Nehemiya 4 - Mawu a Mulluku

Ovaanyiha mutteko

¹ Vano Sanibalati iiwalleeye wi naamakattho mpanda, aasha murima nave ahaattheya Ayuda mweepewe.

² Nave aallota vamiitthoni va abalaaye ni vamiitthoni va mulloko wakhoto wa o Samariya wi, “Ethiyo Ayuda oohikhalla ni muttekwaalla eneeravo tini? Ethiyo enaganiza wi ttuumakattho muzindoolla? Ethiyo ttuuvelleellattho mikutho? Ethiyo ttuumalliha nllapo nimodda? Ethiyo ttuuvenyihattho malluku akhalle m'matepeni ayo eshille?”

³ Nave Tobiya Muamoni oyo aari ni olliye aallota wi, “Mpanda enamakiiwooyo khatwe arimawellavo, ttuukumuwa.”

⁴ Vano kaavekella wi, “Naapelleni maaru Mullukwaahu vawi ninimanyaambusiwa. Onyaambusa wiwa waahokollweelle weekhiiwa nave epharelliwe okaporo mu ellapo yeelleto.

⁵ Muhaakhululukelle ddoolakwa ddiwa nave muhivuhellelle machimwiiwa vawi yoottatthamulla owallaanyu vamiitthoni va athu eeruso yoomaka.”

⁶ Sika naamakave mpanda nave mpanda muttheene waamallihiwa omakiwa ophiyera hafu oya muddullu vawi athu yaaphara mutteko mwawiivelleella.

⁷ Koma Sanibalati, Tobiya, Aarabu, Aamoni ni Aasidodi yiiwalliiwa wi mutteko woomaka mpanda wa Yerusalemu onnavirellella nave wi mapuro a mpanda ookumuwaalle aamakiwattho, yaananariwa wunchichi.

⁸ Vano yahiiwanana ddoohella ekhoto o Yerusalemu wi yaanganyere m'muzindanimmo.

⁹ Naavekella wa Mullukwaahu nave nahaahiyavo alonda wi enitetezeke wa adanaahu otthaana ni mahiiyu.

¹⁰ Koma Ayuda yaallota wi, “Athu oophara mutteko aatopa nave mutteko wootathilla ddookumuwa wohunnuwa mwawi khannawora ophara mutteko vampandanimvo.”

¹¹ Nave adanaahu yaallota wi, “Khedduwella apaalle woona ophiyera niphiyalle variyari viwa ni owiipha sika muttekooyo oneerewiimella.”

¹² Vano Ayuda ayo yakhalla vakhuviru ni alliwa yaawa ellota ni hiyaano okhumi wi, “Orive weko alliwa enaakhalliiwawo eneerekowa wi ellipaneke ni hiyaano.”

¹³ Sika erive embali ya mpanda yookittha eyo yaari ehinamalle omakiwattho, muwari mwiwa kahaahiyamo athu moollikana ni mabanjiiwa eri ni masupadiiwa, mavakiiwa ni miira ddiwa.

¹⁴ Koma kaaweha, kivenya nave killota wa athu oolamulella, owaahoollella ni athu amodda attheene wi, “Muhiwooveke. Upuwellani wi Apwiya tti uullupalli ni awoopiha navettho ennaawanella ekhoto abalaanyu, aniinyu, awarinyu ni enyumba ddanyu.”

¹⁵ Adanaahu yoonilliiwa wi naadduwella nave wi Mulluku aalepheliha echiwembu yakhozilliiweeyo, attheene naahokollweella omuttekoni woomakattho mpanda, arive muthu omuttekoni waye.

¹⁶ Waambeella nllapo nenno oya muhoollo, hafu a athwaaka yaanaphara mutteko woomaka nave hafu mmodda aanawehera awanre ddoowara ddawiitetezella eri ni mavaka, ezishango ni miira. Vano oohoollella yahaakavihera athu

¹⁷ ayo yamakattho esireeyo. Naari ayo yatukhulla ddeko ddoomakella yaphara mutteko ni nnatta nimodda nngu etukhullalle echida o nnatta nimodda.

¹⁸ Nave arive muthu a oomakaayo aamakellella nsupada naye muyuununi mwaye voopharani muttekoolle. Koma muthu awiipa nipallapata aari vakhuviru ni miyaano.

¹⁹ Nave kaallota ni attekweene, ohoollella ni athu amodda wi, “Muttekoolla tti muullupalli nave woomwareyella o echigawo yuullupalli navettho niri moorekamellana muthu ni mukhwaaye vasirinimva.

²⁰ Mwiiwa winlla wa nipallapata m'mapuroni mwanyummo, muthamakelle nko niriihu. Mullukwaahu aneeroniwanella ekhoto.”

²¹ Sika hafu a amoddahi aphara mutteko nave hafu mmodda awehera atukhullalle mavaka waambeella oyaaka ni osa ophiyera wooneya wa etheneeri.

²² Va enthawi yeeyo kaallotattho wa athu wi, “Athu attheene vamodda ni ookavihera ekone mu Yerusalemu wi ewehereke mahiiyu ni ophara mutteko otthaana.”

²³ Sika wi naari miyaano, akhwaaka, mullupa muttekwaaka navettho athu ooniteteza khaarivo naari muthu mmodda arulla ddoowara ddaye vookonani. Arive muthu aanasunga echidaaye yakhoto m'mattani mwaye.