Nehemiya 13 - Mawu a Mulluku

Ohiyanihiwa ni alleto

¹ Nllapo nenno yaheerenga mookhuwa nibukhu na Mose vamiitthoni va athu nave waalembiwa wi, “Vihiwe viphwanyeya Mwamoni apaalle Mmowabu akhallakana mu mutthukumano wa Mulluku.

² Vallethi yaalla kheyaavahille Aisraele buledi ni maaddi. Munipuroni mwiwa, yamurumalle Balamu wi aatembelele komave Mullukwaahu aarukunusa matembelelo okhalla madaliso.”

³ Vano athwaayo yiiwalliiwa lamulonna, yahaavenyihavo alleto attheene va mutthukumanwiiwa.

Nehemiya anapotokosattho ddeko ddoonanara

⁴ Vano ella ehineereye, Eliyashibu mullupa mukutho oyo atthoolliwe wi akhalle oolamulella ezipinda ddoosungellamo ddeko o enyumba ya Mulluku navettho oyo iiwanana ni Tobiya,

⁵ aamukhozera Tobiya echipinda yuullupalli mmo vawaamba yasungalliiwamo mikutho dda othu, lubani,* eziwiya, ddoovelleella dda allupa mukutho navettho ddaneekhumi dda ddoocha, dda vinyo ni dda makhura nnddo ddalamuliwe wi evahiwe Alevi, athu awiipa machipo ni alonda a millako o enyumba ya Mulluku.

⁶ Ddeereyiiwa ddenndda miyaano ngaari mu Yerusalemu vawi muyakha wa 32 wa olamulello wa Aritakisereksesi mwene a o Babiloni, kaaya wa mwenooyo. Vano viviralle enthawi, kaamuveka mwene

⁷ wi kihokollweelle o Yerusalemu. Vano kaaphwanya yoolakwa Eliyashibu eerilleeye voomukhozellani Tobiya echipinda mu nthato na enyumba ya Mulluku.

⁸ Vaavo kaasha murima nave kaamutathillella vaatte katundu muttheene a Tobiya oyo aari muchipindanimmo.

⁹ Vano kaalamula wi ezipinda ddeellihiwe. Nave kaahokollosella eziwiya dda enyumba ya Mulluku vamodda ni mikutho dda othu ni lubani.

¹⁰ Kahoonattho wi Alevi kheyaavahiwa ddeko ddiwa yaphwanelliiwa waakhella. Sika Alevi ni awiipa machipo yaahokollweella o emata ddiwa.

¹¹ Sika kahaahumullulla oohoollella wi, “Ethiyo kaambiiwa tini enyumba ya Mulluku ehiyiwiiwa ddiidda?” Nave kahaatthukumaniha Alevi ni awiipa machipo kaahiyattho m'mapuroni mwiwa.

¹² Nave Ayuda attheene yaawaana ddaneekhumi dda othu, dda vinyo ni dda makhura o ezipinda ddoosungellamo ddeko.

¹³ Nave ayo kaatthoolleemi wi ekhalle oosunga eyuuma o ezipinda ddoosungellamo ddeko yaari Shelemiya mullupa mukutho, Zadoki namalembella, Pedaya mmodda a Alevi navettho oowaakavihera nnddina naye Hanani mwaana a Zakuri, mwaana a Mataniya vawi yaari oororomelleya. Muttekwiiwa waari wowaakawella ddeko Alevi akhwiiwa.

¹⁴ Nyuwaano Mullukwaaka, kuupuwelleni ekaamba ya ddenndda. Muhitiwalle ddaphaama nnddo keerilleemi va enyumbaanyu nave mitteko ddiwa ddittheddene.

¹⁵ Enthawi yeeyo kaawoona athu mu Yuda empangaka vinyo nllapo na Sabata. Amodda yaanakusa vinyo, mpesa, namukuyu navettho katundu oohiyanahiyana enaareya abulu oyaana o Yerusalemu va nllapo na Sabata. Vano kahaachenjeza wi ehikulliheke erive ello va nllapo na Sabata.

¹⁶ Navettho athu ayo yakhalla mu muzinda wa Tiro yaawaana ehomba ni malonda oohiyanahiyana nave yaakulliha va nllapo na Sabata wa athu a mu Yuda mu Yerusalemu.

¹⁷ Vaavo kahaahumullulla oohoollella a mu Yuda nave kahaakoha wi, “Ethiyo yoonanara muneerenyweella tti tini, oripiha nllapo na Sabata?

¹⁸ Ethiyo makhollwaanyu kheyeerillettho ddawi ddiidda nave Mullukwaahu khaanillakille m'muzindanimmu? Koma nyuwaano munapaalla ottatthamullattho owallaaye va Aisraele vooripihani nllapo na Sabata.”

¹⁹ Vano misikuwa waamba wa nllapo na Sabata kaalamula wi machiwi a millako dda Yerusalemu ewalliwe nave wi ehihulliwe ophiyera omalla wa nllapo na Sabata. Nave vamillakonimvo kahaahiyavo mullupa muttekwaaka amodda wi ewehereke millakonnddo woonesesa wi ehivollochihiwettho erive malonda m'muzindanimmo nllapo na Sabata.

²⁰ Sika athu ookulliha malonda oohiyanahiyana yaakona otte wa muzinda wa Yerusalemu nllapo nimodda apaalle meelli.

²¹ Nave kahaachenjeza ni waakoha wi, “Ethiyo kaambiiwa tini munakoneenyu vakhuviru ni esiri? Mwaakullellattho kinimuumakani.” Nave waambeella enthawi yeeyo oya muhoollo, kheyaawattho va nllapo na Sabata.

²² Nave kahaalamula Alevi wi eddeellihe weekhiiwa nave ewe wi ewehereke va millako wi nisungeke nllapo na Sabata wi nikhalleke naweella. Nyuwaano Mullukwaaka, upuwellanittho ddenndda, mukeerelle echifundo nave mukisunge moollikana ni echikondaanyu yuullupalli ni yoohisintheya.

²³ Enthawi yeeyo kaawoona Ayuda ayo yaatthenlle atthiyana a o Ashidodi, a o Amoni navettho a o Mowabu.

²⁴ Sika hafu a aniiwa yallota Esidodi apaalle ellotello dda mitundu ddimodda nave kheyaaworattho ollota Eyuda.

²⁵ Vano kaakanganana ni waatembelela nave kaawuukutha amodda ni waatulla meehiiwa. Nave kahaallupelliha vamiitthoni va Mulluku wi, “Muhaatthellihe aniinyu aatthiyana wa allopwana eelleto nave nyuwaano ni aniinyu aallopwana muhaatthelle atthiyana eelleto.

²⁶ Ethiyo khamunuupuwella wi Solomoni mwene a o Israele aachimwa ekaamba ya atthiyana wonanko yaalla? Variyari va mitundu ddinchichi dda va ellapo yavatthi khaarivo mwene wonanko olliye nave Mulluku aanamukonda amutthoolla wi akhalle mwene a Aisraele attheene koma atthiyana eelleto yaamuchimwiha.

²⁷ Ethiyo vano nuuttakiheni nyuwaano vaweerani yoonanara yuullupalli ddiidda ni okhallattho oohiroromelleya wa Mullukwaahu vawaatthellani atthiyana eelleto?”

²⁸ Nave mmodda a anamwani aallopwana a Yoyada, mwaana a Eliyashibu mullupa mukutho muullupalli aari mukamwene a Sanibalati Muhoroni. Sika ekaambiiwa kamwiikarilleemi wi avenyewo o Yerusalemu.

²⁹ Nyuwaano Mullukwaaka, upuwellani mmo yaripihelliiwa ollupa mukuthwiiwa ni mmottho yavevullelliiwa echipangano eyo mwakeraatthihalleenyu ni Alevi.

³⁰ Vano kaaweelliha o erive ello yeelleto nave kaahiyattho allupa mukutho ni Alevi m'mapuroni mwiwa wi arive muthu aphareke muttekwaaye.

³¹ Nave kahoonesesa wi ekhuni dda mukutho ni ezipaso ddawaamba ddinnavelleelliwa mu enthawiiwa. Nyuwaano Mullukwaaka, kuupuwelleni ekaamba ya ddenndda.