Nehemiya 6 - Mawu a Mulluku

Ovirellella wa ovaanyiha mutteko

¹ Sanibalati, Tobiya, Geshemu Mwarabu navettho adanaahu amodda yahiiwa wi noomalliha omakattho mpanda nave wi khaviivo vamodda vihanlle (naarive wi ophiyera enthawi yeeyo ngaamakellelle machiwi m'millakoni mwiwa).

² Vano Sanibalati ni Geshemu yaakirumihella mawu oollota wi, “Ngawani nikumanelle mwa mmodda mwa mizi dda mu ntapo na Ono.” Koma wenko yapaalla yakeerelle yoonanara.

³ Nave kahaarumihawo amithengaaka yaalleella wi, “Mi kookhalla ni mutteko muullupalli nave ngiwora okitthella wenko. Ethiyo mutteko wiimelle ekaamba yawi koowuhiya kiwa wa nyuwaano?”

⁴ Sika yaakirumihella othenga omoddamoddave olendo osese nave kaawaakhulla emoddamoddave yeeyo.

⁵ Vaavo Sanibalati aamurumiha mullupa muttekwaaye ni othenga waneetthanu, kalata oottaphullattaphulla m'mattani mwaye.

⁶ Mukalatanimmo mwalembiwe wi, “Wohiiweya variyari va mitundu ddimodda nave Geshemu annallotattho emoddamoddave yeeyo wi nyuwaano vamodda ni Ayuda munapaalla owukila. Sika ekaambiiwa munamakeenyu esiri dda mpanda nave wohiiweyattho wi munapaalla mukhalle mweniiwa.

⁷ Mohaahiyawottho anamallotella wi ellalleyeke dda nyuwaano mu Yerusalemu wi, ‘Vano mu Yuda mookhalla mwene.’ Vano amwene enerotthopoollelliwa mawaalla. Sika waani nikambirane attheene vamodda.”

⁸ Sika kaamurumihella mawu awi, “Mullotilleenyunnddo kheddeereyille vawi munimoona oddiganizera m'murimani mwanyu.”

⁹ Vawi attheene yapaalla onoopopiha vooganizani wi Ayuda eneerohiya muttekooyo nave khovirellella. Koma vano Mulluku, llipihani mattaaka.

¹⁰ Vano kivollowille mpa mwa Shemaya mwaana a Delaya, mwaana a Mehetabele oyo akhalla mpave aakilleella wi, “Hankoni nakumane mu enyumba ya Mulluku nave niiwallelle vawi enimawa mahiiyu wi ewiipheni.”

¹¹ Koma kahaakhulla wi, “Ethiyo muthu wonanko miyaano ttuuthawa? Nave muthu wonanko miyaano ttuuwiipittha mu enyumba ya Mulluku wi kiivulluse? Ngivollowamo miyaano.”

¹² Sika kahoona wi Mulluku khaamurumalle koma akillotella ddenndda ekaamba yawi Tobiya ni Sanibalati sika yamulembille mutteko yoolla.

¹³ Yamulembille mutteko yoolla wi ekoopopihe nave kichimwe. Vano keera ddiiddo ekivahe nnddina noonanara navettho ekinyemulleke.

¹⁴ Mullukwaaka, wuupuwelleni Tobiya ni Sanibalati moollikana ni yeerilliiwanndda navettho namallotella aamutthiyana, Nowadiya, owaaka anamallotella amodda yapaalla okoopopiha.

Omallihiwa wa mutteko

¹⁵ Sika esiri ya mpanda yaamallihiwa omakiwattho va nllapo na 25 na mweeri wa Eluli, sika wi viviralle mallapo 52.

¹⁶ Nave adanaahu yiiwalle yeella, mitundu ddittheddene ddoonaapheella, kaawiithaniha allupa mukutho nave kahaallupelliha vawi yaadduwella wi muttekoolla wakwakhwanihiwe ni okavihera wa Mullukwaahu.

¹⁷ Enthawi yeeyo oohoollella a Ayuda yaari erumihellane makalata manchichi ni Tobiya.

¹⁸ Vawi athu anchichi o Yuda yaallupella wi eneerewiiwananana ekaamba yawi aari mukamwene a Shekaniya mwaana a Ara nave mwanaye Yehohanani amutthellille mwaana a Meshulamu mwaana a Berekiya.

¹⁹ Yaallotattho ddaphaama ddaye vamiitthoni vaka nave yaamulleella erive ello kalloteemi. Nave Tobiya aarumiha makalata wi akoopopihe.