Numeri 1 - Mawu a Mulluku

Mose anaweerenga Aisraele vawaamba

¹ Apwiya yaallota ni Mose mu echipululu ya Sinai, mu musasa wamutthukumano, nllapo nawaamba na mweeri waneepiilli, muyakha waneepiilli ekhumalle mu ellapo ya Iguputo. Nave yaamulleella wi,

² “Oweerenge athu attheene a malloko mattheene a Aisraele moollikana ni mabanjiiwa navettho makhollwiiwa. Olembe nnddina na arive mullopwana mmodda mmodda.

³ Weyaano ni Aroni muweerenge athu, mulloko ni mulloko ovenyera a miyakha 20 oya muhoollo, sika wi athu attheene oowora owana ekhoto.

⁴ Mumukuse muthu mmodda nirive nlloko, oohoollella nibanja wi uukavihereni vaweerengani.”

⁵ “Manddina a athu ayo enaawuukavihere tti, Elizuri mwaana a Sedeuri a nlloko na Rubeni,

⁶ Selumiele mwaana a Zurishadai a nlloko na Simeoni,

⁷ Nashoni mwaana a Aminadabu a nlloko na Yuda,

⁸ Netanele mwaana a Zuwara a nlloko na Isakara,

⁹ Eliyabu mwaana a Heloni a nlloko na Zebuloni.

¹⁰ Mwa edduullu dda Yosefe anaawukavihereni tti, Elishama mwaana a Amihudi a nlloko na Efuremu, Gamaliele mwaana a Pedazuri a nlloko na Manase,

¹¹ Abidani mwaana a Gideoni a nlloko na Benjamini,

¹² Ahiyezere mwaana a Amishadai a nlloko na Dani,

¹³ Pagiyele mwaana a Okarani a nlloko na Ashere,

¹⁴ Eliyasafu mwaana a Deuwele a nlloko na Gadi,

¹⁵ Ahira mwaana a Enani a nlloko na Nafutali.”

¹⁶ Yaalla sika yatthoolliwe mu nirive nlloko, oohoollella mabanja, attekweene a malloko a Aisraele.

¹⁷ Mose ni Aroni yahaakusa allopwana eromolliwaalla.

¹⁸ Vano va nllapo nawaamba na mweeri waneepiilli, yahaatthukumaniha athu attheene. Nave Aisraele yaalembiha mannddiniiwa moollikana ni mabanjiiwa navettho makhollwiiwa. Yeerengiwe yaari athu oovenyera miyakha 20 oya muhoollo, mullopwana mmodda mmodda,

¹⁹ moollikana ni mmo Apwiya yamulamulelliiwa Mose. Sika Mose aaweerenga athwaayo mu echipululu ya Sinai.

²⁰ Mwa edduullu dda Rubeni, mwaana awaamba a Yakobo yaaweerenga manddina a allopwana oowora owana ekhoto a miyakha 20 oya muhoollo moollikana ni mabanjiiwa nave makhollwiiwa.

²¹ Vano eweerengille manddina mattheene a nlloko na Rubeni yaaphwanya wi yaari 46,500.

²² Mwa edduullu dda Simeoni yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

²³ Vano eweerengille manddina mattheene a nlloko na Simeoni yaaphwanya wi yaari 59,300.

²⁴ Mwa edduullu dda Gadi yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

²⁵ Vano eweerengille allopwana attheene a nlloko na Gadi yaaphwanya wi yaari 45,650.

²⁶ Mwa edduullu dda Yuda yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

²⁷ Vano eweerengille allopwana attheene a nlloko na Yuda yaaphwanya wi yaari 74,000.

²⁸ Mwa edduullu dda Isakara yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

²⁹ Vano eweerengille allopwana attheene a nlloko na Isakara yaaphwanya wi yaari 45,650.

³⁰ Mwa edduullu dda Zebuloni yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

³¹ Vano eweerengille allopwana attheene a nlloko na Zebuloni yaaphwanya wi yaari 57,400.

³² Mwa edduullu dda Yosefe, athu a nlloko na Efuremu, yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

³³ Vano eweerengille allopwana attheene a nlloko na Efuremu yaaphwanya wi yaari 40,500.

³⁴ Mwa edduullu dda Manase, athu a nlloko na Efuremu, yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa,

³⁵ Vano eweerengille allopwana attheene a nlloko na Manase yaaphwanya wi yaari 32,200.

³⁶ Mwa edduullu dda Benjamini, yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa

³⁷ Vano eweerengille allopwana attheene a nlloko na Benjamini yaaphwanya wi yaari 35,400.

³⁸ Mwa edduullu dda Dani, yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

³⁹ Vano eweerengille allopwana attheene a nlloko na Dani yaaphwanya wi yaari 62,700.

⁴⁰ Mwa edduullu dda Ashere yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

⁴¹ Vano eweerengille allopwana attheene a nlloko na Ashere yaaphwanya wi yaari 41,500.

⁴² Mwa edduullu dda Nafutali yaaweerenga manddina a allopwana attheene oowora owana ekhoto a miyakha 20 oya muhoollo moollikana ni mabanjiiwa navettho makhollwiiwa.

⁴³ Vano eweerengille allopwana attheene a nlloko na Nafutali yaaphwanya wi yaari 53,400.

⁴⁴ Yaalla tti athu ayo Mose ni Aroni yaweerengilliiwa mookaviheriwa ni oohoollella a Aisraele khumi ni eelli ayo yiimellella mallokwiiwa.

⁴⁵ Sika allopwana attheene a mu Israele oowora owana ekhoto ovenyera miyakha 20 oya muhoollo moollikana ni mabanjiiwa,

⁴⁶ yaari 603,550.

⁴⁷ Mabanja a Alevi kheyaawerengiwe ni amoddaayo

⁴⁸ kaambiiwa Apwiya yaamulleella Mose wi,

⁴⁹ “Nlloko na Levi ohinaneerenga nave mannddiniiwa ohinaalembella ni Aisraele amoddaayo.

⁵⁰ Koma waakuse Alevaayo wi epwatheke musasa wamutthukumano wa omboni, ezipangizo ddiwa ni ddittheddene ddiri mwemmo. Ewutukhulleke musasooyo ni ezipangizo ddiwa nave ewupwatheke. Misasa ddiwa edditthipelleke moowaapheella musasa wamutthukumanooyo.

⁵¹ Athu yaatimullaka Alevi sika enaawutulleke musasa wamutthukumanooyo nave athu yaawiimellaka, Alevaayo sika enaatthipelleke musasa wamutthukumanooyo. Arive muthu oyo anaawaatamelle iiphiweke.

⁵² Aisraele etthipelleke misasa ddiwa m'millokoni, orive mulloko vamisasani ddiwa vakhuviru ni embendeliiwa.

⁵³ Koma Alevi etthipelle misasa ddiwa moowaapheella musasa wa mutthukumano wi kihaallutuwelle Aisraele. Alevi sika enaawehereke musasooyo.”

⁵⁴ Mmu sika yeerelle Aisraele. Yaheera ddittheddene moollikana ni mmo Apwiya yamulamulelliiwa Mose.