Numeri 23 - Mawu a Mulluku

¹ Vano Balamu aamulleella Balaki wi, “Mukimakelle makuwa matthanu ni meelli vaava nave mukikhozelle anankhoro a eng'ombe dditthanu ni piilli owaaka anankhoro a enkhosa dditthanu ni piilli.”

² Balaki aheera moollikana ni mmo amulleellelleeye Balamu. Nave Balaki ni Balamu yaaheraatthi va nirive nikuwa nankhoro mmodda a eng'ombe ni nankhoro mmodda a enkhosa.

³ Vano Balamu aamulleella Balaki wi, “Mwiimelle vakhuviru ni mukuthwaanyu wooshellelliha nave miyaano kiyeewo apaalle Apwiya ttuuwa ni okumana ni miyaano. Erive ello enaakoonihelliiwa kineerewuulleellani.” Sika aaya va nipuro noollapellawo.

⁴ Vano Mulluku aakumana ni Balamu nave Balamu aallota wi, “Koomaka makuwa matthanu ni meelli nave va nirive nikuwa kooheraatthivo mukutho wa nankhoro a eng'ombe ni wa nankhoro a enkhosa.”

⁵ Vano Apwiya yaamulleella Balamu wi, “Hokollweella wa Balaki wamulleelle nnddo kinuulleelleemi.”

⁶ Sika Balamu aahokollweella wa Balaki, amuphwanya olliye ni oohoollella attheene a Amowabu yiimellille vakhuviru ni mukuthwaaye wooshellelliha.

⁷ Vano Balamu ahaamba ollotella wi, “Balaki mwene a o Mowabu ookiithana ovenyera o Siriya, omiyaangoni dda wookhuma nndduwa wi, ‘Waawoni mumutembelele Yakobo munipuroni mwaka, waawoni mumwaashere Israele ddoonanara.’

⁸ Koma ethiyo kinaawore mwawiidde omutembelela oyo Mulluku ahimutembelenlleeye? Ethiyo kinaawore mwawiidde omwaashera ddoonanara oyo Apwiya ehimwaashenriiwa ddoonanara?

⁹ Kinawoona ovenyera vaddullu va miyaango, Kinaweha ovenyera va asimiyaango. Alliwa tti athu ookhalla vaweekhiiwa, oohiddeerengelle ni athu a mitundu ddimodda.

¹⁰ Ttaani anaawore weerenga edduullu dda Yakobo, nnddo ddiri ddawaata wonanko nthupi apaalle weerenga ezigawo ddisese dda athu a Israele? Kihiyeni kikhwe okhwa wa athu oolungama, omalla waka okhalle wonanko wa yaayo.”

¹¹ Balaki aamukoha Balamu wi, “Mukeerenlle ddawiidde? Kawiithanilleni wi mwaatembelele adanaaka koma munipuroni mwiwa mohaadalisa.”

¹² Olliye ahaakhulla wi, “Ethiyo mi nginaphwanella ollota ddennddove ekilleelle Apwiya?”

Ollotella waneepiilli wa Balamu

¹³ Balaki aamulleella Balamu wi, “Hankoni nithaanane onipuroni nko munaaworeenyu woona embali emodda ya misasa ddinchichi dda Aisraele. Vano ovenyera vaavo mwaatembelele munipuroni mwaka.”

¹⁴ Sika Balaki aamukusella Balamu o Zofimu vaddullu va mwaango wa Pisiga, emakavo makuwa matthanu ni meelli, eheraatthi va nirive nikuwa mukutho wa nankhoro a eng'ombe ni wa nankhoro a enkhosa.

¹⁵ Vano Balamu aamulleella Balaki wi, “Mwiimelle vakhuviru ni mukuthwaanyu wooshellelliha nave miyaano kiyeewo apaalle Apwiya ttuuwa ni okumana ni miyaano.”

¹⁶ Vano Apwiya yaakumana ni Balamu emulleella wi, “Hokollweella wa Balaki wamulleelle nnddo kinuulleelleemi.”

¹⁷ Sika Balamu aahokollweella wa Balaki, amuphwanya olliye ni oohoollella attheene a Amowabu yiimellille vakhuviru ni mukuthwaaye wooshellelliha. Balaki aamukoha wi, “Ethiyo Apwiya yuulleelle ddawiidde?”

¹⁸ Vano Balamu ahaamba ollotella wi, “Venyani Balaki nave mwiiwe, mukiiwellelle nyu mwaana a Zipora.

¹⁹ Mulluku khari wonanko muthu wi ttuuwoottha, khahiyo muthu wi ttuusintha maganizwaaye. Ethiyo kheera nnddo allotilleeye, khakwakhwaniha nnddo alonjezilleeye?

²⁰ Ngoonani, koolamuliwa wi kaadalise. Mulluku adalisa, miyaano ngiwora osintha.

²¹ Kheyiivo yoonanara yooneyille mwa Yakobo, apaalle yookatamiha ephwanyeyille mwa Israele. Apwiya Mullukwiiwa ari ni alliwa, erina okhuwa wi olliye tti mweniiwa.

²² Mulluku ahaakhumiha mu Iguputo, tti amasiva wonanko enari.

²³ Vawi khamuri okhwiri mwa Yakobo apaalle woombesa makhanga mwa Israele. Vano athu eneerollota dda Yakobo wi, ‘Ngoonani nnddo eerille Mulluku!’

²⁴ Mutundu wa Israele onavenya wonanko mukango waamutthiyana, onnatthupulluwa wonanko nankhoro a mukango, oyo ohinakonaatthi vatthi ophiyera opharille enama owirya nikhame na enama yoophariweeyo.”

²⁵ Balaki aamulleella Balamu wi, “Muhinaatembelela apaalle waadalisa.”

²⁶ Koma olliye ahaakhulla wi, “Ethiyo nguulleelleni wi kinaphwanella weera ddennddove ekilleelle Apwiya?”

Ollotella waneeraru wa Balamu

²⁷ Balaki aamulleella Balamu wi, “Hankoni nithaanane onipuroni nimodda apaalle ddineeromuhakallalliha Mulluku wi mwaatembelele ovenyera vaavo.”

²⁸ Sika Balaki aamukusella Balamu vaddullu va mwaango wa Peori, woowehana ni echipululu.

²⁹ Vano Balaki aamulleella Balamu wi, “Mukimakelle makuwa matthanu ni meelli vaava nave mukikhozelle anankhoro a eng'ombe dditthanu ni piilli owaakattho anankhoro a enkhosa dditthanu ni piilli.”

³⁰ Balaki aheera moollikana ni mmo amulleellelleeye Balamu. Nave Balaki aaheraatthi va nirive nikuwa nankhoro mmodda a eng'ombe ni nankhoro mmodda a enkhosa.