Numeri 15 - Mawu a Mulluku

Dda malamulo a mukutho

¹ Apwiya yaamulleella Mose wi

² allote ni Aisraele wi, “Mwavollowa mu ellapo eyo kinuuvaheemini,

³ mwavelleelleke wa Apwiya mukutho wa eng'ombe, enkhosa apaalle epuri, wawoosiwa viikho apaalle wooshellelliha apaalle woollupella apaalle wa opaalla wanyu va enthawi ya ehakallallo ddootthoolliwa wi ddikhalle mukutho wa nthuko nawaaddivella Apwiya.

^4-5 Vano oyo anawaana mukutho wooshellelliha apaalle mukutho wa mwaanaankhosa apaalle epuri avelleellettho wa Apwiya othu waphaama woollemella nikilogaramu nimodda, woottakanyihera ni makhura ookwakhwana nilita nimodda. Amuvelleellettho vinyo ookwakhwana nilita nimodda na mukutho wayoowirya.

⁶ Vano oyo anawaana nankhoro a enkhosa, avelleelleke othu waphaama woollemella makilogaramu meelli oottakanyihera ni makhura ookwakhwana nilita nimodda ni hafu.

⁷ Va mukutho wa othu amuvelleellettho vinyo ookwakhwana nilita nimodda ni hafu na mukutho wayoowirya. Ddittheddenenndda ddikhalle mukutho wa nthuko nawaaddivella Apwiya.

⁸ Vano mmodda aamuvelleellaka nankhoro a eng'ombe wi akhalle mukutho wooshellelliha apaalle mukutho woollupella apaalle mukutho wa eyaattano,

⁹ avelleellelle nimodda ni eng'ombeeyo othu waphaama woollemella makilogaramu mararu woottakanyihera ni makhura ookwakhwana malita meelli.

¹⁰ Va mukutho wa othu amuvelleellettho vinyo ookwakhwana malita meelli a mukutho wayoowirya. Ddittheddenenndda ddikhalle mukutho wawoosiwa viikho wa nthuko nawaaddivella Apwiya.

¹¹ “Mmu sika ddineereyelleke ni erive eng'ombe apaalle nankhoro a enkhosa apaalle arive mwaanaankhosa apaalle mwaana a epuri.

¹² Khaya ddinaawaate mwawiidde ddoovelleellannddo, mweereke ddiiddo ni erive enama ophiyera ddittheddene ddimallille.

¹³ Arive Muisraele eereke ddiiddo aavelleellaka mukutho wawoosiwa viikho wa nthuko nawaaddivella Apwiya.

¹⁴ Akhalla mulleto oyo ari variyari vanyu apaalle arive muthu oyo anakhalla variyari va Aisraele attheene nave anapaalla ovelleella mukutho wawoosiwa viikho wa nthuko nawaaddivella Apwiya, eereke wonanko mmo muneerella nyuwaano.

¹⁵ Dda athu attheene, khaya tti mulleto apaalle neetthi vikhalle lamulo nimoddamoddave, lamulo wa enthawi yoohimalla va mibado ddanyu ddittheddene. Sika nyuwaano apaalle mulleto tti amodda vamiitthoni va Apwiya.

¹⁶ Wa nyuwaano ni wa alleto ookhalla variyari vanyu vikhalle lamulo nimoddamoddave ni mutetho mmoddamoddave.”

¹⁷ Apwiya yaamulleella Mose wi

¹⁸ allote ni Aisraele wi, “Mwavollowa mu ellapo eyo kinuukuselleeminimmo

¹⁹ nave mwacha dda mwiillaponimmo, mwavelleelleke wa Apwiya echigawo emodda ya ddennddo.

²⁰ Va Buledaanyu a ddoohata ddawaamba, muvelleelleke mwitthi mmodda wi akhalle mukutho. Mumuvelleelle wonanko mmo muneerelleenyu voomuuputhani tirigu.

²¹ Sika olla tti mukutho wa apwiya va othwaanyu wawaamba wa mibado ddanyu ddittheddene.”

²² Koma mwaamodda mwaphonyiha moohidduwella voohithwarani malamulo ayo Apwiya yamulleellilliiwa Mose

²³ ni ddittheddene yuulamulalleniiwa oweella mwa Mose, waambeella va nllapo nno Apwiya yavelleellilliiwa lamulo ophiyera muhoollo mwiwa va mibado ddanyu ddittheddene,

²⁴ yoochimweeyo yeereya moohikhalla mwaphudda, athu attheene yaahidduwella, sika athu attheene emuvelleelle mwaana a nankhoro a eng'ombe wi akhalle mukutho wooshellelliha wa nthuko nawaaddivella Apwiya. Evelleelle nimodda ni othu waphaama ni mukutho wayoowirya moollikana ni malamulo. Emuvelleellettho nankhoro a epuri wi akhalle mukutho woopepesella machimo.

²⁵ Mullupa mukutho eere mutetho woopepesella machimo a Aisraele attheene nave athwaayo eneerokhululukelliwa ekaamba yawi yachimwalle moohidduwella nave wi yaawa wa Apwiya ni ddoovelleella ddiwa dda mukutho wawoosiwa viikho navettho mukutho woopepesella machimo wi yaapepeselle machimwiiwa.

²⁶ Aisraele attheene ni mulleto oyo anakhalla variyari viwa eneerokhululukelliwa vawi attheene yaachimwa moohidduwella.

²⁷ “Muthu mmodda achimwa moohidduwella, avelleelle epuri yaamutthiyana ya muyakha mmodda wi ekhalle mukutho woopepesella machimo.

²⁸ Sika vano mullupa mukutho amweerelle mutetho woomupepesella machimo vamiitthoni va Apwiya muthu oochimooyo nave aneerokhululukelliwa.

²⁹ Mukhalle ni lamulo nimoddamoddave va arive muthu oyo alakwille moohidduwella va Muisraele ni va mulleto oyo ari variyari vanyu.

³⁰ “Koma muthu oyo anachimwa mwaphudda, khaya tti Muisraele apaalle mulleto, ohaavevulla Apwiya nave muthooyo avenyihiwe variyari va Aisraele akhwaaye.

³¹ Ekaamba yawi oovevulla mawu a Apwiya nave khiiwellelle lamulo niwa, muthu yooyo emuvenyihevo nave tti oophwanella ollakiwa.”

Ohisunga nllapo na Sabata

³² Aisraele yaariiwa mu echipululu yaamuphwanya muthu aashaka ekhuni nllapo na Sabata.

³³ Muthooyo yaamukusella wa Mose ni Aroni vamodda ni wa athu attheene.

³⁴ Alliwa yaamuwallella mu endende ekaamba yawi kheyaadduwella phaama ddawi yeere.

³⁵ Vano Apwiya yaamulleella Mose wi, “Muthooyo iiphiwe. Aisraele attheene emuvokhe malluku otte wa misasa.”

³⁶ Enthawi yeeyo athwaayo yaamukhumihella muthooyo vaatte va misasa nave yaamwiipha voomuvokhani malluku moollikana ni mmo Apwiya yamulamulelliiwa Mose.

Dda manyenje

³⁷ Apwiya yaamulleella Mose wi

³⁸ alleelle Aisraele wi, “Va mibado ddanyu ddittheddene musowelleke manyenje mukhwipi mwa ddoowara ddanyu nave va erive manyenje musowellekevo mukwe wabululu.

³⁹ Manyenje yaayo mwawoona muupuwelleke malamulo mattheene a Apwiya wi muwiiwellelleke nave muhinathwaraka ddoopaalla dda murimaanyu apaalle dda miitthwaanyu nnddo ddinaweerihani wi muhiroromelleyeke.

⁴⁰ Mwawi ddiidda muneerekewuupuwella ni wiiwellella malamulwaaka mattheene wi mukhalle aweella vamiitthoni va Mullukwaanyu.

⁴¹ Mi tti Apwiya ayo yuukhumihalleni mu Iguputo wi kikhalle Mullukwaanyu. Mi tti Apwiya.”