Miyambo 9 - Mawu a Mulluku

Ezeru ni okarangeya

¹ Ezeru yoomaka enyumbiiwa nave yohaatthipella apotwiiwa atthanu ni eelli.

² Yohiipha enamiiwa, yoomuttakanyihera vinywiiwa nave yookhoza vatebuloni.

³ Yohaaruma allupa muttekwiiwa aatthiyana wi yakhuweke m'mapuroni oowella m'muzindani wi,

⁴ “We eenamwani ngawa wuno!” Wa athu ookarangeya enallota wi,

⁵ “Waani muche yoochaaka nave mumuwirye vinyo oyo kimuttakanyihereemi.

⁶ Hiyani enamwani wi mukhalle ni okumi, etani mu ettilla ya ezeru.”

⁷ Oomweeruza oovevulla, aniivevulla yeekha. Oomuhumullulla oonanara, aniivoreya yeekha.

⁸ Ohimuhumullulle oovevulla vawi aneerowiita koma omuhumullulleke muthu eezeru aneerewuukonda.

⁹ Omulangize muthu eezeru nave aneerewoonjerereya okhalla eezeru, wamuhuddiha muthu oolungama aneerewoonjerereya okhalla oolungama.

¹⁰ Owoova Apwiya tti waamba wa ezeru, omudduwella Aweella tti okhalla ni wiiwesesa phaama ddeko.

¹¹ Ekaamba ya miyaano ezeru, mallapwaawo eneerewaata nave miyakha dda okumaawo ddineerewaanjerereya.

¹² Wakhalla eezeru, enaakhalle yaawoyaawo nave waayivevullaka onaahooweke weekha.

¹³ Okarangeya ori wonanko mutthiyana ootokollolla, eenamwani nave oohidduwella ello.

¹⁴ Annakeraatthi va mullako wa enyumbaaye ni m'mapuroni oowella a muzinda,

¹⁵ owiithana athu oovira, ooddeetella m'musewuni wi,

¹⁶ “We eenamwani ngawa wuno!” Wa athu ookarangeya anallota wi,

¹⁷ Maaddi awiiya ennaddiva nave buledi oochiwa mwawiipitthiha annanang'aneya.

¹⁸ Koma khanadduwella wi ookhwa eri wenko nave wi alleto a mutthiyanooyo aaya o ellapo ya ookhwa.