Numeri 21 - Mawu a Mulluku

Aisraele enaagonjiha Akanani

¹ Mwene a o Aradi, Mukanani, oyo akhalla omwera iiwalle wi Aisraele enimawa oweella ettilla ya o Atarimu, aawanana ekhoto nave ahaaphara amodda okaporo.

² Vano Aisraele yaallupella wa Apwiya wi, “Mwaarimi mwaavelleelle m'mattani mwahu athu yaalla nineerewoononga mizinda ddiwa.”

³ Apwiya yahiiwa mawu a Aisraelaayo nave yahaavelleella Akanani m'mattani mwiwa. Aisraele yaawoononga Akanani ni mizinda ddiwa ddene. Sika nipuronno yaaniromolla wi Horoma.

Enowa ya mukuwa

⁴ Aisraele yaatimullawo o mwaango wa Horo eweella mu ettilla ya mukhwipi mwa Enyanja Yoofiira, waapheella ellapo ya Edomu. Koma eri muttilla yahaamba onyoonyiwa.

⁵ Athwaalle yahaamba omwiinyullulla Mulluku ni Mose enallota wi, “Kaambiiwa tini mwanikhumihalleenyu mu ellapo ya Iguputo wi nikhwelle muchipululunimmu? Wuno khawuri yoocha naari maaddi nave yoocha yoohikhalla ni muttekweella yoonidduurya.”

⁶ Vano Apwiya yaarumiha variyari va athwaalle enowa dda nttipwi ddaalluma nave Aisraele anchichi yaakhwa.

⁷ Vano athu yaawa wa Mose emulleella wi, “Pepaani naachimwa voowiinyullullani Apwiya ni nyuwaano. Muvekelle wa Apwiya wi enivenyihellevo enowanndda.” Sika Mose ahaavekellella athwaayo.

⁸ Vano Apwiya yaamulleella Mose wi, “Opange enowa ya mukuwa nave oyitthomeye vamuteekhoni. Arive muthu oyo allumiwe, aweha enoweeyo, aneerokhalla ni okumi.”

⁹ Sika Mose aapanga enowa ya mukuwa, ayitthomeya vamuteekhoni. Nave arive muthu allumiwa, aweha enoweeyo, aanakhalla ni okumi.

Ovenyera o mwaango wa Horo ophiya o ntapo na Mowabu

¹⁰ Aisraele yaavenyawo yatthipella misasa ddiwa o Oboti.

¹¹ Nave yaavenyawo o Oboti yatthipella o Iyeabarimu mu echipululu yoowehana ni Mowabu, wookhuma nndduwa.

¹² Evenyille wenko yaatthipella mu ntapo na Zeredi.

¹³ Ovenyera wenko yaatthipella o muhinje wa Arinoni oyo ori mu echipululu yoovenyera m'malireni a ellapo ya Aamori. Muhinje wa Arinoni waari malire a Amowabu ni Aamori.

¹⁴ Ekaamba ya yeella nibukhu na ekhoto dda Apwiya ninallota wi, “Muzinda wa Waheba ori o Sufa, o ntapo na Arinoni,

¹⁵ ohito wa ntapo ophiya o Ari, o malire a ellapo ya Mowabu.”

¹⁶ Ovenyera wenko yaaya o nipuro nooromolliwa Beeri o ehime eyo Apwiya yamulleelliiwa Mose wi, “Waatthukumanihe athwaayo nave kineerewaavaha maaddi.”

¹⁷ Vano Aisraele yahiipa nchipo nawi, “Khumiha maaddaawo, ehime, hiyaano nineerowiipella nchipo.

¹⁸ Ehime eyo yakatille mamwene, eyottho yakatiwe ni oohoollella oovuwa. Yakatille ni ekopo ddiwa ddoomwene navettho ni mitooto ddiwa.” Ovenyera ochipululuninko Aisraele yaaya o Matana.

¹⁹ Ovenyera o Matana yaaphiya o Nahaliyele ovenyera o Nahaliyele yaaphiya o Bamoti.

²⁰ Ovenyera o Bamoti yaaphiya o ntapo na ellapo ya Mowabu va mwaango wa Pisiga, moowehana ni echipululu.

Ogonjihiwa wa mwene Sihoni owaaka mwene Ogi

²¹ Vano Aisraele yaarumiha othenga wa Sihoni mwene a Aamori wi,

²² “Munaakhullelle wi niweelle mwiillaponi mwanyu. Khaniweella m'matani mwanyu apaalle mu emata ddampesa ddanyu. Nave khaniwirya maaddi a mwiihimeni mwanyu. Ninaaweelle m'musewuni mwanyuve ophiyera nillapuwalle mu echigawaanyu.”

²³ Koma Sihoni khaawaakhullelle wi Aisraele evirelle mwiillaponi mwaye. Ahaatthukumaniha athwaaye attheene, eya wi yawane ni Aisraele ochipululuni. Nave yaaphiya o Yahazi ewana ni Aisraele.

²⁴ Vano Aisraele yaamugonjiha ni nsupada nave yaakha ellapwaaye waambeella o muhinje wa Arinoni ophiya o muhinje wa Yaboki, ophiyera mu malire a ellapo ya Aamoni kaambiiwa mwakomellille ellapo ya Aamoni mwaari mooteteziwa phaama.

²⁵ Aisraele yahaakha mizinda ddittheddene dda Aamori ekhalla mwemmo vamodda ni muzinda wa Heshiboni ni mizi ddiwa.

²⁶ Heshiboni waari muzinda wa Sihoni mwene a Aamori oyo awanille ni mwene akhalle a o Mowabu nave ahaakha ellapo ettheene ophiya o muhinje wa Arinoni.

²⁷ Sika ekaambiiwa a endakatulo enallotiiwa wi, “Waawoni o Heshiboni, muzindoolla omakiwettho, hankoni muzinda wa Sihoni okeraattheyettho.

²⁸ Munllo waavenyera o Heshiboni, navettho o muzinda wa Sihoni, woononga muzinda wa Ari o Mowabu, oshellelliha asimiyaango a Arinoni.

²⁹ Otulli okhalle wa weyaano Mowabu, moonongeye nyu oomullapella Kemoshi. Wohaatthattusa anaaye aallopwana oothawathawa, anaaye aatthiyana akaporo a Sihoni, mwene a Aamori.

³⁰ Sika edduullu ddawo ddaamalla okhwa, waambeella o Heshiboni ophiya o Diboni naaddoononga o Nofa, vakhuviru ni Medeba.”

³¹ Sika Aisraele yaakhalla mu ellapo ya Aamori.

³² Mose ahaaruma athwaaye wi yazonde muzinda wa Yazere. Nave Aisraele yaagonjiha mizi ddaye, ewiikariha Aamori ayo yaari wenko.

³³ Vano yaahokollowa eweella mu ettilla ya o Bashani. Ogi mwene a o Bashaninko aakhuma allipana ni alliwa. Olliye ni athwaaye attheene yaawanana ekhoto o Ederei.

³⁴ Koma Apwiya yaamulleella Mose wi, “Ohinoova. Koomuvelleella m'mattani mwawo vamodda ni athwaaye navettho ellapwaaye. Nave omweerelle nnddo wamweerelleewe Sihoni, mwene a Aamori oyo akhalla o Heshiboni.”

³⁵ Vano Aisraele yaamwiipha Ogi, anaaye ni athu attheene, sika khaarivo naari mmodda oyo avulluwalle nave yahaakha ellapweeyo.