Nehemiya 12 - Mawu a Mulluku

Ntthopoollo na allupa mukutho ni Alevi

¹ Nna sika ntthopoollo na allupa mukutho ni Alevi ayo yawiillewo wuukaporoni nimodda ni Zerubabele mwaana a Sealatiele navettho ni Yeshuwa. Allupa mukutho yaari Seraya, Yeremiya, Ezara,

² Amariya, Maluki, Hatushi,

³ Shekaniya, Rehumu, Meremoti,

⁴ Ido, Ginetoyi, Abiya,

⁵ Miyamini, Maadiya, Biliga,

⁶ Shemaya, Yoyaribu, Yedaya,

⁷ Salu, Amoki, Hilikiya ni Yedaya. Athu yaalla yaari oohoollella variyari va allupa mukutho ni abaliiwa mu enthawi ya Yeshuwa.

⁸ Nave Alevi oohoollella wiipa machipo oothokoza yaari Yeshuwa, Binuyi, Kadimiyele, Serebiya, Yuda ni Mataniya vamodda ni abaliiwa.

⁹ Nave abaliiwa ayo yiimella moowehana yaawiipaka yaari Bakibukiya ni Uno.

Edduullu dda Yeshuwa muullupalli a allupa mukutho

¹⁰ Yeshuwa aamuyara Yoyakimu, Yoyakimu aamuyara Eliyashibu, Eliyashibu aamuyara Yoyada,

¹¹ Yoyada aamuyara Yonatani nave Yonatani aamuyara Yaduwa.

Oohoollella a mabanja a allupa mukutho

¹² Nna sika ntthopoollo na oohoollella a mabanja a allupa mukutho mu enthawi ya Yowakimu muullupalli a allupa mukutho. Oohoollella a nibanja na Seraya aari Meraya. Oohoollella a nibanja na Yeremiya aari Hananiya.

¹³ Oohoollella a nibanja na Ezara aari Meshulamu. Oohoollella a nibanja na Amariya aari Yehohanani.

¹⁴ Oohoollella a nibanja na Maluki aari Yonatani. Oohoollella a nibanja na Shebaniya aari Yosefe.

¹⁵ Oohoollella a nibanja na Harimu aari Adina. Oohoollella a nibanja na Meraiyoti aari Helikayi.

¹⁶ Oohoollella a nibanja na Ido aari Zekariya. Oohoollella a nibanja na Ginetoni aari Meshulamu.

¹⁷ Oohoollella a nibanja na Abiya aari Zikiri. Oohoollella a mabanja a Miniyamini ni Mowadiya yaari Pilitai.

¹⁸ Oohoollella a nibanja na Biliga aari Shamuwa. Oohoollella a nibanja na Shemaya aari Yehonatani.

¹⁹ Oohoollella a nibanja na Yoyaribu aari Matenayi. Oohoollella a nibanja na Yedaya aari Uzi.

²⁰ Oohoollella a nibanja na Salayi aari Kalai. Oohoollella a nibanja na Amoki aari Eberi.

²¹ Oohoollella a nibanja na Hilikiya aari Hashabiya nave Oohoollella a nibanja na Yedaya aari Netanele.

Manddina a mabanja a allupa mukutho ni a Alevi

²² Ollota dda Alevi, va enthawi ya Eliyashibu, Yoyada, Yohanani ni Yaduwa waalembiwa manddina a oohoollella a mabanja a Alevi ni a allupa mukutho ophiyera enthawi ya mwene Dariusi a o Peresiya.

²³ Edduullu dda Levi, makamaka oohoollella a mabanjiiwa, yaalembiwa mu Nibukhu na Epilli ophiyera enthawi ya Yohanani mwaana a Eliyashibu.

Okawana mitteko dda o enyumba ya Mulluku

²⁴ Oohoollella a Alevi, Hashabiya, Sherebiya ni Yeshuwa mwaana a Kadimiyele ni abaliiwa yaakaviherana vawiipani machipo oollapella ni oothokoza moollikana ni mmo Davide muthu a Mulluku alamulalleeye wi mulloko wiipeke moowaakakhana.

²⁵ Mataniya, Bakibukiya, Obadiya Meshulamu, Talimoni ni Akubu yaari alonda a va millako nave oowehera ezipinda ddoosungellamo ddeko o enyumba ya Mulluku.

²⁶ Yaalla sika yaarivo enthawi ya Yoyakimu mwaana a Yeshuwa, mwaana a Yozadaki navettho enthawi ya enduna Nehemiya ni ya Ezara mullupa mukutho navettho namalembella.

Opatuliwa wa mpanda wa muzinda

²⁷ Vano voopatulani mpanda wa Yerusalemu yaawiithana Alevi ovenyera orive weko yakhalliiwa wi ewe o Yerusalemu voopatulani mpanda moohakallalla ni moothokoza vawiipani machipo moophariha mutteko ezida monga mapallapata, magitala ni azeze.

²⁸ Navettho athu a mabanja a Alevi awiipa machipo yaatthukumana vamodda ovenyera omapuroni owaapheella Yerusalemu ni ovenyera o mizi dda Anetofati.

²⁹ Waaphiyattho awiipa machipo amodda ovenyera o Betegiligala, echigawo ya Geba ni Azimaveti vawi yaari emakille khalle mizi ddiwa moowaapheella Yerusalemu.

³⁰ Vano allupa mukutho ni Alevi yaaddeelliha nave yaaweelliha athu, millako ni esiri dda mpanda.

³¹ Nave kaawaana oohoollella a o Yuda kiwellana va esiri ya mpandooyo. Kaatthoolla milloko miilli dduullupalli wi ddimuthokoze Mulluku ni machipo vawaapheellani muzindooyo. Mulloko mmodda wayiille onnattanatta va esiri ya mullako wa Mashi.

³² Nave oothwarellella yaari Hoshaya ni hafu a oohoollella a o Yuda

³³ ni Azariya, Ezara, Meshulamu,

³⁴ Yuda, Benjamini, Shemaya ni Yeremiya.

³⁵ Vaakhallattho anamwani amodda a allupa mukutho ayo yiipa mapallapata monga Zekariya mwaana a Yonatani, mwaana a Shemaya, mwaana a Mataniya, mwaana a Mikaya, mwaana a Zakuri, mwaana a Asafu.

³⁶ Vaakhallattho abaliiwa monga Shemaya, Azarele, Milalayi, Gilalayi, Maayi, Netanele, Yuda ni Hanani ayo yatukhulla ezida ddawiipella machipo dda Davide muthu a Mulluku ni Ezara namalembella oyottho aahoollella.

³⁷ Nave va mullako wa Neetuutu yaawella va masitepe ooya o muzinda wa Davide voothwarani ettilla ya vasirini omwaako wa enyumba ya Davide o mullako wa Maaddi wookhuma nndduwa.

³⁸ Mulloko mmodda woothokoza wayiille wuunyotthoni nave kawuthwarille yooyo vamodda ni hafu a mulloko wa athu. Naheeta okhwaranya nttattha na Eng'anjo naphiya o Esiri Yooramballalla.

³⁹ Nave naweellettho omwaako wa mullako wa Efuremu, va Mullako Wakhalle, va Mullako wa Ehomba, va nttattha na Hananele ni nttattha na Handredi ophiya o Mullako wa Enkhosa nave voomallihellani nahiimella va Mullako wa Alonda.

⁴⁰ Sika milloko miillinnddo ddaathokoza mu enyumba ya Mulluku vamodda ni miyaano, hafu a oohoollella,

⁴¹ allupa mukutho monga Eliyakimu, Maaseiya, Miniyamini, Mikaya, Eliyoenai, Zekariya ni Hananiya ni mapallapatiiwa

⁴² navettho athu awiipa machipo monga Maaseiya, Shemaya, Eleazara, Uzi, Yehohanani, Malikiya, Elamu ni Ezere. Yezeraya sika aari oohoollella a awiipa machipo.

⁴³ Nave va nllapo nenno yaavelleella mikutho ddinchichi nave yaahakallalla wunchichi vawi Mulluku aaweeriha wi ehakallalle. Atthiyana ni anamwani yaahakallallattho nave ohakallalla wa athu a o Yerusalemu wahiiweya wuuteete.

Ddoovelleella dda va mallapello mu enyumba ya Mulluku

⁴⁴ Nllapo nenno waatthoolliwa athu oolamulella ezipinda ddoosungellamo ddeko o enyumba ya Mulluku wonanko ddoovelleella, ezipaso ddawaamba ni ddaneekhumi. Athwaayo yaatthukumaniha ddoovelleella ovenyera mu emata ddawaapheella mizinda wi ekhalle echigawo ya allupa mukutho ni Alevi moollikana ni malamulo. Vawi Ayuda attheene yaahakallalla ni allupa mukutho ni Alevi yarumeyellaayo.

⁴⁵ Nave yaamurumeyella Mullukwiiwa navettho yaaphara mutteko waweelliha. Navettho awiipa machipo ni alonda a mu millako yaarumeyella phaama moollikana ni mmo alamulelle Davide ni mwanaye Solomoni.

⁴⁶ Vawi khalle mu enthawi ya Davide ni Asafu waakhalla oohoollella a awiipa machipo oomutitimiha ni oomuthokoza Mulluku.

⁴⁷ Nave enthawi ya Zerubabele ni enthawi ya Nehemiya, Aisraele attheene yaanavelleella nllapo ni nllapo ddoovelleella wa athu awiipa machipo ni alonda a mu millako o enyumba ya Mulluku nave yaanavelleellattho ddoopatuleya wa Alevi. Nave Alevaayo yaanapatulavottho dda anamwani a Aroni, allupa mukutho.