Nehemiya 5 - Mawu a Mulluku

Nehemiya anaakavihera athu oonyingallelliwa

¹ Vano athu amodda, allopwana ni atthiyana yahaamba okhupanya wunchichi ekaamba ya Ayuda akhwiiwa.

² Vawi yaallota wi, “Hi ni aniihu aallopwana ni aatthiyana nirivo anchichi mwawi ninapaalla yoocha wi nikhalle ni okumi.”

³ Athu amodda yaallotattho wi, “Ninnapolleyiha emata ddahu, emata ddahu ddampesa ni enyumba ddahu wi niphwanye yoocha ekaamba ya ettalla.”

⁴ Nave athu amodda yaallotattho wi, “Nookongola makobiri wi nikhome musonkho wa mwene wa emata ddahu ni emata ddahu ddampesa.

⁵ Vano naari niri a mutundu mmoddave ni akhwiihwaalla nave wi aniihu ennaphwanaphwana ni aniiwa, ninnaawatihera aniihu wi ekhalle akaporo nave amodda mwa aniihu aatthiyana aaphariwa khalle okaporo. Komathi hiyaano khaninna masiva wi neerevo ello vawi athu amodda aanaakha khalle emata ddahu ni emata ddahu ddampesa.”

⁶ Vano kiiwalleemi okhupanya wiwanko, kaasha murima wunchichi.

⁷ Sika kaaganiza m'murimani mwaka wi keerevo ello nave kahaahumullulla attekweene ni oohoollella voollotani wi, “Ethiyo tti ddawoona wi munimallivellihana naviikho anayaayove!” Nave kahiithaniha mutthukumano muullupalli wi kiwiipe mullatu.

⁸ Nave kaallota ni alliwa wi, “Naawora owoopolla Ayuda akhwiihu ayo yiikullihalle wa mitundu ddimodda koma vano nyuwaano munaawatihera wi yiikullihe wa nyuwaano!” Athwaayo yaari mi ellapo tuu orama yoollota.

⁹ Vano kaavirellella ollota wi, “Muneereenyunndda khe ddaphaama. Ethiyo nyuwaano khemunaphwanella omoova Mullukwaahu wi adanaahu a mitundu ddimodda ehininyaambuseke?

¹⁰ Ello emodda tti yawi miyaano, abalaaka ni mullupa muttekwaaka nahaakongoliha makobiri ni tirigu oohaakhella naviikho. Hankoni nihiye dda naviikho.

¹¹ Pepaani, ollello vaava mwaahokolloselle emata ddiwa, emata ddiwa ddampesa, miteekho ddiwa dda olivi ni enyumba ddiwa nave mwaakhululukelle naviikho a makobiri, a tirigu, a vinyo ni a makhura mwaakongolihalleenyu.”

¹² Vano alliwaayo yahaakhulla wi, “Nineerewaahokollosella ddittheddenenndda nave khenikusavo ello. Nineereweera wonanko mmo mullotelleenyu.” Vaavo kaawiithaniha allupa mukutho nave kahaallupelliha wi yeere moollikana ni mmo yalonjezilliiwa.

¹³ Vano kaattaphulla kittattha yoowaraaka killota wi, “Emoddamoddave yeeyottho Mulluku amuttatthe arive muthu ahinaaweere nnddo alonjezilleeye. Sika yooyo attatthiwe nave ahoowe, ahikhalle ni ello.” Nave mutthukumano muttheene wahaakhulla wi, “Amen” wahaatitimiha Apwiya. Nave athu yaheera nnddo yalonjezilliiwa.

Oreera murima wa Nehemiya

¹⁴ Navettho waambeella enthawi eyo katthoolliweemi wi kikhalle enduna mu ellapo ya Yuda ovenyera muyakha wa 20 ophiyera muyakha wa 32 wa omwene wa Aritakisereksesi, sika wi miyakha khumi ni miilli, miyaano naari abalaaka khaarivo oyo achille yoocha yoophwanella enduna.

¹⁵ Koma enduna nnddo ddaarivo miyaano kihinakhallevo ddaanaahoosa athu vawaallivellihani yoocha, vinyo ni makobiri 40 a siliva. Naari owaarumeyelliiwa yaanaahoosattho athu. Koma miyaano ngeerille ddennddo vawi kaanamoova Mulluku.

¹⁶ Kaanallipihellattho ni masivaaka mattheene ophara mutteko woomakattho esiri dda muzinda nave ngaawiiphwanyelle emata navettho mullupa muttekwaaka attheene yatthukumanesa wenko epharaka muttekooyo.

¹⁷ Navettho nllapo ni nllapo kaanaachiha athu ookwakhwana 150, Ayuda, oohoollella ni ayo yaweesa wa hiyaano ovenyera o mitundu ddimodda ddanaapheelle.

¹⁸ Vano yoocha ya va nllapo nimodda yaari eng'ombe emodda, enkhosa ddooneneva dditthanu ni emodda navettho anakhu anchichi nave voomallani erive mallapo khumi, kaanamuvelleella vinyo munchichi. Komave naari ddaari ddiidda, ngaapaallille waakhella yoocha eyo enduna ddaakhellesiiwa ekaamba yawi athwaaka yahaatelliwa wunchichi.

¹⁹ Nyuwaano Mullukwaaka, upuwellani ddaphaama ddittheddene kiweerelleemi athwaalla.