Nehemiya 2 - Mawu a Mulluku

Nehemiya anaakhullelliwa oya o Yerusalemu

¹ Vano mu mweeri wa Nisani muyakha wa 20 wa omwene wa Aritakisereksesi mvo vinyo awiilleeye, kaamukusa kamuvelleella wa mwene. Vano ovenyera khalle kaari kihinooneyeke ookhumuwa vamiitthoni vaye.

² Vano mwene aakikoha wi, “Ethiyo kaambiiwa tini onooneyaawe ookhumuwa naari ohivoriiwaka? Yeella khe ello emodda koma wookhalla ni ethakaraka m'murimani mwawo.” Vaavo kahoova wunchichi.

³ Kaallota wa mwene wi, “Amwene ekhalle ni okumi woorekama! Ekhovaaka enooneye moohikhumuwa mwawiidde mvo muzinda nko ori mahame a makhollwaaka wootthattusiwa ntepe nave machiwi a millako ddiwa ahoonongeya ni munllo?”

⁴ Nave mwene aakikoha wi, “Vano wapaalla okiveke tini?” Sika kaavekella wa Mulluku ooddullu.

⁵ Nave kaallota wa mwene wi, “Ddaarimi dduuddivenlleni amwene nave mwakeerella echifundo awuurumeyellaanyu, mukirume o Yuda o muzinda nko ori mahame a makhollwaaka wi kawumakettho.”

⁶ Nave mwaaramwene ari vaavo ahaakhulla wi, “Ethiyo wenko onaakhallewo mallapo makavi nave onaaweewo niini?” Kaamulleella mwene enthawi yookhallawo nave yoowaawo. Sika ddahaaddivella amwene okaakhullella wi kiyeewo.

⁷ Vano kaamulleella mwene wi, “Ddaarimi dduuddivelleni amwene, mukinnye makalata wi kaavelleelle wa enduna dda vakhopella va muhinje wi ddaakhullelle wi kivire mwiillaponi mwiwa ophiyera kiphiyalle o Yuda.

⁸ Nave mukinnyettho kalata mmodda a Asafu oowehera otthako wamwene wi akivahe matabwa oopangella machiwi a millako dda mpanda wa enyumba ya Mulluku, a mpanda wa muzinda ni a enyumba eyo kinaakhallekeemimo.” Nave mwene aakinnya nnddo kavekilleemi vawi nnatta naphaama na Mulluku naari va miyaano.

⁹ Vano kaaya wa enduna dda o echigawo ya vakhopella va muhinje nave kaawinnya makalata a mwene. Nave mwene aakirumiha ni oohoollella akhoto vamodda ni oowella va akavalo.

¹⁰ Koma Sanibalati Muhoroni ni Tobiya oohoollella a Aamoni yiiwalliiwa wi muthu mmodda aawa aweerella Aisraele ddaphaama yaananariwana wunchichi.

¹¹ Sika kaaphiya o Yerusalemu nave kaakhallawo mallapo mararu.

¹² Nave ngaamulleelle arive muthu nnddo Mulluku addihiyalleeye m'murimani mwaka wi kimweerelle Yerusalemu. Vano kaavenya mahiiyu vamodda ni athu amodda vang'ono nave khavaari erive enama opatula bulu oyo kamuwenlleemi.

¹³ Mahiiyu kaakhuma kiweella va mullako wa Ntapo kaphiya o ehime ya Enama Yam'maaddini ni va mullako wa Mashi nave kaheetella mpanda wa muzinda ni machiwi yoonongiwe ni munllo.

¹⁴ Vano kaavirellella kaphiya o mullako wa Neetuutu ni o nthiya na Mwene koma khevaari nipuro nawi bulwaaka aweellevo.

¹⁵ Sika mahiiyu vaavo oweella mu ntapo kaavirellella weetella mpandooyo nave kaarukunuwa kinahokollowa oweella va mullako wa Ntapo.

¹⁶ Nave oohoollella kheyaadduwenlle nko kayiilleemi naari nnddo keereemi vawittho ngaalleelle naari Ayuda, allupa mukutho, attekweene, oohoollella amodda navettho athu amodda ayo yaphwanelle ophara muttekooyo.

¹⁷ Vano kahaalleella wi, “Munnoona ddookatamiha niriihuna, mmo Yerusalemu atthattuwalleeye matepe nave machiwi a millako ddaye yohoosiwa. Ngawani nimakettho mpanda wa Yerusalemu wi nihiwulliwekettho muru.”

¹⁸ Sika kahaatthopoollella wi nnatta naphaama na Mullukwaaka naari va miyaano navettho dda mawu ayo amwene yakilleellilliiwa. Nave athwaayo yaallota wi, “Hankoni naambe omakattho.” Vano yahiivelleella ni murimiiwa muttheene wi yaambeelle mutteko waphaama.

¹⁹ Koma Sanibalati Muharoni, Tobiya oohoollella a Aamoni ni Geshemu Mwaarabu yiiwalliiwa nnddo nakhozekelleehu wi neere, yaanittheya nave yaaninyaambusa ellota wi, “Muneereenyunndda tti tini? Ethiyo munavaanyihana ni amwene?”

²⁰ Vano kaawaakhulla wi, “Mulluku ooddullu aneeronikavihera wi ddeko ddineetelleke phaama nave hiyaano allupa muttekwaaye nineeromakattho koma nyuwaano khamunna embali apaalle odindo naarittho erive ello yawi ttuuwuupuwellanani mu Yerusalemu.”