Nchipo na Solomoni 3 - Mawu a Mulluku

¹ Kikonaatthille mahiiyu vabedini vaka, kaamukhallella munkhella a vamurimani vaka, kaamwaashaasha koma oohimuphwanya.

² Sika kaallota wi, kineerovenya keeteete m'muzindanimmu, m'misewuni ni m'mapuroni. Kaamwaashaasha a vamurimani vaka. Kaamwaashaasha koma oohimuphwanya.

³ Alonda yaakiphwanya mvo yeetelliiwa muzinda. Kahaakoha wi, “Ethiyo moomoona a vamurimani vaka?”

⁴ Kaakhwaranyille vang'ono alondaalle kaamuphwanya. Kaamuphara oohimwaakhullella wi avenyevo, ophiyera kaamuvollochiha mpa mwa amoowe, muchipindani ya ayo yakiyanre.

⁵ Nyu anamwalli a o Yerusalemu, ddawoona, kinimuuvekani, kinallupella mu nnddina na mphoyo ni epaalla ddamuhakani, wi echikondi muhiyitikheke apaalle oyivenyiha, ophiyera epaallille mwaneeniiwa. Namwalli

Nchipo naneeraru

Namwalli

⁶ Ethiyo tti tini eyo enavenyera ohakani wonanko mwiisi woottikana, yawunkhella ni mure* ni lubani,* ya ddawunkhella ddittheddene dda amalonda?

⁷ Ngoona, ayo tti machira a Solomoni! Vookhalla akhoto 60, allopwana amasiva a o Israele.

⁸ Attheenaayo aaphareella masupada nave tti akhoto. Aamakellella masupada vakhwipimva, wi mahiiyu ellipane ni ddawoopiha ddaweereya.

⁹ Mwene Solomoni ahiipotokosella machira ni matabwa a o Lebanoni.

¹⁰ Aapotokosa meto ddiwa ni siliva, otulli wiwa waari wa golide, vookeraatthella viwa vaari ekuwo yoofiira, muwarimmo mwaareerihiwa ni anamwalli a o Yerusalemu.

¹¹ Khumani nyu anamwalli a o Ziyoni, mumoone mwene Solomoni. Awanre enduwira yoomwene eyo amennya yamuwarihalliiwa va nllapo nookwataaye mvo murimaaye wahakallanlliiwa.