Nehemiya 11 - Mawu a Mulluku

Athu ookhalla mu Yerusalemu

¹ Vano oohoollella yakhalla mu Yerusalemu nave athu amodda yahoombesa wi emutthoolle muthu mmodda mwa athu khumi wi akhalleke mu muzinda woopatuleya, Yerusalemu nave athu atthanu ni asese oohallaalle ekhallekeve m'mizi.

² Nave athu yahaathokoza athu attheene ayo yiivelleelle mwa opaalla wiwa wi yakhalleke mu Yerusalemu.

³ Aisraele amodda, allupa mukutho, Alevi, allupa mutteko a o enyumba ya Mulluku ni edduullu dda allupa mutteko a Solomoni yakhalla mu ezigawo dda Yuda, arive muthu va nipuro naye. Oohoollella ayo yakhalla mu Yerusalemu

⁴ ovenyera mu nlloko na Yuda yaari, Ataya mwaana a Uziya, mwaana a Zekariya, mwaana a Amariya, mwaana a Shefatiya, mwaana a Mahalalele, edduullu dda Perezi,

⁵ Maaseiya mwaana a Baruki, mwaana a Kolihoze, mwaana a Hazaya, mwaana a Adaya, mwaana a Yoyaribu, mwaana a Zekariya, mwaana a Mushiloni.

⁶ Anamwani ni edduullu ddittheddene dda Perezi ayo yakhalla o Yerusalemu yaari 468 nave yaari amasiva.

⁷ Athu a nlloko na Benjamini ayo yakhalla mu Yerusalemu yaari Salu mwaana a Meshulamu, mwaana a Yoedi, mwaana a Pedaya, mwaana a Kolaya, mwaana a Maaseiya, mwaana a Itiyele, mwaana a Yeshaya,

⁸ ni abalaaye Gabayi ni Salayi. Abenjamini attheene ayo yakhalla o Yerusalemu yaari 928.

⁹ Yowele mwaana a Zikiri sika aari oohoollelliiwa nave Yuda mwaana a Heshenuwa sika aari aneepiilli wa oohoollella a m'muzindanimmo.

¹⁰ Allupa mukutho ayo yakhalla mu Yerusalemu yaari Yedaya mwaana a Yoyaribu, Yakini,

¹¹ Seraya mwaana a Hilikiya, mwaana a Mesulamu, Zadoki mwaana a Meraiyoti, mwaana a Ahitubi oyo aari mullupa mukutho muullupalli a enyumba ya Mulluku

¹² ni abaliiwa ayo yaphara mutteko wa enyumba ya Mulluku, attheene yaari 822. Vaakhallattho Adaya, mwaana a Yerohamu, mwaana a Pelaliya, mwaana a Amizi, mwaana a Zekariya, mwaana a Pashuri, mwaana a Malekiya

¹³ ni abaliiwa ayo yaari amasiva, attheene yaari 242. Vaakhallattho Amashisayi mwaana a Azarele, mwaana a Ahazai, mwaana a Meshilemoti, mwaana a Imeri

¹⁴ ni abaliiwa ayo yaari amasiva, attheene yaari 128. Nave oohoollelliiwa aari Zabidiele mwaana a Hagedolimu.

¹⁵ Alevi ayo yakhalla mu Yerusalemu yaari Shemaya mwaana a Hashubu, mwaana a Azirikamu, mwaana a Hashabiya, mwaana a Buni.

¹⁶ Shabetayi ni Yozabadi yaari oohoollella a Alevi ayo yalamulella mutteko wa otte wa enyumba ya Mulluku.

¹⁷ Vaakhallattho Mataniyo mwaana a Mika, mwaana a Zabidi, mwaana a Asafu oyo aari oohoollella wiipa machipo oothokoza mu enyumba ya Mulluku navettho Bakibukiya oyo aari oohoollella aneepiilli variyari va abalaaye. Vaakhallattho Abida mwaana a Shamuwa, mwaana a Galali, mwaana Yedutuni.

¹⁸ Alevi attheene ayo yakhalla mu muzinda woopatuleya yaari 284.

¹⁹ Alonda a millako dda enyumba ya Mulluku yaari Akubu, Talimoni ni abaliiwa, attheene yaari 172.

²⁰ Nave Aisraele, allupa mukutho ni Alevi amodda yakhalla mu echigawo ya Yuda nave arive muthu mu yoohallanaaye.

²¹ Koma allupa mutteko a o enyumba ya Mulluku yakhalla o Ofele mu Yerusalemu nave akapitawiiwa yaari Ziha ni Gishipa.

²² Kapitawo a Alevi o Yerusalemu aari Uzi mwaana a Bani, mwaana a Hashabiya, mwaana a Mataniya mwaana a Mika oyo aari mmodda mwa edduullu dda a Asafu, awiipa machipo va mutteko wa enyumba ya Mulluku.

²³ Vano mwene aalamula wi milloko ddawiipannddo ddikhallekevo nllapo ni nllapo voohoollellani wiipa machipo a mu enyumba ya Mulluku.

²⁴ Nave Petahiya mwaana a Meshezabele mmodda mwa edduullu dda Zera, a nlloko na Yuda, aawiimellella Aisraele vamiitthoni va mwene a o Peresiya.

Athu ookhalla mu mizi ni mizinda ddimodda

²⁵ Vano dda mizi ni emata ddiwa, athu amodda a nlloko na Yuda yakhalla o Kiriyati Ariba, Diboni ni Yekabizeele ni mizi ddiwa ddawaapheella,

²⁶ o Yeshuwa, o Molada, o Betepeleti

²⁷ o Hazara Shuwala, o Beeresheba ni mizi ddawaapheella,

²⁸ o Zikilagi, o Mekona ni mizi ddawaapheella,

²⁹ o Enirimoni, o Zora, o Yarimuti,

³⁰ o Zanowa, o Adulamu ni mizi ddawaapheella, o Lakishi ni emata ddawaapheella ni o Azeka ni mizi ddawaapheella. Sika yakhalla mu mizi ddittheddene waambeella o Beeresheba ophiya o ntapo na Mwaana a Hinomu.

³¹ Athu a nlloko na Benjamini yakhalla ovenyera o Geba oya muhoollo, o Mikimashi, Aiya, Betele ni mizi ddawaapheella,

³² o Anatoti, Nobi, Ananiya,

³³ o Hazori, Rama, Gitaimu,

³⁴ o Hadidi, Zeboimu, Nebalati,

³⁵ o Lodi, Ono ni o ntapo na Athu Eeruso.

³⁶ Milloko ddimodda dda Alevi nnddo ddakhalla mu echigawo ya Yuda ddatthaamelle o echigawo ya Benjamini.