Nehemiya 3 - Mawu a Mulluku

Manddina a athu eeruso oomakattho Yerusalemu

¹ Vano Eliyashibu mullupa mukutho muullupalli ni allupa mukutho akhwaaye yahaamba omakattho mullako wa Enkhosa. Yaawupatula nave yaapangellavo machiwiiwa. Yaayimakattho esiri eyipatula ophiya o nttattha na Handredi eya yaphiya o nttattha na Hananele.

² Vano esiri yawaatamana ni ya Eliyashibu yamakiwettho ni athu a o Yeriko nave esiri yawaatamana ni ya athu a o Yeriko yamakiwettho ni Zakuri mwaana a Imuri.

³ Athu a nibanja na Hasena yaamaka mullako wa Ehomba emakellella maferemu vamodda ni machiwiiwa, ddoowallella ni ddoollipiha ddiwa.

⁴ Vano esiri yawaatamana ni ya a nibanja na Hasena yamakiwettho ni Meremoti mwaana a Uriya mwaana a Hakozi nave esiri yawaatamana ni ya Memoreti yamakiwettho ni Meshulamu mwaana a Berekiya mwaana a Meshezabele nave esiri yawaatamana ni ya Meshulamu yamakiwettho ni Zadoki mwaana a Baana.

⁵ Vano esiri yawaatamana ni ya Zadoki yamakiwettho ni athu a o Tekowa koma oohoollelliiwa yaakhota ophara mutteko wa akapitawiiwa.

⁶ Yoyada mwaana a Paseya ni Meshulamu mwaana a Besodeiya yaamakattho Mullako Wakhalle emakellella maferemu vamodda ni machiwiiwa, ddoowallella ni ddoollipiha ddiwa.

⁷ Vano esiri yawaatamana ni ya Paseya ni Meshulamu yamakiwettho ni Melatiya Mugibiyoni, Yadoni Mumeronoti navettho athu a o Gibiyoni ni a o Mizipa ayo yalamulelliwa ni enduna ya vakhopella va muhinje.

⁸ Vano esiri yawaatamana ni ya Melatiya Mgibiyoni, Yadoni Mmeronoti navettho athu a o Gibiyoni ni a o Mizipa yamakiwettho ni Uziyele mwaana a Haraiya mmodda a athu eeruso yoohana golide nave esiri yawaatamana ni ya Uziyele yamakiwettho ni Hananiya mmodda a athu oopanga makhura. Yaamakattho ophiya o Esiri Yooramballalla.

⁹ Vano esiri yawaatamana ni Hananiya yamakiwettho ni Refaiya mwaana a Huri oyo aari oolamulella a hafu a muzinda wa Yerusalemu.

¹⁰ Vano esiri yawaatamana ni Refaiya yamakiwettho ni Yedaya mwaana a Harumafa eyo yawehana ni enyumbaaye nave esiri yawaatamana ni ya Yedaya yamakiwettho ni Hatushi mwaana a Hashabuneiya.

¹¹ Esiri yawaatamana ni ya Hatushi navettho nttattha na Eng'anjo ddamakiwettho ni Malikiya mwaana a Harimu navettho Hashubu mwaana a Pahatimowabu.

¹² Esiri yawaatamana ni ya Malikiya navettho Hashubu yamakiwettho ni Shalumu mwaana a Haloheshi oolamulella a hafu mmodda a muzinda wa Yerusalemu vamodda ni anaaye aatthiyana.

¹³ Hanuni vamodda ni athu a o Zanowa yaamakattho mullako wa Ntapo emakellella maferemu vamodda ni machiwiiwa, ddoowallella ni mikoko ddoollipa. Yaamakattho esiri orekama wiwa mamita 400 ophiya o mullako wa Mashi.

¹⁴ Malakiya mwaana a Rekabu oolamulella a echigawo ya Betehakeremu aamakattho mullako wa Mashi. Aamakellella maferemu vamodda ni machiwiiwa, ddoowallella ni mikoko ddoollipa.

¹⁵ Nave Shalumi mwaana a Kolihoze oolamulella a echigawo ya Mizipa aamakattho mullako wa Neetuutu awuthunyella. Aamakellella maferemu vamodda ni machiwiiwa, ddoowallella ni mikoko ddoollipa. Aamakattho esiri ya nthiya na Shela ya emata ya mwene ophiya o masitepe ooya vatthi vookhumani mu muzinda wa Davide.

¹⁶ Vano esiri yawaatamana ni ya Shalumi yamakiwettho ni Nehemiya mwaana a Azibuki oolamulella hafu a echigawo ya Betezuri ophiya o nipuro na mahame a Davide ophiya o ehime navettho o enyumba ya akhoto.

Alevi ayo yaphanre mutteko va mpanda

¹⁷ Vano esiri yawaatamana ni ya Nehemiya yamakiwettho ni Alevi. Rehumu mwaana a Bani sika aari awaamba. Esiri yawaatamana ni ya Rehumu yamakiwettho ni Hashabiya oolamulella a hafu a echigawo ya Keila.

¹⁸ Vano esiri yawaatamana ni ya Hashabiya yamakiwettho ni Bavai mwaana a Henadadi, oolamulella a hafu mmodda a echigawo ya Keila.

¹⁹ Vano esiri yawaatamana ni ya Bavai yamakiwettho ni Ezere mwaana a Yeshuwa oolamulella muzinda wa Mizipa moowehana ni enyumba yoosungellawo ezida ddakhoto ophiyera va Ekona.

²⁰ Vano esiri yawaatamana ni ya Ezere yamakiwettho ni Baruki mwaana a Zabai waambeella va Ekona ophiyera va mullako wa enyumba ya Eliyashibu mullupa mukutho muullupalli.

²¹ Vano esiri yawaatamana ni ya Baruki yamakiwettho ni Meremoti mwaana a Uriya, mwaana a Hakozi waambeella va mullako wa enyumba ya Eliyashibu ophiya o makomihello a enyumbeeyo.

Allupa mukutho ayo yaphanre mutteko va mpanda

²² Vano esiri yawaatamana ni ya Meremoti yamakiwettho ni allupa mukutho oowaapheella muzinda wa Yerusalemu.

²³ Vano esiri yawaatamana ni ya allupa mukutho yamakiwettho ni Benjamini ni Hashubu yoowehana ni enyumba ddiwa nave esiri yawaatamana ni ya Benjamini ni Hashubu yamakiwe ni Azariya mwaana a Maaseiya mwaana a Ananiya moowehana ni enyumbaaye.

²⁴ Vano esiri yawaatamana ni ya Azariya yamakiwettho ni Binuyi mwaana a Henadadi waambeella o enyumba ya Azariya ophiyera va Ekona.

²⁵ Vano esiri yawaatamana ni ya Binuyi yamakiwettho ni Palala mwaana a Uzayi moowehana ni va Ekona navettho nttattha nookhumella otte wa enyumba yavaddullu ya mwene, o nthato na alonda. Vano esiri yawaatamana ni ya Palala yamakiwettho ni Pedaya mwaana a Paroshi

²⁶ ni allupa mutteko a o enyumba ya Mulluku ayo yakhalla va Ofele ophiya o nipuro noowehana ni mullako wa Maaddi wookhuma nndduwa navettho nttattha noorekama.

Oomaka amodda

²⁷ Vano esiri yawaatamana ni ya Pedaya yamakiwettho ni athu a o Tekowa moowehana ni nttattha noorekamanne ophiyera vakhuviru ni Ofele.

²⁸ Allupa mukutho amodda yaamakattho esiri ompoto wa mullako wa Akavalo, arive muthu moowehana ni enyumbaaye.

²⁹ Vano esiri yawaatamana ni ya allupa mukutho yamakiwettho ni Zadoki mwaana a Imeri moowehana ni enyumbaaye nave esiri yawaatamana ni ya Zadoki yamakiwettho ni Shemaya mwaana a Shekaniya oyo awehera mullako wa Wookhuma Nndduwa.

³⁰ Vano esiri yawaatamana ni ya Shemaya yamakiwettho ni Hananiya mwaana a Shelemiya ni Hanuni mwaana aneetthanu ni mmodda a Zalafi nave esiri yawaatamana ni ya Hananiya ni Hanuni yamakiwettho ni Meshulamu mwaana a Berekiya moowehana ni echipindaaye.

³¹ Vano esiri yawaatamana ni ya Meshulamu yamakiwettho ni Malikiya mmodda a athu eeruso yoomuhana golide ophiya o enyumba dda allupa mutteko a o enyumba ya Mulluku navettho o enyumba ya athu ookulliha malonda moowehana ni mullako wa Mifikada ophiya o echipinda yavaddullu ya va ekona.

³² Vano esiri yawaatamana ni ya Malikiya yamakiwettho ni athu eeruso yoomuhana golide ni ookulliha malonda variyari va echipinda yavaddullu ya va ekona ni mullako wa Enkhosa.