Numeri 18 - Mawu a Mulluku

Mitteko dda allupa mukutho ni dda Alevi

¹ Vatulli viwa Apwiya yaamulleella Aroni wi, “We, anaawo ni nibanja na makhollwaawo sika munaawiireye ddoolakweya dda musasa wa mutthukumano. Nave weyaano ni anaawo sika munaawiireye ddirive ddoolakweya dda omullupa mukutho.

² Oweenattho abalaawo a nlloko na Levi, nlloko na nikhollo nawo wi ephareke mutteko ni weyaano, yuukavihereke weyaano ni anaawo mwaarumeyellaka mu musasa wamutthukumano.

³ Alliwaayo eneerekewuukavihera nave eneerekophara mitteko ddittheddene dda m'musasani. Koma ehaatamelle ezipangizo dda mu nipuro noopatuleya apaalle nikuwa wi alliwaayo ni weyaano muhikhwe.

⁴ Alliwaayo eneerophara mutteko ni weyaano, erumeyellakattho mu musasa wamutthukumano va mitteko ddittheddene dda m'musasanimmo. Koma ahikhallevo mmodda anaawaatamelle.

⁵ Nave muneerekorumeyella mu nipuro naweella ni va nikuwa wi Apwiya ehaashellettho murima Aisraele.

⁶ Kohaatthoollattho abalaawo, Alevi, variyari va Aisraele wonanko emphaso wa weyaano. Aavelleelliwa wa Apwiya wi erumeyelleke mu musasa wamutthukumano.

⁷ Vano weyaano ni anaawo murumeyelleke va mutteko wa mukutho, mitteko ddittheddene dda vanikuwani ni va mitteko ddittheddene dda nipuro naweellesesa. Kohuuvaha omullupa mukutho wi ekhalle emphaswaawo. Koma arive muthu anaatamellevo aneerewiiphiwa.”

Echigawo ya ddoovelleella wa allupa mukutho

⁸ Apwiya yaamulleellattho Aroni wi, “Va ddoovelleella wa miyaano, kohuuvaha ddoohalla onasungeewe nnddo Aisraele enapatullelliiwa wa miyaano. Kohuuvaha ddenndda wi ddikhalle echigawaawo ni ya anaawo wi ddikhalle ddaanyu wa enthawi yoohimalla.

⁹ Mwa ddoovelleella ddaweellesesa wonanko mukutho wa othu, mukutho woopepesella machimo ni mukutho woolliva nnddo ehidoosilliiwa vanikuwani ddikhalle ddaawo ni anaawo.

¹⁰ Muddichelleke o nipuro noopatuleya. Arive mullopwana ttuuchana. Ddenndda ddikhalle ddaweellihiwa wa nyuwaano.

¹¹ “Ddimoddattho ddaanyu tti ddoovelleella dda emphaso owaaka ddoovelleella ddootukhullella muddullu wa Apwiya dda Aisraele. Ddenndda kohuuvaha, anaawo aallopwana ni aatthiyana wi ddikhalle ddaanyu wa enthawi yoohimalla. Arive muthu mu nibanja nawo oyo ahiripihiwe ttuucha.

¹² “Kohuuvahani ddeko ddittheddene ddaphaama wunchichi ddawaamba ohata nnddo athu enavelleelliiwa wa miyaano monga makhura, vinyo ni tirigu.

¹³ Mwa ddeko ddittheddene dda mwiillaponi mwawo, ezipaso ddawaamba wiithwa nnddo enavelleelliiwa wa Apwiya ddikhalle ddaanyu. Arive muthu oohiripihiwa mu nibanja nawo ttuucha.

¹⁴ “Erive ello eyo athu enaapatulelliiwa wa Apwiya mu ellapo ya Israele ekhalle yaanyu.

¹⁵ “Erive yawaamba, khaya tti muthu apaalle enama nnddo enavelleelliiwa wa Apwiya, ekhalle yaanyu. Koma mwaana aamullopwana mumoopolleke navettho mwaana a enama ooripihiwa mumoopolleke.

¹⁶ Mumoopolleke akhalla a mweeri mmodda. Mutengwiiwa wawoopollella okhalle makobiri matthanu a siliva moollikana ni yoolingella ya onipuroni noopatuleya.

¹⁷ Koma musaanaang'ombe awaamba apaalle musaana a enkhosa awaamba apaallettho musaana a epuri awaamba muhinamoopollaka vawi tti aweella. Mwiithelle nikhame niwa vanikuwani nave moose makhuriiwa wi ekhalle mukutho wawoosiwa viikho wa nthuko nawaaddivella Apwiya.

¹⁸ Koma enamiiwa ekhalle yaanyu moollikana ni mmo enakhallella ekhakadda ni mweto wonnattanatta wamutulli wootukhullella muddullu wa Apwiya.

¹⁹ “Ddoovelleella ddoopatuleya ddittheddene nnddo Aisraele enaddivelleelliiwa wa Apwiya kohuuvaha weyaano, anaawo aallopwana ni anaawo aatthiyana ayo eri ni weyaano. Ddennddo ddikhalle ddaawo. Yeella sika echipangano ya wa enthawi yoohimalla variyari va mi Apwiya ni weyaano ni edduullu ddawo.”

²⁰ Nave Apwiya yaamulleella Aroni wi, “We khokawelliwa yaawoyaawo mwiillaponi mwawo nave khokhallanattho yoohallana variyari viwa. Miyaano sika kiri yookawelliwa yaawoyaawo ni yoohallanaawo variyari va Israele.

Yaneekhumi tti ya Alevi

²¹ “Kohaavaha Alevi erive yaneekhumi wi ekhalle yoohallaniiwa va nnddo Aisraele enavelleelliiwa wa miyaano ekaamba ya mutteko enawuphariiwa mu musasa wamutthukumano.

²² Waambeella ollello Aisraele ehaatamelleke musasa wamutthukumano wi ehichimwe nave ehikhwe.

²³ Koma Alevi sika enaarumeyelleke mu musasa wamutthukumano nave eneerewiireya machimwiiwa. Nenno nikhalle lamulo wa enthawi yoohimalla wa mibado ddiwa ddittheddene. Alevi ehikhalle ni yoohallana variyari va Aisraele attheene.

²⁴ Vano erive yaneekhumi eyo Aisraele enavelleelliiwa wa Apwiya, kohaavaha Alevi wi ekhalle yoohallana. Sika ekaambiiwa kaalleelleemi wi ehikhalle ni yoohallana variyari va Aisraele.”

Yoovelleella yaneekhumi ya Alevi

²⁵ Apwiya yaamulleella Mose wi

²⁶ aalleellettho Alevi wi, “Mwaawaakhellaka wa Aisraele yaneekhumi eyo kuuvahilleemini wi ekhalle yoohallanaanyu, muvelleellewo yaneekhumi ya yaneekhumeeyo wi ekhalle mukutho woovelleella wa Apwiya.

²⁷ Nave yoovelleellaanyu eneeroweerengelliwa wonanko tirigu awaamba vanipuroni nawuuputhella navettho vinyo awaamba vanipuroni noomuwamullella.

²⁸ Sika nyuwaano muvelleelleke ddoovelleella ddanyu wa Apwiya ovenyera va erive yaneekhumi eyo munaawaakhelleenyu wa Aisraele. Yoovelleellaanyu wa Apwiya mumvaheke Aroni.

²⁹ Va ddoovelleella mwaakhenlleenyu mupatulevo nnddo ddiri ddaphaama wunchichi okhwaranya ddittheddene wi ddikhalle dda Apwiya.

³⁰ “Waalleellettho wi, ‘Mwavelleella ddaphaama okhwaranya ddittheddene, ddoohallannddo muddeerengelle wi tti ddaanyu.

³¹ Ttuuwora oddicha virive veko nyuwaano ni amunibanjanaanyu vawi ddennddo tti mallivellwaanyu ekaamba ya mutteko oyo munaphareenyu mu musasa wamutthukumano.

³² Nave khamuchimwa mwacha ddennddo, mwakhalla wi moovelleella wa Apwiya ddaphaama ddookhwaranya ddittheddene. Sika muhivevulle ddeko ddaweella dda Aisraele wi muhikhwe.’ ”