Numeri 20 - Mawu a Mulluku

Maaddi ookhuma munllukuni

¹ Aisraele attheene yaaphiya o echipululu ya Zini va mweeri wawaamba. Nave athwaayo yaakeraattheya o Kadeshi. Miriyamu aakhwella ni ovitthiwa wenko.

² Khewaari maaddi oowirya. Sika athwaayo yaatthukumana emuwukila Mose ni Aroni.

³ Vano yahaamba okangana ni Mose nave yaallota wi, “Waaweerokhalla phaama nakhwilleke nimodda ni akhwiihu alle yakhwille vamiitthoni va Apwiya.

⁴ Kaambiiwa tini mwaaphiyihalleenyu athu attheene wa Apwiya ochipululuni wuno wi nikhwelle nimodda ni eziweto ddahu.

⁵ Nave kaambiiwa tini mwanikhumihalleenyu mu ellapo ya Iguputo muniphiyiha onipuroni noonanaranna? Wuno khonamella tirigu apaalle miteekho ddanamukuyu, ddampesa apaalle ddamakangaza navettho khewuri naari maaddi oowirya!”

⁶ Vano Mose ni Aroni yaavenyawo omutthukumanoni wulle eya o mullako wa musasa wamutthukumano emora ekhove nave ntitimiho na Apwiya naawooneyella.

⁷ Vano Apwiya yaamulleella Mose wi,

⁸ “Kusa ekopwaawo nave weyaano ni mwanamunno Aroni mwaatthukumanihe athu. Vano olamule nlluku wi nikhumihe maaddi, athwaayo yoonaka. Vano oneerewaakhumihella maaddi nave oneerewaawiryiha athwaayo ni eziweto ddiwa.”

⁹ Vano Mose aakusa ekopo eyo yaari vamiitthoni va Apwiya moollikana ni mmo yalamulelliiwa.

¹⁰ Vano Mose ni Aroni yaatthukumaniha athu attheene onllukuni wulle aalleella wi, “Ngiiwani athu oowukilanyu. Ethiyo munapaalla wi nuukhumihelleni maaddi ovenyera munllukunimmu?”

¹¹ Vano Mose aatukhulla nnatta naye avadda nlluku olendo wiilli ni ekopwaaye. Nave mwaakhuma maaddi manchichi nave athu attheene vamodda ni eziweto ddiwa yaawirya.

¹² Apwiya yaamulleella Mose ni Aroni wi, “Vawi khamwaakikhulupilinle nave khamoonihalle vamiitthoni va Aisraele wi miyaano tti aweella, khamwaavollochiha athwaalla mu ellapo eyo kaavahilleemi.”

¹³ Yaalla tti maaddi a o Meriba nko Aisraele yakanganilliiwa ni Apwiya nave Apwiyaayo yaaddooniha wa athwiiwa wi tti aweella.

Aedomu enaawatteella Aisraele wi evire

¹⁴ Eri o Kadeshi Mose aarumiha othenga wa mwene a o Edomu wi, “Abalaanyu, Aisraele enallota wi, ‘Munnadduwella ddookatamiha nnddo ddineereyelle.

¹⁵ Makhollwaahu yaaya o Iguputo nave naakhalla wenko miyakha ddinchichi. Aiguputo yaanihoosa hiyaano vamodda ni makhollwaahu.

¹⁶ Nikhuwenlle wa Apwiya yaaniiwa, emurumiha mungelo oyo anikhumihalle mu ellapo ya Iguputo. Vano niri wuno o Kadeshi, muzinda oyo ori m'malireni ni echigawaanyu.

¹⁷ Munaakhullelle wi niweelle mu echigawaanyu. Khaniweella m'matani mwanyu apaalle mu emata ddampesa ddanyu. Nave khaniwirya maaddi a mwiihimeni mwanyu. Ninaaweelle m'musewuni mwanyuve ophiyera nillapuwalle mu echigawaanyu.’ ”

¹⁸ Koma Aedomu yahaakhulla wi, “Muhinavirella wuno wi nihuuhomeni ni nsupada.”

¹⁹ Aisraele yaallota wi, “Hi ninaaweete m'musewuni mwanyuve. Eziweto ddahu ddawirya maaddaanyu, nineerollivella. Naakhullelleni wi nivire.”

²⁰ Koma Aedomu yaawaakhulla wi, “Khaninapaalla, khamuvira.” Aedomu yaakhuma ni mulloko wakhoto muullupalli ni wamasiva wi ewane ni Aisraele.

²¹ Sika Edomu aakhoota wi Aisraele evirelle echigawiiwa. Vano Aisraele yaavirella ettilla emodda.

Okhwa wa Aroni

²² Vano Aisraele attheene yaatimulla o Kadeshi yaphiya o mwaango wa Horo.

²³ Mwaangooyo waari m'malireni a ellapo ya Edomu. Wenko Apwiya yaamulleella Mose ni Aroni wi,

²⁴ “Aroni khavollowa mwiillaponi eyo kinaavaheemi Aisraele. Aneerokhwa ekaamba yawi eelliinenyu khamwiiwellelle lamulo naka omaaddini a o Meriba.

²⁵ Omukuse Aroni ni mwanaye Eleazara nave owellena vaddullu va mwaango wa Horo.

²⁶ Wenko omurulle Aroni ddoowara ddaye dda omukutho nave omuwarihe Eleazara vawi Aroni anaakhwelle wenko.”

²⁷ Mose aheera moollikana ni mmo Apwiya yamulamulelliiwa. Ararwaayo yaawella mwaango wa Horo athu attheene yoonaka.

²⁸ Nave Mose aamurulla Aroni ddoowara ddaye dda omukutho, amuwariha Eleazara. Nave Aroni aakhwella vamwaangonimvo. Vano Mose ni Eleazara yaakittha m'mwaangonimmo.

²⁹ Vano mullokoolle wiiwalle wi Aroni ookhwa wahinlla maliro a Aroni mallapo 30.