Nchipo na Solomoni 5 - Mawu a Mulluku

Musombwe

¹ Koovollowa m'matani mwaka, we murokoraka, mwaaraka. Kinamuhata muraaka ni ddawunkhelliha yoocha ddaka. Kinacha enwaaka ni makallaphaaka. Kinamuwirya vinywaaka ni mukakaaka. Anamwalli Nyu ookondana, chani nave wiryani. Nyu ookondana, lezelani ni echikondi!

Anamwalli

² Kaakona koma murimaaka waari miittho. Ngiiwani! Ookondiwaaka sika anookotha. Musombwe Kihullelle we murokoraka, ookondiwaaka, ekhundaaka, aphaamaaka. Murwaaka woonaana ni nikame, meehaaka aanaana ni echifunga ya mahiiyu. Namwalli

Namwalli

³ Koorulla khalleve ddoowara, yooddiwarellattho tti tini? Koohuwa meto khalleve, yooddinanarihellattho vaweetani tti tini?

⁴ Ookondiwaaka avollochihalleeye nnatta naye vaniwindoni, murimaaka waatthomowamo ekaamba ya olliye.

⁵ Nyu atthiyana a o Yerusalemu, kinnuuvekani mwamphwanya ookondiwaaka, munaamulleelle tini? Mmulleelle wi kinnavoriiwa ekaamba ya echikondi.

⁶ Kaamuhullella ookondiwaaka, koma ookondiwaaka aari avennyevo. Mwiillaaka waakhumuwa ekaamba ya yeella. Kaamwaashaasha koma ngaamphwanyille. Kaamwiithana koma khaakaakhunlle.

⁷ Alonda yeetelliiwa etawoni yaakiphwanya. Yaakuukutha ophiyera yaakivoreya. Alondaayo yaakaakha yawiikhuneellaaka.

⁸ Nyu anamwalli a o Yerusalemu, ddawoona, kinimuuvekani. Kinallupella mu nnddina na mphoyo ni epaalla ddamuhakani wi echikondi muhiyitikheke apaalle oyivenyiha ophiyera epaallille mwaneeniiwa. Anamwalli

Anamwalli

⁹ Nilleelle, we ooreeresesa mwa atthiyana attheene. Ethiyo ookondiwaawo aakhwarannye amodda mwawiidde? Ethiyo ookondiwaawo aakhwarannye amodda mwawiidde wi ollupelleke mwawi ddiidda? Namwalli

Namwalli

¹⁰ Ookondiwaaka tti ooya m'mwiitthoni ni amasiva, tti oovuwesesa variyari va asombwe 10,000.

¹¹ Murwaaye tti wonanko golide aphaama. Meehaaye tti oolluwana phaama, tti ooripa phaama wonanko enthenga dda nakhuku.

¹² Miitthwaaye tti ootthattana phaama wonanko ekhunda mukhwipi mwa maaddi, ekhunda ddoohapihiwa m'mukakani.

¹³ Maramaaye tti wonanko emata, ddawiima ddawunkhella. Eyano ddaye ddooreera wonanko maduvi, ddoonuna ni ddawiihella dda mure.*

¹⁴ Miwono ddaye ddiri wonanko golide oohuruwelliwa, dda malluku oonyezimella. Mwiillaaye tti wonanko nnyaka na ethepo, woopotokosiwa phaama, wooreerihiwa ni malluku a safiro.

¹⁵ Meto ddaye ddiri wonanko opoto a malluku marabulo, ootthipelliwa moollipa va mathimwa a golide aphaama. Ookhalla ni mooneyello eeyuuma wonanko miyaango dda o Lebanoni, wonanko miteekho ddiwa dda mukunguza.

¹⁶ Muwano mwaye tti moonang'aneyesesa, ddawoona, olliye tti oosilileyesesa. Olla tti ookondiwaaka, tti mukhwaaka a vamurimani, nyu anamwalli a o Yerusalemu.