Numeri 19 - Mawu a Mulluku

Ntuura na eng'ombe yoofiira

¹ Apwiya yaamulleella Mose ni Aroni wi,

² “Apwiya enalamula wi mwaalleelle Aisraele wi ewe ni musote wa eng'ombe woofiira ni woohirakalla oyo ohinamakiweke nigoli.*

³ Evelleelle wa Eleazara nave ekhumellena otte wa misasa wi yawiiphe vamiitthoni vaye.

⁴ Vano Eleazara atthaveye eyaallaaye mu nikhame na eng'ombeeyo. Nave amidde nikhamenno owiitthoni wa musasa wamutthukumano olendo otthanu ni opiilli.

⁵ Eng'ombeeyo eyoose Eleazara oonaka. Yoose nttapara, enama, nikhame ni marupwiiweene.

⁶ Mullupa mukutho akuse enthambi ya mukunguza, ekuwo yoofiira ni enthambi ya muteekho wa hisope* addivokhelle vamunlloni mvo vinanyeta eng'ombeeyo

⁷ Vano mullupa mukutho achape ddoowara ddaye nave ahape. Vatulli viwa avollowe m'misasani koma akhalle ooripihiwa ophiyera misikuwa.

⁸ Muthu oyo anoosa eng'ombeeyo achape ddoowara ddaye, ahape mwiilli muttheene koma akhalle ooripihiwa ophiyera misikuwa.

⁹ Muthu oyo ari oohiripihiwa sika anaawolle ntuura na eng'ombeeyo nave anihiye otte wa musasa va nipuro noopatuleya. Esungelle ntuuranno Aisraele wi ephariheke mutteko m'maaddini aweellihella. Mutetho yoolla tti woovenyihella machimo.

¹⁰ Muthu oyo anawolla ntuura achape ddoowara ddaye koma akhalla ooripihiwa ophiyera misikuwa. Nenno nikhalle lamulo wa enthawi yoohimalla wa aneetthi apaalle wa alleto.”

Dda ottannya mutembo

¹¹ “Oyo anaattannye mutembo aneerokhalla ooripihiwa mallapo matthanu ni meelli.

¹² Ahape ni maaddi aweellihellaalle va nllapo naneeraru ni naneetthanu ni piilli nave aneeroweellihiwa. Koma aahihapa va nllapo naneeraru ni va nllapo naneetthanu ni piilli, kheella.

¹³ Oyo anaattannye mutembo nave aahiddeelliha, muthu yooyo anaripiha musasa wa Apwiya, sika aneerovenyihiwa variyari va Aisraele. Aneerokhallave ooripihiwa ekaamba yawi khamiddiwe maaddi aweellihella.

¹⁴ “Muthu akhwella m'musasani, lamulo tti nawi arive muthu anaavollowe m'musasanimmo nave arive muthu oyo ari m'musasanimmo aneerokhalla ooripihiwa wa mallapo matthanu ni meelli.

¹⁵ Navettho erive echida yoohikhalla ni yookhuneella tti yooripihiwa.

¹⁶ Arive muthu oyo anaamuttannye muthu awiiphiwa apaalle ookhwa yeekha apaalle nikhuva na muthu ookhwa apaallettho mahame aneerokhalla ooripihiwa wa mallapo matthanu ni meelli.

¹⁷ “Ekaamba ya muthu ooripihiwooyo ekuse ntuura na mukutho wooshellelliha woopepesella machimo ehelle mwiipallini nave yoonjereremo maaddi aphaama a nllapo nenno.

¹⁸ Vano muthu oohiripihiwa akuse nikukhu na hisope nave aruweye m'maaddini mulle amidde maaddaayo vamusasani, va ezipangizo ddaye ddittheddene, va athu ayo yaari mwemmo nave va muthu oyo aattannyille nikhuva na muthu ookhwa apaalle muthu iiphiwe apaalle muthu ookhwa yeekha apaallettho nihame.

¹⁹ Muthu oohiripihiwoolle amumidde maaddi muthu ooripihiwooyo va nllapo na naneeraru ni va nllapo naneetthanu ni piilli. Nave ooripihiwooyo achape ddoowara ddaye, ahape nave misikuwa aneerokhalla aweellihiwa.

²⁰ “Koma muthu ooripihiwooyo aahiddeelliha avenyihiwe variyari va Aisraele vawi ooripiha nipuro noopatuleya na Apwiya. Olliye tti ooripihiwa ekaamba yawi khemmiddalle maaddi aweellihella.

²¹ Nenno nikhalle lamulo wa enthawi yoohimalla wa alliwaayo. “Muthu oyo anamidda maaddi aweellihella achape ddoowara ddaye. Nave muthu oyo anattannya maaddi aweellihella aneerokhalla ooripihiwa ophiyera misikuwa.

²² Erive ello eyo muthu ooripihiwooyo anaattannyeeye eneerokhalla yooripihiwa. Nave arive muthu oottannya yeeyo aneerokhalla ooripihiwa ophiyera misikuwa.”