Numeri 17 - Mawu a Mulluku

Dda ekopo ya Aroni

¹ Apwiya yaamulleella Mose wi,

² “Ollote ni Aisraele wi ewinnye ekopo, nirive nlloko ekopo emodda. Oohoollelliiwa attheene vamodda ewinnye ekopo khumi ni piilli moollikana ni mabanja navettho makhollwiiwa. Olembe nnddina na arive muthu va ekopwaaye

³ nave olembe nnddina na Aroni va ekopo ya Levi. Vano vikhalle ekopo emodda va arive oohoollella a nirive nlloko.

⁴ Nave ekoponnddo oddihiye mu musasa wamutthukumano vahoollo va nibokosi na echipangano valle kinakumaneemi ni weyaano.

⁵ Ekopo ya muthu oyo kinaamutthoolleemi eneerophuwa. Sika kineeromalliha okhupanya wa Aisraele nko eneeriiwa moovaanyihana ni weyaano.”

⁶ Sika Mose aallota ni Aisraele. Nave oohoollella attheene yaamwinnya ekoponnddo, arive muthu ekopo emodda moollikana ni mabanjiiwa navettho makhollwiiwa, sika wi ekopo khumi ni piilli vamodda. Ekopo ya Aroni yaari variyari va ekopo ddiwa.

⁷ Mose aaddihiya ekoponnddo vamiitthoni va Apwiya mu musasa wa mutthukumano.

⁸ Osaka wene Mose avolloweeye musasa wa mutthukumano, ahoona ekopo ya Aroni, a nlloko na Levi ephuwalle makukhu, ettaphullalle malluwa navettho yimmalle ezipaso ddawiithwa dda manangwa.

⁹ Vano Mose aakhumihella ekopo ddittheddenenndde ovenyera vamiitthoni va Apwiya awoonihella Aisraele. Yoonille, arive oohoollella aakusa ekopwaaye.

¹⁰ Apwiya yaamulleella Mose wi, “Khawe wahokolloselle ekopo ya Aroni vahoollo va nibokosi na echipangano. Oisunge wi ekhalle echizindikiro wa athu oowukila wi ehiye okhupanya nave wi ehikhwe.”

¹¹ Mose aheera moollikana ni mmo Apwiya yalamulelliiwa.

¹² Vano Aisraele yaamulleella Mose wi, “Nineerokhwa, nineerotthollowa, nineeroraheya!

¹³ Aarimi arive muthu oyo anaatamella musasa wamutthukumano akhwaka, sika wi hiyaano attheene nookhwa.”