Nchipo na Solomoni 4 - Mawu a Mulluku

Musombwe

¹ We ookondiwaaka, wooreera, ngoona namwalliwe, wooreeresesa. Otulli wa ekuwaawo yookhuneellana ekhove, miitthwaawo ennareera wonanko ekhunda. Meehaawo tti ooripa mooreera wonanko epuri ddinakitthella o miyaango dda o Giliyadi.

² Miinwaawo tti aweella wonanko enkhosa ddoochemiwa, wonanko enkhosa ddoovenyera wene woohapihiwa. Miino mattheene tti ookumanella phaama, kheviri nihonga naari nimodda.

³ Eyanwaawo tti yooreeresesa wonanko olusi woofiira, Otulli wa ekuwaawo yookhuneellana ekhove, maramaawo ennawala.

⁴ Nikohi nawo niri wonanko nttattha na Davide, tti noorekama ni noowullukeya. Nohaapheelliwa ni emphete wonanko ezishango 1,000.

⁵ Mapellaawo tti wonanko amphoyo eelli, wonanko aanapattha a epaalla, enacha variyari va malluwa.

⁶ Ophiyera ohinase, epiphi ethawille, kithamakella mwaango wa mure,* ni mutunda wa lubani.*

⁷ We ookondiwaaka, wooreera, namwalliwe khonna naari nipamba.

⁸ Mwaaraka, nivenyewo o Lebanoni wuno, hanko nivenyewo o Lebanoni wuno. Okitthevo otthoka va mwaango wa Amana, va mwaango wa Seniri ni wa Heremoni. Ovenyemo m'makhunguni a mikango, ovenyewo omiyaangoni dda a nanthavi.

⁹ Wookitthomolla murima, we murokoraka, mwaaraka. Wookikusa murima ni mawehello a miitthwaawo, ni mmodda mwa ogufu wa munikohini mwawo.

¹⁰ Echikondaawo tti yooddiva mwawiidde omukhwaranya vinyo, we murokoraka, mwaaraka! Makhuraawo tti awunkhella mwawiidde okhwaranya ddawunkhella ddimodda ddittheddene!

¹¹ Eyanwaawo tti yoonang'aneya wonanko enwi, we mwaaraka. Maaddi a enwi ni mukaka ddiri vatthi va nllumi nawo. Wunkhella wa ddoowara ddawo ori wonanko wunkhella wa o Lebanoni.

¹² Murokoraka, mwaaraka, tti emata ya mpanda, tti neetuutu ooteteziwa, ehime yookhuneelliwa.

¹³ Embewu ddawo ddinnahakallalla phaama. Emateene wonanko ya ezipaso ddamakangaza, ya ezipaso ddooddiva, ddawunkhella ddoohiyanahiyana.

¹⁴ Wookhalla miteekho ni makukhu oohiyanahiyana, oopotokosella ddawunkhellesesa.

¹⁵ Tti wonanko neetuutu oohellella emata, wonanko ehime ya maaddi ookumi, wonanko mihinje dda maaddi dda o Lebanoni. Namwalli

Namwalli

¹⁶ Venya, we ephevo ya ompoto, owe wuno, we ephevo yoomwera. Woope m'matani mwaka, wunkhellesesa wiwa okwakhwanelle viriveveko. Ookondiwaaka avollowe m'matani mwaye, ache ezipaso ddaye ddoonang'aneya.