Nahumu 2 - Mawu a Mulluku

Dda ogonjihiwa wa Ninive

¹ Nyu a o Ninive, oohella ekhoto enimawa wi ewoonongeni, ahiyeni akhoto va mipanda, wehakani omusewuni! Khozekellani ekhoto, makani malaambaanyu!

² Vihanlle vang'ono wi Apwiya ehokollose ooriiheya wa Israele wonanko mmo wakhallelliiwa khalle, adani ehinaakhe ddeko ddittheddene ni woononga mipesa ddiwa.

³ Ezishango dda akhotwiiwa tti ddoofiira, akhotwiiwa attheene ewanre ddoowara ddoonyezimella. Yiimenlle phaamaddene va mizere ddakhoto, magaretiiwa enyezimilaka wonanko okhara wa munllo, akavalo elluphalluphaka.

⁴ Magareta ethamakaka m'misewuni, Eri vikirivikiri m'mathatoni, eri mollimolli wonanko mitthiko eri ng'aning'ani wonanko ettari.

⁵ Oohoollella a akhoto eniimiithaniwa, enawa ekwakwatuwaka, enathamakella mpanda wa muzinda, enamaka yawiitetezellana.

⁶ Millako dda o muhinje ddoohulliwa, enyumba yoomwene yohoopopihiwa.

⁷ Amwaaramwene aapharelliwa wuukaporoni, allupa muttekwiiwa eniminlla wonanko ekhunda, enadduukutha weekhiiwa vakhakaddani.

⁸ Ninive ootthattuwa wonanko nthiya, nno maaddiiwa enakhuma poo. Amodda enimakhuwa wi, “Imellani! Imellani!” Koma khaavo oyo anahokollowa.

⁹ Akhani siliva, akhani golide! Eyuumiiwa tti yoohimalla, yoowallamella mutengo, yooheerengeya.

¹⁰ Muzinda wa Ninive wohoonongeya, wootthattuwa ntepe, wootthaamiwa. Mirima ddinnoova, makuttha ennatthukumella, masiva kheyiivo, ekhove ddoomora ni woova.

¹¹ Ethiyo vano muzindoolle ori wuuwi? Waari wonanko nikhungu na mikango, mmo asaaniiwa yachelliiwamo, mmo mikango ddittheddene ddakhalliiwamo.

¹² Mukango waamullopwana waaniipha enama yookwakhwana mukango waamutthiyana ni anaaye, waanaddalliha nikhungu niwa ni enama yookhaddullakhaddulla.

¹³ Apwiya Amasiva Mattheene enaalleella a o Ninive wi, “Mi nginawaakhullellani, kineerowoosellani magaretaanyu. Nsupada nineerowonongellani akhotwaanyu ayo tti wonanko mikango. Kineerowaakhani ddittheddene nnddo mwaakhilleenyu va ellapo yavatthi, amithengaanyu khewa yiiweyattho mawu.”