Nehemiya 10 - Mawu a Mulluku

¹ Ayo yadindalle yaari enduna Nehemiya mwaana a Hakaliya ni Zedekiya.

^2-8 Nave allupa mukutho yaari Seraya, Azariya, Yeremiya, Pashuri, Amariya, Malakiya, Hatushi, Shebaniya, Maluki, Harimu, Meremoti, Obadiya, Daniele, Ginetoni, Baruki, Meshulamu, Abiya, Miyamini, Miyamini, Maaziya, Biligayi ni Shemaya.

^9-13 Nave Alevi yaari Yeshuwa mwaana a Azaniya, Binuyi a nlloko na Henadadi, Kadimiyele ni abaliiwa monga Shebaniya, Hodiya, Kelita, Pelaya, Hanani, Mika, Rehobu, Hashabiya, Zakuri, Sherebiya, Shebaniya, Hodiya, Bani ni Beninu.

^14-27 Nave oohoollella yaari Paroshi, Pahatimowabu, Elamu, Zatu, Bani, Buni, Azigadi, Bebai, Adoniya, Bigivai, Adini, Atere, Hezekiya, Azuri, Hodiya, Hashumu, Bezai, Harifi, Anatoti, Nebayi, Magapiyasi, Meshulamu, Heziri, Meshezabele, Zadoki, Yaduwa, Pelatiya, Hanani, Anaiya, Hoseya, Hananiya, Hashubu, Haloheshi, Piliha, Shobeki, Rehumu, Hashabuna, Maaseiya, Ahiya, Hanani, Anani Maluki, Harimu ni Baana.

Echipangano

²⁸ Athu amoddaayo, allupa mukutho, Alevi, alonda a millako dda enyumba ya Mulluku, mullupa mutteko a o enyumba ya Mulluku, athu awiipa machipo ni athu attheene a mitundu a mitundu ddimodda ayo yamullapella Mulluku vamodda ni awariwa, aniiwa aallopwana ni aatthiyana ayo enawora wiiwesesa phaama,

²⁹ hiyaano attheene nahiiwanana ni abalaahu, oohoollellaahu, nillupella wi nineereweeta mu malamulo a Mulluku ayo yavelleelliwe oweella mwa Mose oorumeyella a Mulluku. Sika nineerewiiwellella malamulo mattheene ayo Apwiya Mullukwaahu yanilamulelliiwa nave nineerosunga malangizwiiwa mattheene. Nave nitembeleliwe naahiiwellella apaalle weera ddenndda.

³⁰ Khaniwa naavelleella aniihu aatthiyana wi etthelliwe ni anamwani a athu eelleto nave khenaakusa aniiwa aatthiyana wi etthelliwe ni aniihu.

³¹ Nave athu a mitundu ddimodda amwiillaponimmo yawaana tirigu apaalle ddeko ddimodda ddookulliha va nllapo na Sabata, khenaakulla nllapo nenno naarittho va nirive nllapo naweella. Orive muyakha waneetthanu ni piilli nineerewiithuuwiha emata nave nineerokhululukella ekongoli ddittheddene.

³² Ninimallupellattho wi orive muyakha nineerekovelleella magaramu masese a siliva awi epharihiweke mitteko dda o enyumba ya Mullukwaahu,

³³ Monga buledi oopatuleya, mikutho dda nllapo ni nllapo dda yoocha ni ddooshellelliha owaaka mikutho dda masabata, dda Ehakallallo ya Wooneya wa Mweeri, dda ehakallallo ddimodda, dda ddeko ddoopatuleya, dda ddoopepesella machimo a Aisraele owaakattho mitteko ddittheddene dda o enyumba ya Mullukwaahu.

³⁴ Hiyaano athu shisha, allupa mukutho ni Alevi nineerewoombesattho wi niphwanye mabanja ayo enaaweena ekhuni o enyumba ya Mullukwaahu mu enthawi yookeraatthihiwa orive muyakha wi ddooselliweke mikutho dda va nikuwa na Apwiya Mullukwaahu moollikana ni nnddo ddilembiwe m'malamuloni.

³⁵ Ninimalonjezattho wi nineerowaana o enyumba ya Apwiya, ezipaso ddawaamba dda m'matani mwahu dda orive muteekho muyakha ni muyakha.

³⁶ Nineerowaanattho o enyumba ya Mullukwaahu, wa allupa mukutho enarumeyella wenko, mwaana aamullopwana awaamba ni asaana awaamba a eng'ombe, enkhosa ni epuri ddahu moollikana ni nnddo ddilembiwe m'malamuloni.

³⁷ Nave nineerowaana wa allupa mukutho, mu ezipinda ddoosungellamo ddeko mu enyumba ya Mullukwaahu, othu wawoottowa wawaamba navettho emphaso ddahu ddimodda monga ezipaso dda orive muteekho, vinyo ni makhura. Nineerovelleellattho wa Alevi, emodda yaneekhumi ya ddeko dda m'matani mwahu vawi Alevi sika enatthukumaniha ddeko ddittheddene ddaneekhumi mu ezigawo ddahu ddittheddene.

³⁸ Nave mullupa mukutho, edduullu ya Aroni aneerothaanana ni Alevi yatthukumanihaka ddaneekhuminnddo. Nave Alevi eneerekowaana ddaneekhuminnddo o ezipinda ddoosungellamo ddeko mu enyumba ya Mullukwaahu.

³⁹ Vawi Aisraele ni edduullu dda Alevi eneerowaana tirigu, vinyo ni makhura o ezipinda ddoosungellawo ddeko. Wenko sika ori eziwiya ddoopatuleya, allupa mukutho, alonda a m'millakoni ni awiipa machipo ayo enarumeyellawo. Khaniwa nihiya opwatha enyumba ya Mullukwaahu.