni mutthiyana a o Midiyani aari Zimiri mwaana a Salu, oohoollella a nibanja na nlloko na Simeoni.

¹⁵ Nave mutthiyana iiphiwoolle aari Kozibi mwaana a Zuri, oohoollella a nibanja nimodda na Amidiyani.

¹⁶ Apwiya yaamulleella Mose wi,

¹⁷ “Owane ekhoto ni Amidiyani navettho owoononge.

¹⁸ Yaalla yaaweerellani ddoonanara vawuullekani o Peori navettho ekaamba ya mwaha wa murokoriwa Kozibi, mwaana a oohoollella a o Midiyani oyo iiphiwe va enthawi ya mullilli ekaamba ya nndde ddeereyille o Peori.”