Nehemiya 8 - Mawu a Mulluku

Ezara anaweerengella athu malamulo

¹ Voophiyani mweeri waneetthanu ni piilli, Aisraele yaari ekeraattheyille m'mapuroni mwiwa. Vano athu attheene yaatthukumana vamodda vanthatoni moowehana ni mullako wa Maaddi. Vano athwaayo yaamuveka Ezara namalembella wi aweena nibukhu na malamulo a Mose nno Apwiya yaavahilliiwa Aisraele.

² Vano Ezara mullupa mukutho aawaana nibukhunno vamiitthoni va athu yatthukumanillaayo, allopwana, atthiyana ni anamwani ayo yawora wiiwesesa phaama.

³ Vano Ezara aheerenga ovenyera munibukhunimmo ari moowehana ni nthato na maaddi waambeella ohinase ophiyera otthaana vamiitthoni va allopwana, atthiyaana ni anamwani ayo yawora wiiwesesa phaama. Sika athu attheene yahaapella maaru o nibukhu na malamulo neerengiwanno.

⁴ Nave Ezara namalembella ahiimella va nttattha namiteekho nno yanimakilliiwa ekaamba ya mutthukumanooyo. Onnattanatta waye wiimenlle Matitiya, Shema, Anaya, Uriya, Hilikiya ni Maaseiya. Wuunyotthoni waye wiimenlle Pedaya, Mishaele, Malikiya, Hashumu, Hashibadana, Zekariya ni Meshulamu.

⁵ Nave Ezara iimenlle vanttatthanimvo aakhunuulla nibukhunne athu attheenaalle yoonaka nave yahiimella.

⁶ Sika Ezara ahaatitimiha Apwiya Mulluku Muullupalli. Vano athu attheene yahaakhulla wi, “Amen, Amen” etukhullelle mattiiwa muddullu nave yaakokhora yaallapella Apwiya.

⁷ Athwaayo yiimenllettho Alevi yahaakavihera wi yiiwesese malamulo. Alevaayo tti Yeshuwa, Bani, Sherebiya, Yamini, Akubu, Shabetayi, Hodiya, Maaseiya, Kelita, Azariya, Yozabadi, Hanani ni Pelaya.

⁸ Nave yaheerenga mwawiiweya phaama malamulo a Mulluku ovenyera munibukhunimmo nave yahaattaphullella mawaayo wi athu yiiwesese phaama.

⁹ Vano Nehemiya oyo aari enduna, Ezara mullupa mukutho ni namalembella, Alevi ayo yaahuddiha athu yaallota wa athu attheene wi, “Nllapo nenna tti naweella wa Apwiya Mullukwaanyu, sika muhimoriwe ethakaraka ni winlla.” Vawi athu attheene yahinlla mvo yiiwalliiwa mawu a malamulwaayo.

¹⁰ Sika aallota wi, “Khaweni mwache machellello ni omuwirya vinyo ooddiva. Mukawanena athu ayo ehinna ddookwakhwanella vawi ollello tti nllapo naweella wa Apwiya Mullukwaahu. Vano muhimoriwe ethakaraka vawi ehakallallo ya Apwiya sika masivaanyu.”

¹¹ Sika Alevi yahaakhurumusa athu attheene nave yahaalleella wi, “Muhunllettho wiilli vawi ollello tti nllapo naweella sika muhimoriwe ethakaraka.”

¹² Nave athu attheene yaarowa owaniwa wi yache ni owirya navettho wi yaakawelle athu amodda ddoocha wi yeereye ehakallallo yuullupalli ekaamba yawi yahiiwesesa mawu a malamulo ayo yeerengiwe wa alliwa.

Ehakallallo ya Misasa

¹³ Va nllapo naneepiilli oohoollella mabanja a athu attheene, allupa mukutho ni Alevi yaatthukumana vamiitthoni va Ezara namalembella wi ehuddere mawu a malamulo.

¹⁴ Vano yahoonattho wi Apwiya yahaalamula Aisraele oweella mwa Mose wi ekhalleke m'misasani ddootiyerella enthawi ya Ehakallallo ya Misasa mweeri waneetthanu ni piilli,

¹⁵ wi evuwiheke ni ollalleya m'mizi ddiwa ddittheddene navettho mu Yerusalemu wi, “Khaweni omiyaangoni nave mwaweena enthambi dda muteekho wa olivi awaalla ni amuhakani, dda miteekho dda mchisu, mukwarangwa ni ddimodda dda makukhu anchichi wi mumakelle misasannddo moollikana ni mmo ddilembelliwiiwa.”

¹⁶ Sika athu yaaya yaasha enthambinndde ewaana nave yaamaka misasanndde, arive muthu vaddullu va enyumbaaye apaalle va nthato naye navettho mu mathato a enyumba ya Mulluku, va mathato a mullako wa Maaddi ni a mullako wa Efuremu.

¹⁷ Vano athu attheene ayo yahokollowille wuukaporoni yaamaka misasa enakhalla mwemmo nave yaahakallalla wunchichi vawi waambeella enthawi ya Yoswa mwaana a Nuni ophiyera nllapo nenno, Aisraele yaari ehineereke ddenndda.

¹⁸ Nave nllapo ni nllapo, waambeella nllapo nawaamba ophiyera nllapo nookomihera, Ezara aaneerenga ovenyera mu nibukhu na malamulo a Mulluku. Athu yaheera ehakallallo mallapo matthanu ni meelli nave va nllapo naneetthanu ni raru vaheereya mutetho woowallella mutthukumano moollikana ni nibukhu na malamulonne.