Numeri 11 - Mawu a Mulluku

Nipuro naweeriwa Tabera

¹ Nllapo nimodda athu yaakhupanya Apwiya yiiwaka. Apwiya yiiwalliiwa ddenndda yaasha murima nave munllo wa Apwiya waakhara va athwaayo, oshellelliha misasa dda mukhwipi.

² Sika athu yahinllella wa Mose nave olliye aavekella wa Apwiya, enthawi yeeyo munllo waathiima.

³ Sika vano nipuronno yaanivaha nnddina nawi Tabera, ekaamba yawi munllo wa Apwiya waakhara variyari viwa.

Mose anaatthoolla oohoollella 70

⁴ Enthawi yeeyo athu awaanganyera ayo yaari variyari viwa yaakhalla ni ekhwillu. Aisraelettho yahaamba okhupanya, ellota wi, “Ttaani anaanivahe enama wi niyiche?

⁵ Ninnuupuwella ehomba ddoohillivella nnddo nacheehu o Iguputo, mihawa, mabubuda ni anyezi oohiyanahiyana.

⁶ Koma vano masivaahu aamalla, khaninoona erive yoocha koma manave.”

⁷ Manaayo yaanaphwanaphwana ni miittho amavilla nave yaari aweella.

⁸ Athu yaanaya yaatotaka manaayo, enaasilla apaalle waatthitta nave yaanawaapeya enaapanga buledi. Oddiva wiwa waari wonanko buledi awaapeyiwa m'makhurani.

⁹ Nikame naawimmaka vamisasanimvo erive mahiiyu, namorella nimodda ni mana.

¹⁰ Mose aawiiwa athwaalle yinllaka m'mabanjani mwiwa mutthemwene, arive muthu akeraatthille va mullako wa musasaaye. Apwiya yaasha murima wunchichi nave Mose aananariwattho.

¹¹ Mose ahaakoha Apwiya wi, “Kaambiiwa tini mukihoosilleenyu mwawi ddiidda mi oorumeyellaanyu? Kaambiiwa tini muhikeerelleenyu echifundo vookireyani katundu a athu attheenaalla?

¹² Ethiyo kakusalle erukullu ya athu attheenaalla tti miyaano? Ethiyo kaayarille tti miyaano? Kaambiiwa tti nyuwaano mukilleelleenyu wi kaakhupaarelleke wonanko mmo muyepelle aneerelleeye voomwaamwihani mwaana nave wi kaakuselle o ellapo eyo mwaalonjezilleenyu makhollwiiwa moollupella?

¹³ Ethiyo kinaayikuse wuuwi enama yawi kaavahe athu attheenaalla? Alliwaalla eninllella wa miyaano voollotani wi, ‘Nivaheni enama wi niche.’

¹⁴ Miyaano ngiwora wiireya meekhaami athu attheenaalla. Katundu yoolla ngiwora omutukhulla.

¹⁵ Vanothi mwaapaallaka okeerella echifundo tti waphaama wi mukiiphe ohiyana wi koone ddoohoosannddo.”

¹⁶ Apwiya yaamulleella Mose wi, “Waatthukumanihe allopwana 70 mwa attekweene a Aisraele, athu ayo onaadduwelleewe wi tti oohoollella ni akapitawo a athu. Oweena o musasa wamutthukumano nave yiimelle wenko ni weyaano.

¹⁷ Miyaano kineerokittha wi killote ni weyaano wenko. Kineerewaakawella munepa mmoddamoddave yooyo kuuvahilleemi. Nave alliwa eneerewuukavihera wiireya katundu a athwaayo wi ohiireyeke weekha.

¹⁸ Waalleelle athwaayo wi, ‘Muddeellihe okhozekella ddoosiisello nave muneerocha enama. Nyuwaano mwahinlla Apwiya yiiwaka valle mwalloteenyu wi, Ttaani anaanivahe enama. Vallethi ddeko ddaananeetalla phaama o Iguputo.’ Sika ekaambiiwa Apwiya enaawuuvaheewani enama nave muneeroyicha.

¹⁹ Khemuyicha nllapo nimoddave apaalle mallapo meellive apaalle mallapo matthanuve apaalle mallapo khumive meellive apaalle mallapo 20.

²⁰ Muneeroyicha mweeri muttheene ophiyera yuukhumalleni mphunani nave muneerovoriiwana. Ddenndda ddineereweereya ekaamba yawi mohaakhoota Apwiya ayo enakhalla variyari vanyu nave mookhupanya vamiitthoni viwa voollotani wi, ‘Kaambiiwa tini nakhumalleehu o Iguputo?’ ”

²¹ Mose ahaakhulla wi, “Athu kineeteeminaalla tti 600,000. Vano nyuwaano moollota wi, ‘Kineerewaavaha enama wi eche mweeri muttheene.’

²² Ethiyo ddinaawiiphiwe enkhosa apaalle epuri apaalle eng'ombe ddikavi wi ddikwakhwanelle? Ethiyo naari ehomba ddittheddene dda mu enyanja ttuukwakhwanella?”

²³ Apwiya yaamukoha Mose wi, “Ethiyo muwono wa Apwiya tti wookhuveya? Vano oneerewoona naanweene vaava ddeko nnddo killotilleemi ddeereyaka apaalle iyaayi.”

²⁴ Sika Mose aakhuma aalleella athu mawu a Apwiya. Ahaatthukumaniha athu 70 mwa attekweene a Aisraele yiimella moowaapheella musasa wamutthukumano.

²⁵ Vano Apwiya yaakittha m'muraponi yaamba ollota ni Mose. Nave yahaakawella attekweene 70 munepa mmoddamoddave yooyo yamuvahilliiwa waari mwa Mose. Athwaayo yaakhellilliiwa munepa yahaamba ollotella koma kheyaayiillena muhoollo.

²⁶ Athu eelli, Elidadi ni Medadi, yaahalla m'misasanimmo nave munepa waakhalla va alliwaayo. Yaari a m'mullokoni wa attekweene 70 koma kheyaayiillena o musasa wamutthukumano, sika yaanallotella m'misasani.

²⁷ Sika musombwe mmodda aathamaka amulleella Mose wi, “Elidadi ni Medadi enallotella m'misasani.”

²⁸ Vano Yoswa, mwaana a Nuni nave oomukavihera Mose ovenyera enamwanaaye, aallota wi, “Apwiyaaka Mose ahiiheni yaalla.”

²⁹ Koma Mose aamulleella wi, “Ethiyo onakikhupanyella miyaano. Keerohakallalla athu attheene a Apwiya yaariki anamallotella nave Apwiya yaakawelleke munepiiwa.”

³⁰ Vano Mose ni attekweene a Aisraele yaahokollweella omisasani.

Apwiya enaarumiha ayuurwe

³¹ Vano Apwiya yaheeriha wi ephevo yoope ovenyera o enyanja. Ephevweeyo yaawa ni ayuurwe nave yaamora vakhuviru moowaapheella misasannddo va olendo wookwakhwana nllapo nimodda. Yahuukaana nimita nimodda oya muddullu.

³² Athu yaaya yaawolla ayuurwaayo otthaana ni mahiiyu. Osaka wenettho nllapo nittheene yaheera emoddamoddave yeeyo. Khaavo naari mmodda oyo aawollille ooyeveella makilogaramu 1,000 nave yaawaaneya moowaapheella misasa mittheddenennddo.

³³ Enameeyo eri muwano, ehinamirye nuumirya wene, Apwiya yahaashella murima athwaayo nave yahaamorihella mullilli wawoopiha.

³⁴ Sika ekaambiiwa nipuronno navahiwiiwa nnddina nawi Mahame Akhwillu kaambiiwa wenko sika yaavitthalliiwa athu eekhwillu.

³⁵ Ovenyera o Mahame Akhwillunko athu yaaya o Hazeroti yakhalla wenko.