Numeri 12 - Mawu a Mulluku

Ollakiwa wa Miriyamu

¹ Miriyamu ni Aroni yahaamba omullota Mose ekaamba ya mutthiyana a o Kushi amutthellilleeye vawi aamutthella mutthiyana a o Kushi.

² Alliwa yaakoha wi, “Ethiyo tti ddawoona wi Apwiya enallota oweella mwa Moseve? Ethiyo khenallotattho oweella mwa hiyaano?” Nave Apwiya yaaddiiwa ddenndda.

³ Mose aari awiiyeviha omukhwaranya arive muthu va ellapo yavatthi.

⁴ Vano Apwiya yaamulleella Mose, Aroni ni Miriyamu wi, “Araru attheenenyu muwe o musasa wamutthukumano.” Nave araru attheenaayo yaayaawo.

⁵ Apwiya yaakittha m'muraponi yiimella va mullako wa musasa emwiithana Aroni ni Miriyamu nave eellaayo yaasuserawo.

⁶ Nave yaallota wi, “Iwani mawaaka. Vakhalla namallotella variyari vanyumva, mi Apwiya kinnaddoonihella wa muthooyo oweella m'masomphenya nave kinnallotana oweella mu olloha.

⁷ Koma ngeerille ddiiddo ni oorumeyellaaka Mose oyo akhanlle aaweheraka athwaaka attheene Aisraele.

⁸ Kinnallotana vamiitthoni ni vamiitthoni mwawiiweya oohikhalla mookhuweya nave annoona ntitimiho naka. Kaambiiwa tini muhoovilleenyu omullota Mose, oorumeyellaaka?”

⁹ Vano Apwiya yahaananariwella nave yaavenyavo.

¹⁰ Murapooyo ovenyillevo vaddullu va musasa, Miriyamu moorurumusa aakhalla ni makate awi puu wonanko ntuura. Nave Aroni arukunuwalle aamoona Miriyamu ari ni makate.

¹¹ Vano Aroni aamulleella Mose wi, “Apwiyaaka, muhinanillaka ekaamba yawi noochimwa nave noheera ddookarangeya.

¹² Muhaakhullelle wi Miriyamu akhalle wonanko mwaana oyo ayariwe ookhweene oyo mwiillaaye ottaruwalle.”

¹³ Vano Mose ahaalleella mookhuwa Apwiya wi, “Mulluku kinimuuvekani wi mumuchirihe Miriyamu.”

¹⁴ Koma Apwiya yaamwaakhulla Mose wi, “Attiitthinnya yaamuttaphenreke owiitthoni, ethiyo Miriyamu khaawulliwe muru wa mallapo matthanu ni meelli? Muwallelleni otte wa misasa mallapo matthanu ni meelli nave vatulli viwa ttuumuvollochihattho”

¹⁵ Sika yaamuwallella otte wa misasa mallapo matthanu ni meelli. Nave athu kheyaatimullalle ophiyera emuvollochihalle Miriyamu.

¹⁶ Vano athwaalle yaatimulla o Hazeroti yatthipella misasa ddiwa o echipululu ya Parani.