Numeri 22 - Mawu a Mulluku

Mwene a o Mowabu anamwiithaniha Balamu

¹ Aisraele yaavenya eya yatthipella misasa ddiwa mu ntapo na Mowabu okhopella wa muhinje wa Yordani, o Yeriko.

² Balaki mwaana a Zipora ahoona ddittheddene Aisraele yaweerelliiwa Aamori.

³ Ekaamba yawi Aisraelaayo yaari anchichi Amowabu yaawoova athwaayo wunchichi nave yaatathilla murima.

⁴ Sika Amowabu yahaalleella attekweene a o Midiyani wi, “Mulloko yoolla oneerotthollosa ddittheddene ddinaapheelle wonanko mmo eng'ombe ddinattholloselliiwa manasi.” Vano Balaki mwaana a Zipora oyo aari mwene a Amowabu enthawi yeeyo,

⁵ aarumiha othenga owaniwa wa Balamu, mwaana a Beori, o Petori vakhuviru ni muhinje wa Yufurate wi awe nave amulleelle wi, “Athu oovenyera o Iguputo aaddalla ellapo ettheene nave enawehana ni hiyaano.

⁶ Vano waawoni mwaatembelele athwaalla munipuroni mwaka vawi tti amasiva onikhwaranya hiyaano. Apaalle miyaano ttuuwaagonjiha ni owiikariha mwiillaponi mwaka. Vawi kinnadduwella wi oyo munamudaliseenyu annadaliseya nave oyo munamutembelelenyu annatembeleleya.”

⁷ Sika oohoollella a o Mowabu ni a o Midiyani yaatimulla ekusalle makobiri awi yoombeselle nikhanga. Vano yaaphiya wa Balamu emulleella mawu a Balaki.

⁸ Balamu ahaalleella wi, “Konani wuno mahiiyu nave osiisello kineerewuulleellani mawu moollikana ni mmo Apwiya enaakilleellelliiwa.” Sika oohoollella a o Mowabu yaakona wa Balamu.

⁹ Vano Mulluku aawa wa Balamu amukoha wi, “Ethiyo athu eri ni weyaanwaalla ttaani?”

¹⁰ Balamu aamwaakhulla Mulluku wi, “Balaki mwaana a Zipora, mwene a o Mowabu sika aarumihalle wi okilleelle othenga wawi,

¹¹ ‘Athu oovenyera o Iguputo aaddalla ellapo ettheene nave enawehana ni hiyaano. Waawoni mwaatembelele athwaalla munipuroni mwaka apaalle miyaano ttuuwanana ni owiikariha.’ ”

¹² Vano Mulluku aamulleella Balamu wi, “Ohinathaananana nave ohaatembelele athwaayo kaambiiwa tti oodalisiwa.”

¹³ Nave Balamu aavenya ohinase aalleella oohoollella a Balaki wi, “Hokollweellani o ellapwaanyu, Apwiya aakhoota wi kithaanane ni nyuwaano.”

¹⁴ Sika oohoollella a o Mowabu yaahokollweella wa Balaki emulleella wi, “Balamu ookhoota owa.”

¹⁵ Koma Balaki ahaarumattho oohoollella amodda awaata ni ooriiheya okhwaranya awaamba.

¹⁶ Ephiyalle wa Balamu yaamulleella wi, “Balaki mwaana a Zipora anallota wi, ‘Muhaakhullelle wi ello emodda yuulepheliheni owa wa miyaano.

¹⁷ Ddawoona, kineerewuuriihani wunchichi nave erive ello eyo munaakilleelleenyu, kineereweera. Waawoni mwaatembelele athwaalla munipuroni mwaka.’ ”

¹⁸ Koma Balamu aawaakhulla oohoollella a Balaki wi, “Naari Balaki akivahilleke enyumbaaye yooddalla ni siliva owaaka golide, ngiwora weera naari vang'ono ddoohiyana ni nnddo Apwiya Mullukwaaka ekilamulalliiwa.

¹⁹ Sika vano mukone wuno mahiiyu yaalla wonanko mmo yeerelle akhwiinywaalle wi kiiwe vaarimi viri ddimodda nnddo Apwiya enaakilleelliiwa.”

²⁰ Vano Mulluku aawa wa Balamu mahiiyu vaavo amulleella wi, “Yaarimi athwaayo eweelle owiithana, venya othaananena. Koma weere ddennddove kinuulleelleemi.”

²¹ Sika Balamu avenyille ohinase aahiya esaduro va bulwaaye atimulla ni oohoollellaalle.

Balamu ni bulwaaye

²² Balamu athaananaayena, Mulluku aasha murima. Olliye aari amuwellille bulu nave aari ni oomukavihera eelli. Vano mungelo a Apwiya ahiimella m'musewuni wi amuwallelle ettilla.

²³ Buloolle aamoona mungelo iimellille m'musewuni, ahullullalle nsupada. Vano bulu aahiya musewu ahapuwella m'matani nave Balamu aamuukutha wi ahokollweelle m'musewuni.

²⁴ Vano mungelo ahiimella mu voopataana musewu wooweella variyari va emata ddampesa, ddookhalla ni esiri embali piilli ddene.

²⁵ Bulooyo amoonille mungelo aapataana ni esiri, aphitteera nnyallo na Balamu osirininko. Vano Balamu amuukutha bulooyo waneepiilli.

²⁶ Vano mungelo aahoolla iimellattho vanipuroni noopataana vookatamiha orukunuwella onnattanatta apaalle wuunyotthoni.

²⁷ Bulooyo amoonille mungelooyo aakonaatthi Balamooyo ari vamutthanani vaye. Balamu aasha murima wunchichi, amuukutha bulooyo ni ekopwaaye.

²⁸ Vano Apwiya yaamweeriha bulooyo wi allote nave amukoha Balamu wi, “Ethiyo kuuchimwenlleni tini wi mukuukutheke oraru ddiidda?”

²⁹ Balamu ahaakhulla wi, “Kaambiiwa onnakittheelliha! Kaariki ni nsupada kaamawiipha!”

³⁰ Bulooyo aamukohattho Balamu wi, “Ethiyo mi ngihiyoni bulu oyo mukhanlleenyu mukiwellaka okumaanyu muttheene ophiyera ollello? Ethiyo ddenndda kaambilleke oweerellani ovenyera khalle?” Balamu ahaakhulla wi, “Iyaayi.”

³¹ Vano Apwiya yaahulla miittho a Balamu nave aamoona mungelo iimellille m'musewuni ahullullalle nsupada m'mattani mwaye. Vano Balamu aakokhora nave apopheya ekhovaaye vatthi.

³² Mungelo aamukoha wi, “Kaambiiwa tini omuukuthalleewe bulwaawo mwawi ddiidda oraru? Koowa wi kuuwallelle ettilla ekaamba yawi olendwaawoolla onnakinanara.

³³ Bulwaawo aakoona nave aahiya musewu olendo oraru. Ahihapuwalleke ohiya musewu akoonilleeye, ddaano kiwiiphenlle vaavalle koma bulooyo kaaweeromuhiya ni okumi.”

³⁴ Balamu aamwaakhulla mungelo wi, “Koochimwa. Ngaadduwella wi munakiwallella ettilla. Ekaamba ya yeella, ddaarimi dduunanarilleni, kineerohokollowa.”

³⁵ Koma mungelooyo aamulleella Balamu wi, “Thaananana athwaalla. Koma wallote ddennddove kinuulleelleemi.” Sika Balamu aavirellella ni olendwaaye ni oohoollella a Balaki.

Balaki anamwaakhella Balamu

³⁶ Balaki iiwalle wi Balamu oophiya, aakhuma amuchingamella o muzinda mmodda vakhuviru ni muhinje wa Arinoni oyo ori o malire a ellapo ya Mowabu, wookomella maliraayo.

³⁷ Vano Balaki aamukoha Balamu wi, “Ethiyo ngaawurumihelleni othenga woowiithanani? Kaambiiwa tini mwahiwiilleenyu? Ethiyo mi ngiwora wuuriihani?”

³⁸ Balamu aamwaakhulla Balaki wi, “Ddawoona, ethiyo vano ngiwiille? Koma ethiyo kookhalla ni masiva oollota erive ello? Kinaphwanella ollota ddennddove akilleelle Mulluku.”

³⁹ Vano Balamu aathaanana ni Balaki aphiya o Kiriyati Huzoti.

⁴⁰ Wenko Balaki aaheraatthi mukutho wa eng'ombe ni wa enkhosa, amukawella enama Balamu ni oohoollella ayo aariiyena.

Ollotella wawaamba wa Balamu

⁴¹ Osaka wene Balaki aamukusa Balamu ayaana omiyaangoni dda Bamoti Baala nko Balamu aworeeye woona embali emodda ya misasa ddinchichi dda Aisraele.