Nchipo na Solomoni 7 - Mawu a Mulluku

Musombwe

¹ We namwalli a mwene, manyallwaawo tti ooreera musapatoni owanreewennddo. Akasambaraawo ahoopeya phaama wonanko malluku oowallamella mutengo, oosemiwa ni muthu eeruso.

² Ntukhwa nawo niri wonanko kapu oovillikeya phaama, oyo ahinawelleella vinyo oottakanyihera. Erukullwaawo tti wonanko nipwiddi na tirigu, nowaapheelliwa ni malluwa ooreera.

³ Mapellaawo meelli tti wonanko anapattha a epaalla.

⁴ Nikohi nawo tti noorekama wonanko nttattha na manyaka na ethepo. Miitthwaawo tti wonanko ehime dda o Heshiboni, nnddo ddiri vakhuviru ni mullako wa o Batirabimu. Ephunaawo tti wonanko nttattha na o Lebanoni, nooweha o Damasiko.

⁵ Murwaawo wohiimella phaama wonanko mwaango wa Karimele. Meehaawo tti ooripa phaama ni oowala. Oreera woofiira wiwa onnamukusa murima naari mwene.

⁶ Wooreeresesa, onnahakallalliha! We ookondiwaaka, namwalli oohakallallihesesa.

⁷ Orekama wawo tti wonanko muteekho wa mukwarangwa, mapellaawo tti wonanko ntthatta na ezipaso.

⁸ Kaallota wi, kiwelle mukwarangooyo, kiphare ezipaso ddiwa. Mapellaawo ekhalle wonanko matthatta a mpesa, wunkhella wa mpweyaawo okhalle wonanko mapulosi.

⁹ Eyanwaawo ekhalle wonanko vinyo ooddivesesa, oomorella vayanoni ni vamiinoni. Namwalli

Namwalli

¹⁰ Mi tti a ookondiwaaka, munkhellaaye muttheene ori va miyaano.

¹¹ Hanko niye o emata, ookondiwaaka, niye nakone m'malluwani awunkhella.

¹² Hanko nipehe ohinase oya o emata ddampesa, noone mipesa ddaarimi ddiphuwalle, ddaarimi ddaambille wooniha anamwani a ezipaso navettho makangaza yaarimi ettaphullalle malluwa. Wenko kineerowooniha echikondaaka.

¹³ Miteekho dda murete woohura ddinnunkhellesesa, vaatte vahu vookhalla ezipaso ddooddiva, ddakhalle ni ddisha, kuusungenlleemi, we ookondiwaaka.