Nahumu 1 - Mawu a Mulluku

¹ Alla sika mawu oollota dda Ninive. Nibukhunna ninatthopoolla dda masomphenya a Nahumu a o Elikoshi.

Osha murima wa Apwiya va Ninive

² Apwiya tti Mulluku eehache ni oohokollosella ddoonanara, tti oollaka ni oowalli, ennaahokollosella ddoonanara oowaavaanyiha, ennaashella murima adaniiwa.

³ Apwiya tti oohisha murima mwawaakuva tti amasiva manchichi komave khenaakhullella wi oochimwa ahillakiwe. Vaweeta viwa vinnoopa namangalle ni ephevo yawoopiha, mirapo ddiri wonanko nthupi na manyallwiiwa.

⁴ Yahumullulla enyanja, ennumma, ennummihattho mihinje ddittheddene. Ddoomella dda o Bashani ni Karimele ddinnumma, malluwa o Lebanoni ennanyaalla.

⁵ Miyaango ddinnatikheya vamiitthoni vaye, asimiyaango eneerottotthowa. Ellapo yavatthi ennatthukumella vamiitthoni viwa, ellapo ni ddittheddene ddookhalla mwemmo.

⁶ Ethiyo ttaani anaawore wiimella vamiitthoni va Apwiya, alliwa eshille murima? Ethiyo ttaani anaawore ovillella o owalliiwa? Alliwa enniitha owalliiwa malluku ennaphweeya vamiitthoni viwa.

⁷ Apwiya tti aphaama, sika woothawella va enthawi ya ddoohoosa, ennaadduwella attheene oothawella wa alliwa.

⁸ Koma ni maaddi a echigumula eneerowoononga adaniiwa, ennawiikarihella o nipuro na epiphi.

⁹ Ethiyo munaaweerelle Apwiya echiwembu yawiidde? Alliwa eneerewuutthollosani wunchichi. Kheyaahokollosella wiilli ddoonanara athwiiwa.

¹⁰ Oolezelaalla eneeroshellellihiwa wonanko miiwa ni mapallaka awumma.

¹¹ “We Ninive mwa weyaano mwaavenyera muthu a yoolinga yoonanara, oopaalla oweerella Apwiya echiwembu sika mulangizi oohikhalla ni mutteko.

¹² Apwiya enallota wi, Naari Aasiriya eri amasiva ni anchichi, eneerewoonongeya ni omallellaatu. Koma nyu athwaaka, naari kuullakilleni, ngiwa kuulakanittho.

¹³ Sika kineerewinttaka nigoli* mu nikohi mwanyu, kineerophadda onyolwaanyu.”

¹⁴ Nyu a o Ninive, Apwiya aalamula wi, “Khamuwa mukhallaka ni edduullu ddooromolliwa nnddina nanyu. Kineerewoononga mafano oosema ni awoopa mu enyumba ya milluku ddanyu, kineerewuukatellani mahame vawi khamunna mutteko.”

¹⁵ Ngoona, omwaangoni onawa oollalleya othenga waphaama, anatthopoolla dda murendelle. Nyu a o Yuda musungeke mallapo eehakallallo, mweereke nnddo mwallupenlleenyu. Oonanara khewa yuuhellakanittho ekhoto vawi eneerotthollosiwa.