Numeri 24 - Mawu a Mulluku

¹ Balamu oonilleeye wi ddaari ddawaahakallalliha Apwiya wi yaadalise Aisraele, khaayiillewo onipuroninko mmo eerelleeye enthawi ddimoddanndde wi akohe ni wi adduwelle nnddo Mulluku anapaalleeye sika aarukunuwa anaweha ochipululuni.

² Aawoona Aisraele eri m'misasani mwiwa, nirive nlloko vaweekhiiwa. Vano munepa wa Mulluku waamukitthella.

³ Vano ahaamba ollotella wi, “Mawu a Balamu mwaana a Beori, mawu a oyo miitthwaaye tti oohulleya,

⁴ mawu a oyo aniiwa mawu a Mulluku, oyo anamoona Mulluku m'masomphenya, oyo aniikuha miitthwaaye eri ookhunuuwa.

⁵ Misasa ddawo tti ddooreera, Yakobo enyumba ddawo tti ddaphaama, Israele.

⁶ Ddiri wonanko matapo oorekama, wonanko emata dda mukhwipi mwa muhinje, wonanko ddoomella dda aloe* ddawaalliwa ni Apwiya, wonanko miteekho ddamukunguza mukhwipi mwa maaddi.

⁷ Maaddi eneerekottekhuma mu ddoorikella maaddi ddawo mmiddwaawo oneerokhalla ni maaddi manchichi. Mwenaawo aneerovuwa omukhwaranya Agagi nave omwenaaye oneerowellihiwa.

⁸ Mulluku ahaakhumiha mu Iguputo. Okhalla ni masiva wonanko enari. Aneerewiipha mitundu dda adanaaye, aneeropwesa makhuviiwa, aneerewaaphovolla ni mipaamba ddaye.

⁹ Israele ahiitta akonaatthi vatthi wonanko mukango, waamullopwana apaalle waamutthiyana. Ethiyo anaamuvenyihe ttaani? Oodala tti muthu oyo anuudalise ootembeleliwa tti muthu oyo anuutembelele.”

¹⁰ Vano Balaki aamushella murima Balamu, oopa m'mattani. Vano Balaki aamulleella Balamu wi, “Kawiithanilleni wi mwaatembelele adanaaka koma nyuwaano mohaadalisa olendo orarwiine.

¹¹ Ekaamba ya yeella venyanivoni, rowakani. Kahuulleellani wi kineerewuuriihani wunchichi koma Apwiya ahuulephelihani wi kuuriiheni.”

¹² Balamu aamwaakhulla Balaki wi, “Ethiyo amithenga mwaarumalleenyu wa miyaanwaalle ngaawaalleellille wi,

¹³ ‘Naari Balaki akivahilleke enyumbaaye yooddalla ni siliva owaaka golide, ngiwora weera naari vang'ono ddoohiyana ni nnddo Apwiya ekilamulalliiwa. Kinaallote ddennddove Apwiya enaakilleelliiwa?’ ”

Ollotella wookomihera wa Balamu

¹⁴ Balamu aamulleella Balaki wi, “Vano kinimarowa wa athwaaka. Koma vano kinaaka kuulleelleni nnddo Aisraele enaaweerelliiwa athwaanyu mallapo enawaalla.”

¹⁵ Vano Ahaamba ollotella wi, “Mawu a Balamu mwaana a Beori, mawu a oyo miitthwaaye tti oohulleya.

¹⁶ Mawu a oyo aniiwa mawu a Mulluku Amasiva Mattheene, oyo anamoona Mulluku m'masomphenya, oyo aniikuha miitthwaaye eri ookhunuuwa.

¹⁷ Kinooneemi ddiri muhoollo, kinaweheemi ddiri woorekamella. Mwene aneerokhuma mwa Yakobo, wonanko etheneeri aneerokhuma mwa Israele. Aneerewaanyenya oohoollella a Amowabu eneerewaagonjiha athu a Seti.

¹⁸ Ellapo ya Edomu eneerewaakhiwa, mudani Seiri aneerogonjihiwa Koma Israele aneeropambana.

¹⁹ Mwa Yakobo muneerokhalla mwene, oyo anaawoononge oohalla m'muzindani.”

²⁰ Vano Balamu aamoona m'masomphenya Amaleke, aamba ollotella wi, “Amaleke aari awaamba va mitundu ddittheddene, koma wookomella wiwa oneerewoonongeya.”

²¹ Vatulli viwa aawoona Akeni, aamba ollotella wi, “Naari mapuro munakhalleenywaayo tti amurendelle, wonanko emphuru yoomakiwa vanllukuni,

²² koma nyu Akeni muneerewoonongeya, Aashuri yuupharani okaporo.”

²³ Balamu aavirellella ollotella wi, “Haa! Ttaani anaakhalle ni okumi Mulluku eera ddenndda?

²⁴ Esitima ddawa ovenyera o Kitimu, ddineeromoononga Ashuri ni Eberi, Kitimuttho aneerewoonongiwa.”

²⁵ Vano Balamu aatimulla anarowa. Balaki aarowattho.