Nahumu 3 - Mawu a Mulluku

Otulli wa Ninive

¹ Otulli wa muzinda woowiipha athu anchichi, muzinda wooddalla ni woottha ni wiiya, wooddivelliwa waakha.

² Ngiiwani winlla wa miwashullo, oruma wa magudumu, mikhito dda akavalo ni ogugudeya wa magareta.

³ Oowella va akavalo enimathamaka, masupada esherimaka, mavaka eri sherisheri. Yookhwa athu anchichi, mitembo ddiri millumillu, ddooheerengeya, athu eniimakwakwatuwana.

⁴ Nndda ddoheereya ekaamba ya ddoonanara ddawaata dda Ninive mutthiyana ooraruwa. Aanaakopa athu ni oreera waye woolleka, aanaalleka athu a mitundu ddittheddene ni ddooraruwa ddaye, aanawoottottha malloko ni ezitumwa ddaye.

⁵ Apwiya Amasiva Mattheene enallota wi, “Mi nginawaakhullella, kineerewuurulla ni wuuwulliha muru. Athu a mitundu ddittheddene eneerewoona epwillimwinddaawo, oneerowulliwa muru vamiitthoni va ellapo ddittheddene.

⁶ Kineerewuuvokhella dda vaddallani, kineerewuunyindulla, kineerewuutthattusa yooromiwa.

⁷ Attheene oowoona eneerekewuuthawa wi, ‘Ninive ootthattuwa ntepe, anaamwinllelle ttaani?’ Kinaamukuse wuuwi awuukhurumusa murima?”

⁸ We Ninive, ethiyo woomukhwaranya Thebesi, muzinda wa mukhwipi mwa Nailo, waapheelliwe ni maaddi, maaddaayo yaari wonanko esiriiwa ni mpandiiwa?

⁹ Muzinda oyo walamulella Kushi ni Iguputo, masiviiwa kheyaari ni malire, Aputi ni Alibiya yaaniiwananana.

¹⁰ Komave athu a o Thebesi yaaphariwa okaporo, aniiwa yaanyenyiwa m'misewuni ddittheddene dda m'muzindani. Adani yahaakawana athu oovuwaayo mwawoombesa, attekweene attheene yahaamaka ni onyolo.

¹¹ Wettho Ninive onaakhalle wonanko woolezela, oneerewaapheella muru, oneerewaashaasha nipuro noothawellawo.

¹² Mipanda ddawo ddittheddene ddinaakhalle wonanko namukuyu aambille wiithwa, atikhiwa ezipaso ddaye ddinnamorella muwano mwa oyo anapaalla oddicha.

¹³ Akhotwaawo tti wonanko atthiyana, millako dda ellapwaawo ddohaahullella adanaawo, munllo wooshellelliha mikoko ddoowallella machiwiiwa.

¹⁴ Murike maaddi wi ekwakhwanelle va enthawi yawuupharani. Llipihani mipanda ddanyu, votani ethaya, ithellani mu echikombole, opani enjerwa.

¹⁵ Naari mweere ddiiddo, munllo oneerewuushellellihanive, nsupada nineerowiiphani, nineerewuumallihani wonanko nazombe. Naari muttotthollane wonanko nazombe apaalle wonanko middope.

¹⁶ Mwaawaatiha a malondaanyu okhwaranya etheneeri ddooddullu koma attheene yaapallalleya wonanko middope.

¹⁷ Enduna ddanyu ddiri wonanko middope, attekweenaanyu tti wonanko nazombe oyo anawanddeellella vasirini wariirya koma nndduwa nakhuma, annavava nave khaavo anadduwella nko akelleeye.

¹⁸ We mwene a Asiriya, abusaawo enimakona, oohoollellaawo enimakwindima. Athwaawo yoomwareyella omiyaangoni, khaavo naari mmodda awaatthukumaniha.

¹⁹ Nikhwata nawo khaninna murete, khanivolla, attheene ayo eniiwa dda weyaano, ennoopa m'mattani moohakallalla. Ethiyo ookhallavo mmodda ahinallawiheke ekukwaawo yoohimalla?