Numeri 10 - Mawu a Mulluku

Dda mapallapata a siliva

¹ Apwiya yaamulleella Mose wi,

² “Ohane mapallapata meelli a siliva. Yiipiweke voowiithanani athu ni vootimullani.

³ Yiipiwa meelliinaayo, athu etthukumane ni weyaano va mullako wa musasa wamutthukumano.

⁴ Koma niipiwa nimoddave, oohoollella a malloko a Aisraele sika enaatthukumaneke ni weyaano.

⁵ Niipiwa moochenjeza, malloko a wookhuma nndduwa etimulle.

⁶ Niipiwa moochenjeza waneepiilli, malloko a omwera etimulle. Sika niipiweke nipallapata noochenjeza enthawi ddittheddene yaatimullaka.

⁷ Koma vawaatthukumanihani athu, niipiweke nipallapata koma nihiipiweke nipallapata noochenjeza.

⁸ Anamwani a Aroni sika eniipeke mapallapata. Mutteko wa mapallapataalla tti lamulo wa enthawi yoohimalla wa mibado ddanyu ddittheddene.

⁹ Mwaayaaka woowana ekhoto mwiillaponi mwanyu ni adanaanyu ayo enuuhoosani, enthawi yeeyo mwiipe mapallapata wi Apwiya Mullukwaanyu kiwuupuwellekeni nave muneerovullusiwa wa adanaanyu.

¹⁰ Va mallapwaanyu oohakallalla, ootthoolliwa a Ehakallallo dda Wooneya wa Mweeri, mwiipe mapallapata mwaavelleellaka mikutho ddooshellelliha ni mikutho ddeeyaattano. Mapallapataayo eneerewuukaviherani wi kiwuupuwellekeni. Mi tti Apwiya Mullukwaanyu.”

Dda mmo enaaweetellekiiwa

¹¹ Va nllapo na 20 na mweeri waneepiilli muyakha waneepiilli, murapo waawella ovenyera vamusasani wamutthukumano.

¹² Vano Aisraele yaatimulla m'millokoni ddiwa ovenyera o echipululu ya Sinai ophiyera murapooyo wiimenlle mu echipululu ya Parani.

¹³ Wenngu waari wawaamba wi Aisraele etimulle Apwiya elamulalle oweella mwa Mose.

¹⁴ Oothwara embendela dda misasa dda nlloko na Yuda sika yaambille otimulla m'millokoni mwiwa nave oohoollella a nlloko niwa aari Nashoni, mwaana a Aminadabu.

¹⁵ Oohoollella a nlloko na Isakara aari Netanele, mwaana a Zuwara.

¹⁶ Oohoollella a nlloko na Zebuloni aari Eliyabu, mwaana a Heloni.

¹⁷ Vano musasa wa mutthukumano otulliwe Agereshoni ni Amerari, otukhulla musasa wa mutthukumano, yaatimulla.

¹⁸ Vatulli viwa oothwara embendela ya misasa dda nlloko na Rubeni yaatimulla m'millokoni nave oohoollelliiwa aari Elizuri, mwaana a Sedeuri.

¹⁹ Oohoollella a nlloko na Simeoni aari Selumiele, mwaana a Zurishadai.

²⁰ Oohoollella a nlloko na Gadi aari Eliyasafu, mwaana a Deuwele.

²¹ Vano Akohati yaatimulla etukhullalle ddeko ddoopatuleya. Musasa wamutthukumano waari omakiwe khalle alliwa ehinaphiye.

²² Vatulli viwa oothwara embendela ya misasa dda nlloko na Efuremu yaatimulla m'millokoni nave oohoollella aari Elishama, mwaana a Amihudi.

²³ Oohoollella a nlloko na Manase aari Gamaliele, mwaana a Pedazuri.

²⁴ Oohoollella a nlloko na Benjamini aari Abidani, mwaana a Gideoni.

²⁵ Voomallihella oothwara embendela ya misasa dda nlloko na Dani ayo yaari mutulli mwa athu a m'misasani ddittheddene, yaatimulla m'millokoni nave oohoollelliiwa aari Ahiyezere, mwaana a Amishadai.

²⁶ Oohoollella a nlloko na Ashere aari Pagiyele, mwaana a Okarani.

²⁷ Oohoollella a nlloko na Nafutali aari Ahira, mwaana a Enani.

²⁸ Mmu tti mmo yeetella Aisraele yaatimullaka m'millokoni.

²⁹ Mose aamulleella Hobaba mullamwaaye, mwaana a Reuele a o Midiyani wi, “Ninaya onipuroni nko Apwiya yallotilliiwa wi, ‘Kineerewuuvahani.’ Hankoni nithaanane nave nineeroweerellani ddaphaama vawi yahaalonjeza Aisraele ddeko ddaphaama.”

³⁰ Olliye ahaakhulla wi, “Nguuthwarani koma kinaaye owanihu wa abalaaka.”

³¹ Nave Mose aallota wi, “Ohinanihiya vawi weyaano onnadduwella mvo ninaatthipelleehu misasa muchipululunimmu nave onaakhalle miitthwaahu.

³² Wathaanana ni hiyaano, ddittheddene ddaphaama nnddo Apwiya enaaneerelliiwa, nineeroweerella ddennddo.”

Otimulla wa athu

³³ Sika yaatimulla ovenyera va mwaango wa Apwiya, yeeta olendo wa mallapo mararu. Yaahoolla ni nibokosi na echipangano na Apwiya wi athu attheenaalle yaphwanye nipuro nawiithuuwellavo.

³⁴ Murapo wa Apwiya waanaakhuneella otthaana erive enthawi yaatimullaka.

³⁵ Erive enthawi nibokosi na echipangano naatimullaka, Mose aanallota wi, “Nyu Apwiya venyani, mwaamware adanaanyu. Attheene awiitana ni nyuwaano ethawe vamiitthoni vanyu.”

³⁶ Murapooyo wiimella, Mose aanallota wi, “Apwiya hokollweellani wa Aisraelaanyu ooheerengeya.”