Nehemiya 1 - Mawu a Mulluku

Ovekella wa Nehemiya

¹ Mawu a Nehemiya mwaana a Hakaliya. Mu mweeri wa Kisilevi muyakha wa 20, kaariimi o Susa muzinda muullupalli,

² Hanani mmodda mwa abalaaka aawa ni athu amodda ovenyera o Yuda. Nave kahaakoha dda Yerusalemu ni dda Ayuda ayo yahanlle ni ayo yahokollowille wuukaporoni.

³ Nave yaakaakhulla wi, “Athu yahokollowille wuukaporoni ayo enakhalla mu echigawo eri mu ddoohoosa dduullupalli nave ennavevulliwa. Mpanda wa Yerusalemu wookumuwa nave machiwi a millako ddiwa ahoonongeya ni munllo.”

⁴ Kiiwalleemi mawu yaalla, kaakeraatthi kininlla. Kahinlla nave kaahalla ocha* wa mallapo manchichi nave kaavekella wa Mulluku ooddullu.

⁵ Vano kaallota wi, “Nyu Apwiya Mulluku ooddullu, Mulluku muullupalli ni awoopiha, oyo anasunga echipangano ni okhalla ni echikondi yoohisintha wa athu ayo enamukonda ni wiiwellella malamulwaaye.

⁶ Apellani maaru nave khunuullani miittho wi mwiiwe ovekella wa oorumeyellaanyu nko kinavekelleemi vamiitthoni vanyu otthaana ni mahiiyu waavekellella Aisraele oorumeyellaanyu, owulula machimwiiwa ayo nichimwalleehu vamiitthoni vanyu. Ddawoona, miyaano ni nibanja na makhollwaaka nohuuchimwellani.

⁷ Nooweerellani ddoonanara ddinchichi nave kheniiwellelle malamulwaanyu, malangizwaanyu ni echiweruzwaanyu mwaninnyalleenyu oweella mwa Mose oorumeyellaanyu.

⁸ Upuwellani mawu mwamulleelleenyu Mose oorumeyellaanyu wi, ‘Mwaahiroromelleyaka kineerewuupallallesani variyari va athu a mitundu ddimodda,

⁹ koma Mwahokollowella wa miyaano ni wiiwellella malamulwaaka ni oweera, kineerewuutthukumanihani ni wuuphiyihani o nipuro katthoonlleemi wi athu ellapellekewo nnddina naka naari mupallalleyelle o mamallihello wa ellapo yavatthi.’ ”

¹⁰ Alliwa tti oorumeyellaanyu nave tti athwaanyu ayo mwawooponlleenyu ni masivaanyu muullupalli ni nnatta nanyu neekophollo.

¹¹ Nyu Apwiya, apellani maaru o nivekello na oorumeyellaanyu ayo enatitimiha nnddina nanyu. Nave kipambaniheni mi oorumeyellaanyu ollello wi mwene akeerelle echifundo. Enthawi yeeyo kaari oovelleella vinyo wa mwene.