Nchipo na Solomoni 6 - Mawu a Mulluku

Anamwalli

¹ We ooreeresesa mwa anamwalli attheene, ethiyo ookondiwaawo akelle wuuwi? Ethiyo ookondiwaawo avollowelle vaavi, wi nuukavihere omwaashaasha? Namwalli

Namwalli

² Ookondiwaaka akitthenlle o emataaye, o mikhuttu dda mmiddo wawunkhella. Akelle achihe eziweto ddaye o emata, akelle arukulle malluwa ooreera.

³ Ookondiwaaka tti aakaaka nave miyaano tti aayaaye. Anachiha eziweto ddaye variyari va malluwa. Musombwe

Nchipo naneesese

Musombwe

⁴ We ookondiwaaka, ori ooreera wonanko muzinda wa Tiriza, awooneya phaama wonanko Yerusalemu, awoopiha wonanko allupa ekhoto eembendela.

⁵ Ohikiwehesese, miitthwaawo ennakikusa murima. Meehaawo tti ooripa mooreera wonanko epuri ddinakitthella o miyaango dda o Giliyadi.

⁶ Miinwaawo tti aweella wonanko enkhosa, ddoovenyera wene woohapihiwa. Miino mattheene tti ookumanella phaama, kheviri nihonga naari nimodda.

⁷ Otulli wa ekuwaawo yookhuneellana ekhove, maramaawo ennawala.

⁸ Va awaramwene uullupalli 60 nave awariye ang'onong'ono 80 navettho anamwalli ooheerengeya,

⁹ ekhundaaka, aphaamaaka tti mmoddave. Ayariwemo yeekha mwa amennya, tti a vamurimani a amennya. Anamwalli emoonille yaamuromolla oodala, naari awaramwene uullupalli owaaka ang'onong'ono yaamuriiha.

¹⁰ Ttaani oyo anakhuma wonanko ohinase, ooreera wonanko mweeri, oowala wonanko nndduwa, awoopiha wonanko allupa ekhoto eembendela?

¹¹ Kaakitthella o emata ya muteza wa alimondi, wi koone munyepu wa otapo, wi koone mipesa ddaarimi ddiphuwalle, ezipaso ddamakangaza ddaarimi ddittaphunlle malluwa.

¹² Kihinadduwelle erive ello, kakhanlle wonanko kinalloha kiri mugaretani na mwene.

¹³ Hokollowa, hokollowa, we Musulami? Hokollowa wi nuuwehesese. Namwalli Ethiyo yookiwehesesella miyaano Musulami tti tini, kaawiinaka variyari va mizere miilli?