Numeri 16 - Mawu a Mulluku

Kora, Datani ni Abiramu enamuwukila Mose

¹ Kora mwaana a Izara, mwaana a Kohati, mwaana a Levi navettho edduullu ddiraru dda Rubeni, Datani ni Abiramu anamwani a Eliyabu ni Oni mwaana a Peleti

² vamodda ni oohoollella oovuwa 250 ootthoolliwa ni athu, yaamuwukila Mose.

³ Attheenaayo yaatthukumana vamodda nave yaamuwukila Mose ni Aroni, yaalleella wi, “Nyu mohoonjera! Athu attheene tti aweella, arive muthu m'mullokonimmu tti a Apwiya nave Apwiya eri variyari vahu. Kaambiiwa tini munaddeeseenyu oomukhwaranya arive muthu va mutthukumano wa Apwiya?”

⁴ Mose iiwalle ddenndda aamora ekhove.

⁵ Vano aamulleella Kora ni mullokwaaye muttheene wi, “Osiisello ohinase Apwiya enoonihelle oyo ari ayiwayiwa navettho oyo ari aweella nave eneeromulleella wi awe vakhuviru ni alliwa. Muthu oyo Apwiya enaamutthoolliiwa eneeromuphiyiha vakhuviru.

⁶ Vano weyaano Kora ni mullokwaawo muttheene mukuse ddoothuwihella mwiisi wa lubani.*

⁷ Muhellemo mankhalla munllo ni lubani osiisello vamiitthoni va Apwiya. Muthu oyo Apwiya enaamutthoolliiwa sika aweelliiwa. Nyuwaano Alevi sika mwaanjenre.”

⁸ Mose aamulleella Kora wi, “Ngiiwani vano nyuwaano Alevi.

⁹ Ethiyo khadduukwakhwanelleni ddawi Mulluku a Israele ahuupatulani mu mulloko wa Aisraele wi muwe vakhuviru ni Apwiya wi mumurumeyelle o musasaaye wi muwiimellelleke ni waakavihera athu?

¹⁰ Ethiyo khadduukwakhwanelleni ddawi mulluku aawaakhullellani wi muwe vakhuviru ni olliye, nyuwaano ni abalaanyu Alevi ayo eri ni nyuwaano? Ethiyo munapaallattho mukhalle allupa mukutho?

¹¹ Otthukumana wawiddiiddanngu, weyaano ni mullokwaawo, tti okangana ni Apwiya. Ethiyo Aroni tti aani wi mumuwukileke?”

¹² Vano Mose aamuruma muthu wi amwiithane Datani ni Abiramu, anamwani a Eliyabu. Koma alliwa yaallota wi, “Hi khaniwa wenko.

¹³ Ethiyo ddohuuyevellani ddawi mwaanikhumiha mu ellapo yoohirama ddoocha wi nikhwelle muchipululunimmu? Ethiyo munapaalla wi mukhallettho mwenaahu oonilamulella?

¹⁴ Woonjerera vaavo khamunivollochihalle mu ellapo ya mukaka ni enwi nave khamunivahille voollima apaalle emata yampesa wi ekhalle wonanko yoohallanaahu. Ethiyo munapaalla onimara muyeepe? Hiyaano khaniwa wenko.”

¹⁵ Vano Mose aasha murima wunchichi nave ahaalleella Apwiya wi, “Muhinaakhella mikutho dda athu yaalla. Ngiwaakhille naari bulu mmodda nave ngimulakwenlle naari mmodda a alliwaayo.”

¹⁶ Vano Mose aamulleella Kora wi, “Osiisello weyaano ni mullokwaawo wa athu 250 vamodda ni Aroni muwe o musasa wamutthukumano.

¹⁷ Arive muthu a nyuwaano akuse yoothuwihella mwiisi wa lubani, ahellemo lubani. Attheenenyu muye omusasaninko, arive muthu ni yoothuwihella mwiisi. Ddoothuwihella mwiisi ddikhalle 250 nave weyaano ni Aroni mukuse yaaye yaaye.”

¹⁸ Sika arive muthu aakusa yoothuwihella mwiisi, ahenllemo mankhalla amunllo owaaka lubani nave iimella va mullako wa musasa wamutthukumano ni Mose ni Aroni.

¹⁹ Kora ahaatthukumaniha athu attheene va mullako wa musasa wamutthukumano moowehana ni Mose ni Aroni. Nave ntitimiho na Apwiya nahooneyella wa athu attheenaayo.

²⁰ Nave Apwiya yaamulleella Mose ni Aroni wi,

²¹ “Venyanivoni variyari va mulloko wa athwaalla wi kiwoononge attheene naanweene vaava.”

²² Koma alliwa yaakokhora ellota wi, “Nyu Mulluku, mwaneena a minepa dda athu attheene, ethiyo mwaashenlle murima athu attheenaalla ekaamba ya ochimwa wa muthu mmodda?”

²³ Apwiya yaamulleella Mose wi,

²⁴ “Owulleelle mulloko muttheenooyo wi ovenyevo va misasa dda Kora, Datani ni Abiramu.”

²⁵ Vano Mose aaya omisasani dda Datani ni Abiramu nave attekweene a Aisraele yaamuthwara.

²⁶ Mose ahaalleella athu a m'mullokonimmo wi, “Pepaani venyanivoni va misasa dda athu oonanaraalla nave muhinattannya erive ellwiiwa wi muhiiphelliwe nimodda ekaamba ya machimwiiwa.”

²⁷ Sika athwaayo yaavenyavo va misasa dda Kora, Datani ni Abiramu. Vano Datani ni Abiramu ni awariwa vamodda ni aniiwa yaakhuma yiimella va mullako va misasa ddiwa.

²⁸ Mose aallota wi, “Vano muneerodduwella wi mitteko ddittheddene kineereeminndda yakirumalle tti Apwiya, khe dda m'muruni mwaka.

²⁹ Athwaalla yakhwa wonanko mmo enakhwella athu attheene apaalle Mulluku ahaallaka sika wi Apwiya kheyaakirumalle.

³⁰ Koma Apwiya yeera ello yeelleto, ethaya yaatthama yaamirya alliwa ni ddeko ddiwa ddittheddene, evitthiwa eri akumi, sika munaadduwelleenyu wi athu yaalla ahaavevulla Apwiya.”

³¹ Mose amallihalle ollota mawu yaalla ethaya yaatthalleya mvo yaariiwa.

³² Ethayeeyo yahaatthama yaamirya attheenaayo ni mabanjiiwa vamodda ni athu attheene a mulloko wa Kora ni ddeko ddiwa ddittheddene.

³³ Sika alliwa yaavitthiwa eri akumi ni ddeko ddiwa ddittheddene. Ethaya yahaavuhellella vatthi sika yahoonongeya variyari va mutthukumano muttheene.

³⁴ Aisraele ayo yaari vakhuviru yaathawa, ewiiwalle athwaayo yinllaka. Yaallota wi, “Hankoni nithawe wi naheenettho ethayeella ehinimirye.”

³⁵ Vano vaakhara munllo woovenyera wa Apwiya nave wahaashellelliha athu 250 alle yathuwiha mwiisi lubani.

Ddoothuwihella mwiisi wa lubani

³⁶ Vatulli viwa Apwiya yaamulleella Mose wi,

³⁷ “Mulleelle Eleazara, mwaana a mullupa mukutho Aroni wi avenyihemo ddoothuwihella mwiisi dda lubani m'munllonimmo nave mankhallaayo yaamwaramwarelle voorekamella vawi tti aweella.

³⁸ Ddoothuwihella mwiisi dda athu alle yiiphiwe ekaamba ya ochimwa wiwa tti ddaweella vawi ddaavelleelliwa vamiitthoni va Apwiya. Sika ddoothuwihella mwiisinnddo eddihane wi ddikhalle yookhuneellana vanikuwani. Vano ddineerokhalla echizindikiro wa Aisraele attheene.”

³⁹ Sika Eleazara aakusa ddoothuwihella mwiisi dda lubani ddamukoko nndde ddavelleelliwe ni athu alle yashille ni munllo. Yaaddihana ddikhalla yookhuneellana vanikuwani

⁴⁰ wi ddikhalle yawuupusella ya Aisraele. Nave wi arive muthu oyo ahiri mullupa mukutho, oyo ahiri mmodda mwa edduullu dda Aroni, ahaatamelle wi athuwihe lubani vamiitthoni va Apwiya wi ddihimmorelle ddoophwanaphwana ni nnddo ddammorenlle Kora ni mullokwaaye. Ddittheddene ddaheereya moollikana ni mmo Apwiya yamulleellelliiwa Eleazara oweella mwa Mose.

Aroni anaavullusa athu

⁴¹ Koma osaka wene Aisraele attheene yahaahumullulla Mose ni Aroni wi, “Nyu moowiipha athu a Apwiya.”

⁴² Yatthukumanilliiwa wi yaawukile Mose ni Aroni yaarukunuwa enaweha o musasa wamutthukumano. Vano yahoona murapo ohuruwenlle musasooyo nave ntitimiho na Apwiya nahooneya.

⁴³ Mose ni Aroni yaawa vahoollo va musasa wamutthukumanooyo

⁴⁴ nave Apwiya yaamulleella Mose wi,

⁴⁵ “Venyanivoni variyari va mulloko wa athwaalla wi kiwoononge attheene naanweene vaava.” Eellaayo yaamora ekhove ddiwa.

⁴⁶ Mose aamulleella Aroni wi, “Kusa yoothuwihellaawo mwiisi ya lubani, ohellemo mankhalla amunllo wa vanikuwani nave ohellemo lubani. Oyeena mwawaakuva nko ori athu nave oweerelle mutetho woopepesella machimwiiwa. Apwiya aasha murima nave mullilli wohaamba khalle.”

⁴⁷ Sika Aroni aakusa yoothuwihella mwiisi moollikana ni mmo Mose allotelleeye athamakella variyaririyari va mutthukumanooyo. Nave ahoona mullilli waambille khalle va athwaayo. Vano aahella lubani, eera mutetho woopepesella machimo a athwaayo.

⁴⁸ Aroni ahiimella variyari va athu ookhwa ni akumi nave mullilloolle waamalla.

⁴⁹ Koma ayo yakhwille ni mullillooyo yaakwakhwana 14,700 woonjerera va athu alle yakhwille va mullatu wa Kora.

⁵⁰ Vatulli viwa Aroni aahokollweella wa Mose va mullako wa musasa wamutthukumano mullillooyo omallille.